ۋاقىتتىڭ زاماناۋي سىن-تەگەۋرىندەرى, كاسىبي ءبىلىم مەن داعدىلاردىڭ ۋاقىت تالابىنا ىلەسە الماۋى پەداگوگيكالىق كادرلاردى كاسىبي دامىتۋدىڭ تۇجىرىمدامالىق نەگىزدەرىن قايتا قاراستىرۋدى تالاپ ەتەدى. بۇعان دەيىنگى بىلىكتىلىكتى ارتتىرۋ جۇيەسى جۇمىسىن ۇزاق ۋاقىت بويى وزگەرىسكە ۇشىراماي جۇرگىزىلىپ كەلدى, وسىنىڭ سالدارىنان ول پەداگوگتەردىڭ كاسىبي دەڭگەيىنىڭ دامۋىنا وڭ اسەر ەتە العان جوق.
بىلىكتىلىكتى ارتتىرۋ جۇيەسىنىڭ جاڭا فورماتىن جاساۋ جاعدايىندا 2011 جىلى پەداگوگتەردىڭ كاسىبي دامۋ جۇيەسىنە الەمدىك تاجىريبەنى, ۇزدىك حالىقارالىق تاجىريبەنى جانە قازاقستاندىق مەكتەپتەردىڭ قاجەتتىلىكتەرىن ەسكەرىپ, يننوۆاتسيا ەنگىزەتىن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ پەداگوگيكالىق شەبەرلىك ورتالىعى (ورتالىق) جۇمىس ىستەي باستادى.
كەمبريدج ۋنيۆەرسيتەتىنىڭ ءبىلىم بەرۋ فاكۋلتەتىمەن ستراتەگيالىق سەرىكتەستىك بارىسىندا 2011-2012 جىلدارى ءۇش دەربەس, مۇعالىمدەردى دايارلاۋدىڭ ءبىر-بىرىمەن بايلانىستى دەڭگەيلەرىنەن تۇراتىن, سول ۋاقىتتا سەرپىلىس بولىپ تانىلعان پەداگوگتەردى كاسىبي دامىتۋدىڭ كۋرستارى ازىرلەنىپ, ەنگىزىلدى. قازاقستاندا جانە باسقا ەلدەردە «دەڭگەيلى» دەگەن اتپەن بەلگىلى بۇل كۋرستار 2012 جىلعى ءساۋىر ايىندا باستالدى جانە پەداگوگيكا, ديداكتيكا, وقۋ جانە وقىتۋ ۇدەرىسىن باعالاۋ مەن باسقارۋ سالالارىنداعى زاماناۋي عىلىمي نەگىزدەلگەن ۇدەرىستەرگە سايكەس مۇعالىمدەردىڭ مەتاپاندىك بىلىمدەرى مەن داعدىلارىن دامىتۋعا باعىتتالدى.
2013 جىلى قازاقستان رەسپۋبليكاسى جالپى ءبىلىم بەرۋ ۇيىمدارى باسشىلارىنىڭ بىلىكتىلىگىن ارتتىرۋدىڭ توعىز ايلىق كۋرستارى باستالدى. كۋرس باعدارلاماسى باسقارۋ مادەنيەتى مەن مەكتەپتى دامىتۋدى جەتىلدىرۋگە باعىتتالدى. قازىرگى كەزدە كۋرستىق وقىتۋدان وتكەن پەداگوگتەردىڭ اراسىندا كۋرستان كەيىنگى كەزەڭدە ادىستەمەلىك قولداۋ كورسەتەتىن پەداگوگيكالىق قوعامداستىق قۇرىلدى. 2012 جىلدان باستاپ دەڭگەيلى كۋرستاردا 70 مىڭنان استام پەداگوگ نەمەسە قازاقستاننىڭ ءاربىر بەسىنشى مۇعالىمى وقىپ شىقتى, 5000-نان استام مەكتەپ باسشىلارى مەنەدجمەنت جانە كوشباسشىلىق بويىنشا ۇزاقمەرزىمدى وقىتۋدان ءوتتى.
جالپى ايتقاندا, ورتالىق بىلىكتىلىكتى ارتتىرۋ بويىنشا 130-دان استام اۆتورلىق ءبىلىم بەرۋ باعدارلاماسىن ازىرلەدى. ولاردى ىسكە اسىرۋ ءۇشىن سەرتيفيكاتتالعان ترەنەرلەر كلاستەرى دايارلانىپ, 300 مىڭنان استام پەداگوگ قىزمەتكەر وقىتىلدى.
ءبىلىم بەرۋ باعدارلامالارىن ازىرلەۋ جانە جۇزەگە اسىرۋ ساپانى باعالاۋدىڭ ىشكى مونيتورينگىلىك راسىمدەۋلەرى ارقىلى بەرىلەدى. سونىمەن قاتار ورتالىقتىڭ قىزمەتىنىڭ باسىم باعىتتارىنىڭ ءبىرى بولىپ سانالاتىن عىلىمي زەرتتەۋلەردىڭ ناتيجەلەرىمەن ۇشتاسادى. وسى رەتتە 2014 جىلى ورتالىق كەمبريدجبەن بىرلەسىپ ازىرلەگەن باعدارلامالارىنا مونيتورينگ جانە ەۆاليۋاتسيا جاساۋ جونىندەگى زەرتتەۋ جۇرگىزىلدى. جۇرگىزىلگەن زەرتتەۋدىڭ ناتيجەلەرى «پەداگوگيكالىق شەبەرلىك ورتالىعى باعدارلامالارىنىڭ مونيتورينگىسى جانە ەۆاليۋاتسياسى» دەپ اتالاتىن تالداۋ ەسەبىندە جانە حالىقارالىق رەتسەنزيالانعان جۋرنالدا جاريالاندى. ولار مەكتەپ قىزمەتىنىڭ مادەنيەتىندە, مۇعالىمدەردىڭ سىنىپتا ساباق بەرۋ تاجىريبەسىندە, قازاقستاندىق مەكتەپ وقۋشىلارىنىڭ ىنتاسى مەن وقۋ جەتىستىكتەرىندە كورىنىس تاباتىن وزگەرىستەر مەن ولاردىڭ ساپاسىن ارتتىرۋدى دالەلدەۋ جۇيەسىن بىلدىرەدى. زەرتتەۋگە قاتىسۋشىلاردىڭ ءبىرى بىلاي دەيدى: «دەڭگەيلى باعدارلامالاردىڭ اسا ماڭىزدى قۇراۋشىسى مۇعالىمدەردىڭ وقۋشىلاردى وقىتۋعا دەگەن قارىم-قاتىناسىنىڭ وزگەرۋى, ءححى عاسىر داعدىلارىن قالىپتاستىرۋ شارتى رەتىندە وقۋشىلاردىڭ وقۋعا دەگەن ىنتاسىن, ال مۇعالىمدەردىڭ وقىتۋعا دەگەن ىنتاسىن ارتتىرۋ ەكەنىن كورسەتتى».
