ەركىن كۇرەستەن الەم كۋبوگى ياكۋتسكىدە وتەدى

اراعا جەتى جىل سالىپ, الەم كۋبوگى رەسەيدە وتەتىن بولدى. بۇل جاڭالىقتى ءبىز قۋانا-قۋانا قابىلدادىق. ونىڭ ۇستىنە رەسەي قۇراماسى سوڭعى جەتى جارىستا باس جۇلدەگە قول جەتكىزە الماعان ەدى. ءبىزدىڭ بالۋاندار سول ولقىلىقتىڭ ورىنىن ياكۋتسكىدە تولتىرادى دەگەن ويدامىز, – دەيدى رەسەي سپورتتىق كۇرەس فەدەراتسياسىنىڭ پرەزيدەنتى ميحايل مامياشۆيلي.

الەم كۋبوگىندا التى كوماندا باق سىنايدى. دۇنيەجۇزىنىڭ ۇزدىك بەس ۇلتتىق قۇرامالارىنان بولەك, ايتۋلى دودانىڭ جولداماسىنا يەلىك ەتە الماعان مەملەكەتتەر اراسىنان ەڭ مىقتى بالۋاندار ىرىكتەلىنىپ الىنىپ, ولار دەربەس كوماندا بولىپ بوز كىلەمگە شىعادى. ال 2018 جىلى بۋداپەشتە وتكەن الەم چەمپيوناتىنىڭ قورىتىندىسى بويىنشا رەسەي, اقش, گرۋزيا, كۋبا جانە جاپونيا قۇرامالارى وزىق بەستىكتىڭ قاتارىنان كورىنگەن بولاتىن.   

ايتۋلى جارىس 1956 جىلدان بەرى 48 مارە ۇيىمداستىرىلدى. ءبىر عاجابى, كسرو ىدىرىعانعا دەيىن الەم كۋبوگىندا ۇستەمدىك قۇردى. 1956-1991 جىلى ارالىعىندا وتكەن 21 ءتۋرنيردىڭ 16-سى وداق بالۋاندارىنىڭ جەڭىسىمەن اياقتالدى. سول ارالىقتا اقش – 4 رەت جانە تۇركيا ءبىر رەت توپ جاردى. ودان كەيىنگى ۋاقىتتا تاعى ءتورت ەلدىڭ ورەندەرىنە التىن تۇعىرعا كوتەرىلۋ باقىتى بۇيىردى. ال بارلىعى باس جۇلدەنى ولجالاعان مەملەكەتتەر مىنالار:

كسرو – 16 رەت

اقش – 14 رەت

يران – 8 رەت

رەسەي – 6 رەت

ءازىربايجان – 2 رەت

تۇركيا – 1 رەت

كۋبا – 1 رەت       

سوڭعى جارىستىڭ جالاۋى ۇستىمىزدەگى جىلدىڭ 7-8 ءساۋىرى ارالىعىندا اقش-تىڭ ايوۆا سيتي قالاسىندا جەلبىرەگەن بولاتىن. ءدۇبىرلى دودادا بوز كىلەم قوجايىندارى توپ جاردى. فينالدا ولار ءازىربايجان قۇراماسىن 6:4 ەسەبىمەن ەڭسەردى. ءۇشىنشى ورىن ءۇشىن تالاس تا ءدال سونداي ەسەپپەن اياقتالدى. بۇل تارتىستا جاپونيا كۋبانى قاپى قالدىردى. بەسىنشى ورىن ءۇشىن باسەكەدە گرۋزيا موڭعوليادان 6:4 ەسەبىمەن باسىم ءتۇستى. قازاقستان قۇراماسى اقش-تاعى الەم كۋبوگىن جەتىنشى ورىنمەن قورىتىندىلادى. سوڭعى سايىستا وتانداستارىمىز ءۇندىستاندى 10:0 ەسەبىمەن تاس-تالقان ەتتى.

عالىم سۇلەيمەن,

«ەگەمەن قازاقستان»