جۇرتشىلىق كوبىنە جەدەل جاردەم قىزمەتىنىڭ جۇمىسىنا كوڭىلى تولماي, شاقىرتۋلارعا سالا قىزمەتكەرلەرىنىڭ كەشىگىپ جەتەتىندىگى تۋرالى سىن ايتاتىن. سوڭعى ۋاقىتتا وسى ورنى تولماس ولقىلىقتاردى بولدىرماس ءۇشىن دەنساۋلىق ساقتاۋ مەكەمەلەرى ءتۇرلى جاقسى جوبالاردى قولعا الا باستادى.
مىنە, سونداي يگىلىكتى باستامانى شىمكەنتتەگى جەدەل جاردەم قىزمەتى العاشقىلاردىڭ ءبىرى بولىپ قولعا الدى. ەندى مۇنان بىلاي «103» بىرىڭعاي بايلانىسىنداعى قىزمەتكەرلەر 100 پايىز ساندىق جۇيەگە كوشىپ, سمارتفونمەن قامتىلدى. ءبىر سوزبەن, مەديتسينالىق قىزمەتتەر ەلەكتروندى جۇيەگە كوشتى.
وسى ارقىلى جەدەل جانە شۇعىل مەديتسينالىق جاردەم بريگاداسىن شاقىرتۋ كارتاسىن, ۋچاسكەلىك دارىگەردىڭ دابىل قاعازىن جانە جەدەل مەديتسينالىق جاردەم ستانتسياسىنىڭ ىلەسپە پاراعىن سمارتفونعا ەنگىزەتىن بولدى. بۇل دەگەنىمىز جەدەل قىزمەت كورسەتەتىن بريگادالار ورتالىق ستانساعا كەلمەي-اق قولىنداعى سمارتفون ارقىلى تىكەلەي شاقىرتۋعا بارا الادى. وسىنىڭ ارقاسىندا مەديتسينا قىزمەتكەرلەرى اۋەلى ۋاقىت ۇنەمدەلسە, ەكىنشىدەن قاعازباستىلىقتان قۇتىلادى.
«مەملەكەت باسشىسى نۇرسۇلتان نازارباەۆتىڭ قازاقستان حالقىنا جولداۋىندا بەرىلگەن تاپسىرمالاردىڭ ءبىرى - 2019 جىلدىڭ 1 قاڭتارىنان باستاپ مەديتسينا سالاسى قاعازسىز قۇجات اينالىمىنا كوشۋ بولاتىن. سونداي-اق جولداۋدا دەنساۋلىق ساقتاۋ سالاسىنىڭ ماماندارىنا اقپاراتتىق جۇيەلەردى بىرىكتىرۋ, موبيلدىك تسيفرلىق قوسىمشالاردى قولدانۋ, ەلەكتروندىق دەنساۋلىق پاسپورتىن ەنگىزۋ, قاعاز قولدانبايتىن اۋرۋحاناعا كوشۋ ارقىلى مەديتسينالىق كومەكتىڭ قولجەتىمدىلىگى مەن تيىمدىلىگىن ارتتىرۋ قاجەت, دەگەن مىندەت جۇكتەگەن بولاتىن. مەملەكەت باسشىسىنىڭ تاپسىرماسىن باستى نازارعا الا وتىرىپ, شىمكەنت قالاسىنىڭ جەدەل جاردەم ستانتسياسى العاشقىلاردىڭ ءبىرى بولىپ قاعازسىز جۇمىس جاساۋعا كوشتى. ەندى جەدەل جاردەم قىزمەتكەرلەرى بۇرىنعىداي قاعاز تولتىرمايدى», دەيدى قالالىق دەنساۋلىق ساقتاۋ باسقارماسىنىڭ باسشىسى نۇرلان قاسىموۆ.
قازىرگى تاڭدا ميلليوندى شاھار تۇرعىندارىنا 81 جەدەل جاردەم بريگاداسى قىزمەت كورسەتەدى. بارلىق جەدەل جاردەم بريگادالارى سمارتفومەن قامتىلعان. كۇنىنە قالا بويىنشا ورتاشا ەسەپپەن 15000-16000 شاقىرتۋ تۇسەدى. ورتالىققا كەلىپ تۇسكەن قوڭىراۋلاردىڭ 20 پايىزى 4 -ءشى ساناتتاعى شاقىرتۋ بولعاندىقتان, مەكەن-جايى بويىنشا ەمحانالارعا تىكەلەي جولدانادى, دەيدى سالا جاۋاپتىلارى.
ايتا كەتەرلىگى, قالاداعى جەدەل جاردەم مەكەمەلەرىنىڭ ورتالىعىندا Call Center جۇمىس ىستەيدى. وسى ورتالىق ارقىلى جەدەل جاردەم كولىگىنىڭ قاي ماڭدا جۇرگەنىن, ناقتى مەكەن-جايعا نەشە ۋاقىتتا جەتكەنىن ارنايى قۇرىلعىنىڭ كومەگىمەن باقىلاپ وتىرۋعا بولادى. عيماراتتاعى ۇلكەن ەكراننان بريگادالاردى دا قاداعالاۋعا مۇمكىندىك بار.
نۇرشات توكەن,
«ەگەمەن قازاقستان»