2015 جىلدان بەرى ورتالىق ساباقتى زەرتتەۋدىڭ بۇكىلالەمدىك قاۋىمداستىعىنىڭ (WALS) مۇشەسى بولىپ تابىلادى. ورتالىق قىزمەتكەرلەرى جالپى ءبىلىم بەرەتىن مەكتەپ مۇعالىمدەرىمەن بىرگە زەرتتەۋلەر جۇرگىزەدى, تانىستىرىلىم ازىرلەيدى جانە ولاردى ۇسىنۋ ءۇشىن جىل سايىنعى WALS كونفەرەنتسيالارىنا قاتىسادى. قازاقستاننىڭ ءبىلىم بەرۋ جۇيەسى مەن مۇعالىمدەردىڭ بىلىكتىلىگىن ارتتىرۋىنا الەم بولىپ قىزىعۋشىلىق تانىتىپ وتىر. 2018 جىلى ورتالىق ءبىلىم بەرۋ قىزمەتتەرىن شەتەلدەرگە شىعارۋ بويىنشا ءوز جۇمىسىن باستادى. بۇل باستاماعا قىزمەتتەردى شەتەلدەردە ىلگەرىلەتۋگە كورسەتىلەتىن قىزمەتتىڭ ساپاسىن راستاۋ مۇمكىندىگى دە كىرەدى. وسىعان وراي ءوزىن ءوزى باعالاۋ مەن ودان ءارى دامىتۋدىڭ باعىتتارىن انىقتاۋ ءۇشىن دە 2018 جىلعى مامىر ايىندا ورتالىق ءوز الدىنا جاڭا مىندەتتەر قويدى. بۇل – ءبىلىم بەرۋ باعدارلامالارىن حالىقارالىق ستاندارتتارعا سايكەس سەرتيفيكاتسيالاۋ.
سەرتيفيكاتتاۋ ۇدەرىسىنىڭ ماڭىزدى قۇراۋشىسى – ۇيىمنىڭ ءوزىن ءوزى ستاندارتتارعا سايكەس باعالاۋى, ودان سوڭ حالىقارالىق ساراپشىلار توبى باعدارلاما مەن فورمانى زەردەلەپ, باعدارلامالاردىڭ ستاندارتتارعا سايكەستىگىنە ساراپتامالىق قورىتىندى بەرەدى.
قازىرگى ۋاقىتتا مۇعالىمدەر مەن مەكتەپ باسشىلارىنىڭ بىلىكتىلىگىن ارتتىرۋ بويىنشا جوعارىدا اتالعان باعدارلامالاردىڭ حالىقارالىق سەرتيفيكاتسياسىنا تولىق راستاۋ الىندى. ورتالىق ءاربىر باعدارلامانىڭ ستاندارتى بويىنشا تولىق سايكەستىككە قول جەتكىزدى. ساراپشىلاردىڭ ايتۋىنشا, اتالعان باعدارلامالار مازمۇنى مەن ۇيىمداستىرىلۋى بويىنشا تەك قازاقستاندا عانا ەمەس, بارلىق ورتالىق ازيادا بىرەگەي بولىپ تابىلادى. مىنە, بيىل «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنا 10 جىل تولدى جانە بۇل ايتۋلى وقيعا بارلىق وڭىرلەردە اتالىپ وتۋدە. سونىمەن قاتار پەداگوگيكالىق شەبەرلىك ورتالىعىنىڭ قۇرىلعانىنا دا 7 جىل تولىپ وتىر. جەمىستى جەتىستىك قاشان دا ەتكەن ەڭبەك, توگىلگەن تەرمەن كەلەدى ەمەس پە؟! وسىناۋ ۋاقىت كوشىندە بىرگە اتقارىلعان جۇمىس ناتيجەلەرى ەلىمىزدىڭ ءبىلىم بەرۋ جۇيەسىندە كەڭىنەن قولدانىلىپ, شەتەلدەردە تانىلۋدا. بۇل ءبارىمىزدى جىگەرلەندىرەدى جانە جاڭا بەلەستەردى باعىندىرۋعا, ءبىلىم بەرۋ جۇيەسىن ودان ءارى دامىتۋعا جۇمىلدىرادى.
ءمادينا تىنىباەۆا,
PhD, «نازارباەۆ زياتكەرلىك مەكتەپتەرى» دببۇ پەداگوگيكالىق شەبەرلىك ورتالىعىنىڭ ءبىلىم بەرۋ باعدارلامالارى جانە حالىقارالىق ىنتىماقتاستىق جونىندەگى ديرەكتورىنىڭ ورىنباسارى