ەلىمىزدەگى ەڭ ەلەۋلى جوعارى وقۋ ورىندارىنىڭ ءبىرى – م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى. اتالعان وقۋ ورنىنىڭ قازاق حيميا تەحنولوگيالىق ينستيتۋتى كەزىنەن بەرى سانالى عۇمىرىن وقىتۋشىلىققا, عىلىمعا جانە عىلىمي جەتەكشىلىككە, جاستار تاربيەسىنە قالتقىسىز جۇمساپ كەلە جاتقان قۇرمەتتى ۇستازدىڭ ءبىرى ءارى بىرەگەيى – تەحنيكا عىلىمدارىنىڭ دوكتورى, پروفەسسور, قازاقستان ۇلتتىق ينجەنەرلىك اكادەمياسىنىڭ اكادەميگى شاياحمەت مولدابەك ۇلى مولدابەكوۆ. بيىك پاراساتىمەن, شىنايى ىسكەرلىگىمەن, ونەگەلى ومىرىمەن وزگەلەرگە ۇلگى بولىپ جۇرگەن بەلگىلى تۇلعا بۇگىندە سەكسەننىڭ سەڭگىرىنە اياق باستى.
بىزگە 1969-2002 جىلدارداعى كازحتي-ءدىڭ بەيورگانيكالىق زاتتاردىڭ حيميالىق تەحنولوگياسى ماماندىعى تۇلەكتەرىنە شاياحمەت مولدابەك ۇلىمەن تانىسۋدىڭ ءساتى ديپلومدىق جوبالار مەن جۇمىستار دايىنداۋ كەزىندە ءتۇستى. ءجۇرىسى شيراق ءارى العىر جاس ماماننان كەمەلدەنگەن, بەدەلدى, تاجىريبەلى ۇلاعاتتى ۇستازعا اينالعان عالىم كافەدرا تۇلەكتەرىن ماماندانۋعا, عىلىمعا بەيىمدەلۋگە تومەنگى كۋرستان باستاپ باعىتتاي وتىرىپ, العاشقى ساتتەن-اق وزىنە باۋراپ العان ەدى. ونىڭ اشىق, تۇسىنىكتى, مونشاقتاي قولتاڭباسىمەن تۇزەتىلگەن پاراقتارىمىزدى, سىزبالارىمىزدى, جازبالارىمىزدى قايتىپ العاندا ولجالى بولعانداي شابىتتانىپ قالۋشى ەدىك. سول ستۋدەنتتىك كەزدەر, سونداعى ۇستازعا دەگەن شىنايى ريزالىق سەزىم ارقايسىمىزدىڭ ءالى دە جادىمىزدا.
ماسكەۋ حيميالىق ماشينا جاساۋ جانە تىڭايتقىش پەن ينسەكتوفۋنگيتسيد عىلىمي-زەرتتەۋ ينستيتۋتتارىنىڭ تۇلەگى, اسپيرانتى, تەحنيكا عىلىمدارىنىڭ كانديداتى, دوتسەنت شاياحمەت مولدابەك ۇلىنىڭ ىسكەرلىك قابىلەتى مەن بىلىكتىلىگى سول كەزدەگى ينستيتۋت جەتەكشىلەرى تاراپىنان دا ورىندى ەسكەرىلىپ, ول 1970-1980 جىلدار ارالىعىندا قازاق حيميا تەحنولوگيالىق ينستيتۋتىنىڭ كافەدرا مەڭگەرۋشىسى, عىلىمي جۇمىس جونىندەگى پرورەكتورى قىزمەتتەرىن ابىرويمەن اتقاردى, حيميا, تەحنيكالىق, تەحنولوگيالىق عىلىمداردىڭ دامۋىنا, ينستيتۋتتىڭ رەسپۋبليكا, وداق شەڭبەرىندە تانىلۋىنا ەلەۋلى ۇلەس قوستى. وسى كەزەڭدە شىمكەنت, تاراز جانە تاعى باسقا وڭىرلەردەگى سالالىق وندىرىستەر مەن باسقا دا مەكەمەلەر جاس ماماندارىن, ياعني ينستيتۋت تۇلەكتەرىن ءوز قامقورلىعىندا ۇستاپ, باعىت بەرىپ وتىردى. وسىنداي بولاشاقتى بولجاعان ۇتىمدى ءىس-ارەكەتتىڭ ناتيجەسى بولار, بۇگىندە ينستيتۋت تۇلەكتەرى ەلىمىزدەگى بارلىق سالالىق وندىرىستەردىڭ باس ماماندارى مەن جەتەكشىلەرى رەتىندە ەڭبەك ەتۋدە. م.اۋەزوۆ اتىنداعى وقمۋ-دە, ەلىمىزدىڭ باسقا دا وقۋ ورىندارىندا قىزمەت ەتەتىنى پەداگوگ-وقىتۋشىلار, جەتەكشى ماماندار, عىلىم كانديداتتارى مەن دوكتورلارى, ۇلتتىق عىلىمي جانە ينجەنەرلىك اكادەميالار اكادەميكتەرى, اكىمدەر مەن مينيسترلەردىڭ اراسىندا قازاق حيميا تەحنولوگيالىق ينستيتۋتى تۇلەكتەرىنىڭ قاتارى مول. ولاردىڭ بارلىعى شاياحمەت مولدابەك ۇلىنا ىستىق ءىلتيپاتىن جەتكىزۋگە ءاردايىم دايىن.
