كوك تەڭىزدىڭ اتىن يەلەنگەن اقتاۋلىق فۋتبول كومانداسى وزىندىك ويىن ورنەگىن كورسەتىپ جۇرگەن توپتىڭ ءبىرى. جەلكىلدەگەن جاستاردان قۇرالعان ءارى بيىل جوندەۋدەن وتكەن ستاديوندا ويىن وتكىزۋگە مۇمكىندىك العان توپ ەندىگى كەزەكتە پرەمەر-ليگاعا شىعۋدى جوسپارلاپ وتىر.
فۋتبول كلۋبىنىڭ باسشىلىعى مەن باپكەرلەر قۇرامى فۋتبول ماۋسىمىنىڭ قورىتىندىلارى مەن الداعى جوسپارلارى تۋرالى باياندادى. «كاسپي» فۋتبول كلۋبى «ارسەنال كيەۆ» كومانداسىمەن مەموراندۋمعا قول قويىپ, بۇگىندە ماڭعىستاۋلىق ەكى ويىنشى ۋكراينالىق فۋتبول كلۋبىندا تاجىريبەدەن وتۋدە.
فۋتبول – جاستاردىڭ قىزىعۋشىلىعىنا يە جانە جالپىعا بارىنشا قولجەتىمدى ويىن ءتۇرى, قالادا ءۇي ماڭىنداعى ويىن الاڭدارىندا اسىر سالعان, اۋىلدا تەگىس جەردى تاۋىپ الىپ فۋتبول ويىنىن قىزدىرعان بالالاردى دا, ەرەسەكتەردى دە ءجيى كەزدەستىرەتىنىمىز بار. اتالمىش فۋتبول كلۋبى جاستار اراسىندا فۋتبول سپورتىن كەڭىنەن ناسيحاتتاۋ ءارى جاستاردى فۋتبولعا كاسىبي تۇرعىدا دايىنداۋ ماقساتىندا اشىق ەسىك كۇندەرىن وتكىزدى. وعان 300 جاس سپورتشى قاتىسىپ, فۋتبول الەمىنىڭ سىرلارىنا قانىعا ءتۇستى, سونداي-اق بالالار اراسىندا «Caspy Cup» ءتۋرنيرى وتكىزىلدى. جۇرگىزىلگەن جۇمىستار ناتيجەسىندە فۋتبول ورتالىقتارى مەن اكادەميالار اراسىندا وتكەن قازاقستان بىرىنشىلىگىنىڭ اقتىق سايىسىندا جاس ماڭعىستاۋلىقتار 3-ورىندى جەڭىپ الدى. سونىمەن قاتار بيىل جوندەۋدەن وتكەن «جاس قانات» ستاديونىندا العاش رەت «كاسپي» فۋتبول كلۋبى ءوز الاڭىندا «قايرات ا» كومانداسىمەن ويىن وتكىزىپ, ويىنعا 3200 كورەرمەن قاتىستى.
– ءارتۇرلى جاعدايلارعا بايلانىستى كورەرمەندەر سانىنىڭ كوپ بولۋى 2001 جىلدان بەرى بولماعان ەدى. ويىندى تاماشالاۋشىلاردىڭ كوپ بولۋى دا فۋتبولشىلار ءۇشىن ماڭىزدى. ناتيجەسىندە «كاسپي» فۋتبول كومانداسى كورەرمەندەردىڭ ويىنعا كەلۋى جاعىنان ءبىرىنشى ليگا كوماندالارى اراسىندا 2-ورىندى الدى, – دەيدى «كاسپي» فۋتبول كلۋبىنىڭ دامۋ بويىنشا مەنەدجەرى ۆلاديمير ريبيچ.
«كاسپي» فۋتبول كلۋبى باسشىلىعىنىڭ بولاشاققا مەجەلەگەن جوسپارلارى زور. ولار ءۇشىن الدىنا قويعان بيىك ماقساتتارعا جەتۋ ءۇشىن مامانداردىڭ بىلىكتىلىگىن ارتتىرۋ – نەگىزگى باسىم باعىتتاردىڭ ءبىرى. سوندىقتان كلۋبتىڭ جاڭا باسشىلارى بيىل ماڭعىستاۋلىق فۋتبول كلۋبىنا كەلگەن شەتەلدىك مامانداردىڭ اتسالىسۋىمەن جەرگىلىكتى مامانداردىڭ بىلىكتىلىگىن ارتتىرۋدى كوزدەپ وتىر.
كلۋب باسشىلىعىنىڭ ايتۋىنشا, اقتاۋعا قوسىمشا تاعى ءبىر ستاديون مەن جاتتىعۋ ءۇشىن فۋتبول بازاسى جانە فۋتبول سپورتىن ودان ءارى ناسيحاتتاۋ ءۇشىن ماركەتينگتىك جۇمىس قاجەت. سونداي-اق 2018 جىلدىڭ اياعىنا دەيىن ماڭعىستاۋ وبلىسىنىڭ بالالار قۇراماسىن قۇرىپ, بارلىق جاتتىقتىرۋشىلار ءۇشىن سەمينار وتكىزىپ, بالالارعا ارنالعان «بولاشاق چەمپيوندار ليگاسىن» ۇيىمداستىرىپ, مەكتەپ وقۋشىلارىنا ارناپ پرومو-اكتسيالار ۇيىمداستىرۋدى كوزدەپ وتىر.
ۇلكەن مەن كىشىنىڭ ىقىلاسى اۋعان سپورت ءتۇرى ناسيحاتىن جانداندىرىپ, ءوز سپورتشىلارىن, اسىرەسە بالالاردى الاڭعا شاقىرسا باس تارتاتىنى بولماسى انىق.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى