وبلىستىق بەينەلەۋ ونەرى مۇراجايىندا باستالعان ەسەپتىك كورمەدە قاراعاندىلىق قىلقالام شەبەرلەرىنىڭ بيىلعى جىلدى تابىستى اياقتاعالى وتىرعانى ايتىلدى. مادەني مەكەمەدە ۇيىمداستىرىلعان كوپتەگەن ءىس-شارا ونەرسۇيەر قاۋىمنىڭ كوڭىلىنەن شىعىپ, لايىقتى باعاسىن الدى.
مىسالى, بيىل روزا ابۋسەۆا, ءماديحان قالماحانوۆ, سەرگەي چەچەنوۆ, ۆلاديمير تروتسەنكو سىندى وڭىرگە تانىمال سۋرەتشىلەردىڭ جەكە كورمەلەرىنىڭ جوعارى دەڭگەيدە ءوتۋى دە جوعارىداعى سوزىمىزگە دالەل بولا الادى.
ال جىل سوڭىنداعى كورمەدە كەلۋشىلەر نازارىنا 80-نەن استام جۇمىس ۇسىنىلدى. ەكسپوزيتسيادا بۇگىنگى سۋرەتشىلەرىمىزدى تولعاندىراتىن ءارتۇرلى تاقىرىپتارداعى جانە ءتۇرلى جانرلارداعى تۋىندىلار بار. سونىمەن قاتار اتالعان كورمەنىڭ تانىمال قىلقالام شەبەرلەرى مەن جاس سۋرەتشىلەردىڭ, وقىتۋشىلاردىڭ جانە ولاردىڭ بۇرىنعى ستۋدەنتتەرىنىڭ باسىن قوسقانىن ايتقان ءلازىم.
– بۇل كورمە ماعان تاقىرىپتىق ەمەستىگىمەن ۇنايدى. مۇندا ناقتى ءبىر تاقىرىپ جوق. اۆتورلاردى كوبىنە ادامنىڭ ءوزى, ونىڭ ىشكى جان دۇنيەسى, رۋحاني بولمىسى قىزىقتىرادى. ءدال وسى كۇيدى بىزگە قۋات اسقاروۆ, ولەگ دروزدوۆ, گالينا كولومەنسكايا, ءماديحان قالماحانوۆ كورسەتە الدى, – دەپ اتاپ ءوتتى ونەرتانۋشى ناتاليا يۆانينا.
قورىتا ايتقاندا, ەسەپتىك كورمەدەگى ءبىر جىلدى تۇيىندەگەن تۋىندىلار قاراعاندىلىق سۋرەتشىلەردىڭ قازىرگى قوعامدا بولىپ جاتقان ءتۇرلى وقيعالاردى, ادامداردى نە نارسەلەردىڭ تولعاندىراتىنىن, ءبىزدىڭ تۇسىنىگىمىزدىڭ رۋحاني تۇرعىدا قانشالىقتى تولىققاندىعىن تانىپ-بىلۋگە قۇشتار ەكەندىگىن كورسەتتى.
قايرات ءابىلدا,
«ەگەمەن قازاقستان»
قاراعاندى