شاياحمەت مولدابەك ۇلىنا 1980-1987 جىلدار ارالىعىندا كازاق حيميا تەحنولوگيالىق ينستيتۋتىنىڭ رەكتورى قىزمەتىن اتقارۋ مىندەتتەلدى. تالانتى مەن دارىنىنا كۇش-قۋاتى, العىر دا ۇشقىر وي-سەزىمى سايكەس ول تاپسىرىلعان جاۋاپتى مىندەتتى جوعارى ناتيجەمەن اتقارا ءبىلدى. ناتيجەسىندە, قازاق حيميا تەحنولوگيالىق ينستيتۋتى وداق كولەمىندە تانىلىپ, بۇكىلوداقتىق ۇزدىك, الدىڭعى شەپتەگى جوعارى وقۋ ورىندارىنىڭ قاتارىنا ەندى. ينستيتۋتتا رەسپۋبليكالىق, وداقتىق دەڭگەيدە وتەتىن ءبىلىم, عىلىم جانە جاستار تاربيەسىنە بايلانىستى جالپىلاما ماجىلىستەر مەن كەڭەستەر ۇيىمداستىرىلىپ, زاماناۋي وزەكتى ماسەلەلەر شەشىمىن تاۋىپ جاتتى. وقۋ ورنى قۇرامىندا جاڭا ماماندىقتار اشىلدى, شەتەلدىك جانە وداقتاعى جەتەكشى جوعارى وقۋ ورىندارىمەن بايلانىس نىعايدى, جاڭا وقۋ عيماراتتارى, ستۋدەنتتەر جاتاقحانالارى, اسحانالار, ۇجىمدىق پروفيلاكتوريا, سپورت كەشەندەرى, دەمالىس مەكەندەرى مەن جىلىجايلار, سۋبۇرقاق ىسكە قوسىلدى, جاس وقىتۋشىلار باسپانامەن قامتاماسىز ەتىلدى. وسىنداي قىرۋار ماڭىزدى ىستەرمەن قاتار رەكتورلىق مىندەتتى ورىنداۋدا عىلىمي شىعارماشىلىق باعىتتارعا, وقىتۋشى-پەداگوگتەر قۇرامىنىڭ ساپاسىن ارتتىرۋعا باستى نازار اۋداردى. وقىتۋشىلار قاتارى عىلىم كانديداتتارى مەن دوكتورلارىمەن تولىقتىرىلا باستادى. سولاردىڭ ءبىرى رەتىندە ماسكەۋ حيميا تەحنولوگيالىق ينستيتۋتىندا 1984 جىلى دوكتورلىق ديسسەرتاتسياسىن ويداعىداي قورعاپ, تەحنيكا عىلىمدارىنىڭ دوكتورى دارەجەسى مەن پروفەسسور اتاعىن يەلەندى.
شاياحمەت مولدابەك ۇلى بۇگىندە قازاقستان ۇلتتىق ينجەنەرلىك اكادەمياسىنىڭ اكادەميگى, عىلىم مەن تەحنيكا سالاسىنداعى مەملەكەتتىك سىيلىقتىڭ لاۋرەاتى, جوعارى وقۋ ورىندارىنىڭ ۇزدىك وقىتۋشىسى, وڭتۇستىك قازاقستان وبلىسىنىڭ (قازىرگى تۇركىستان وبلىسى) ۇزدىك عالىمى, ۋنيۆەرسيتەتىمىزدەگى بەيورگانيكالىق زاتتاردىڭ حيميالىق تەحنولوگياسى عىلىمي ورتالىعىنىڭ ديرەكتورى, يناباتتى ۇل-قىزدار ءوسىپ-ونگەن وركەندى دە, ونەگەلى اۋلەتتىڭ باس يەسى, نەمەرە مەن شوبەرەلەرىنىڭ جاعاسى جايلاۋ, قۇشاعى قويناۋ قازىنالى قارتى.
ۇلاعاتتى ۇستازدىڭ قاجىر-قايراتى ءالى دە ءبىلىمدى دە بىلىكتى ماماندار مەن عالىمدار دايىنداۋدا, كافەدرا, جوعارى مەكتەپ, ۋنيۆەرسيتەت جانە ءوڭىر مەن ەگەمەن ەلىمىزدىڭ جەتىستىكتەرىن ەسەلەۋگە, جاڭا جەمىستى ناتيجەلەرگە جەتۋگە ۇلەس قوسا بەرۋگە جەتەلەسىن, جانى جايساڭ, ءجۇزى جارقىن, شاپاعاتى مول, بەرگەنىنەن بەرەرى مول شاياحمەت مولدابەك ۇلىنىڭ دەنىنە ساۋلىق, بويىنا كۇش-قۋات قۇيىلىپ, شامشىراقتاي الداعى بۋىننىڭ دا تاربيەسىنە شۋاعىن شاشا بەرۋىنە تىلەكتەسپىز.
ۇيلەسبەك بەستەرەكوۆ,
تەحنيكا عىلىمدارىنىڭ دوكتورى, م.اۋەزوۆ اتىنداعى وقمۋ پروفەسسورى, ءبىلىم بەرۋ ءىسىنىڭ قۇرمەتتى قىزمەتكەرى,
ايداربەك بولىسبەك,
تەحنيكا عىلىمدارىنىڭ كانديداتى, م.اۋەزوۆ اتىنداعى وقمۋ حيميالىق ينجەنەريا جانە بيوتەحنولوگيا جوعارى مەكتەبىنىڭ دەكانى