شىمكەنتتە جەدەل جاردەم كورسەتەتىن 3 جاڭا بەكەت اشىلدى. شاعىناۋدانداردا ورنالاسقان بۇل بەكەتتەردە 24 بريگادا حالىققا جەدەل مەديتسينالىق كومەك بەرەدى.
جاڭا بەكەتتەردىڭ قاجەتتىلىگىن سالا ماماندارى تۇرعىنداردىڭ شاقىرۋلارى مەن شاعىمدارىن ەسەپكە الا وتىرىپ انىقتاعان. زەرتتەۋ قورتىندىسى بويىنشا شاھارداعى حالىق تىعىز ورنالاسقان قايتپاس-2, ايقاپ جانە قاراباستاۋ شاعىناۋداندارىندا ءۇش بەكەتتىڭ عيماراتى بوي كوتەردى. ناتيجەسىندە جەدەل جاردەم بريگادالارىنىڭ ناۋقاستارعا جەتۋ ۋاقىتى ازايادى, دەيدى دەنساۋلىق ساقتاۋ مەكەمەسىنىڭ وكىلدەرى.
نىسانداردىڭ اشىلۋ سالتاناتىنا قالالىق دەنساۋلىق ساقتاۋ باسقارماسىنىڭ باسشىسى نۇرلان قاسىموۆ قاتىسىپ, سۋ جاڭا بەكەتتەردىڭ تۇرعىندارعا ەم-دوم كورسەتۋگە قانشالىقتى دايىن ەكەندىگىن تەكسەردى.
مۇنان بىلاي باسى اۋىرىپ, بالتىرى سىزداعاندارعا جەدەل جاردەم بريگاداسى بۇرىنعىدان ەرتەرەك جەتپەك. بۇل تۋرالى اقحالاتتىلاردىڭ ءوزى كەشىگۋ ۋاقىتى ءتورت مينۋتقا قىسقارادىعىن ايتادى.
جاڭا نىساندار زاماناۋي قۇرىلعىلارمەن جابدىقتالعان. بەكەتتە ديسپەتچەرلىك بولمە, بەكەت مەڭگەرۋشىسى مەن اعا فەلدشەردىڭ كابينەتى, ءدارىحانا قويماسى, قوبديشا تولتىرۋ بولمەسى, اكت زالى مەن دەمالىس بولمەسى, كولىك تۇراعى سياقتى قاجەتتىنىڭ بارلىعى بار. ماماندار ينتەرنەت ارقىلى ناۋقاستىڭ مەكەنجايىن انىقتاپ, دياگنوزىمەن تانىسا الادى.
«بۇگىنگى تاڭدا جەدەل جاردەم قىزمەتى شاقىرتۋلارعا 10 مينۋت ىشىندە كەلۋدە. بۇرىنعىعا قاراعاندا 3-4 مينۋت جىلدام جەتۋگە مۇمكىندىك جاساپ وتىرمىز. ەگەر نورماتيۆ 10-15 مينۋت بولسا, قالالىق جەدەل جاردەم قىزمەتكەرلەرى شاقىرتۋعا 10-11 مينۋتتا جەتەتىن بولادى. حالىق سانى كوبەيىپ, قالا اۋماعى كەڭەيىپ جاتقاندىقتان, ءالى دە بەكەتتەر قاجەت. قازىرگە 81 بريگادا بار. بولاشاقتا وزگە دە مەديتسينالىق عيماراتتاردى اشامىز. جالپى تالاپ بويىنشا قالاعا 100 بريگادا قاجەت. كەلەسى جىلى سوعان جەتەمىز دەگەن جوسپار بار», دەيدى قالانىڭ باس دارىگەرى.
№1, №3, №6 بەكەتتەر قايتپاس-2, ايقاپ شاعىناۋداندارى جانە قاپال باتىر كوشەسىندە ورنالاسقان. قايتپاس-2 شاعىناۋدانىنداعى №6 بەكەتتە 10 بريگادا 150 مىڭ تۇرعىنعا مەديتسينالىق كومەك كورسەتسە, №1 بەكەتتە 6 بريگادا 9 مىڭ حالىققا, №3 بەكەتتەگى 8 بريگادا 12 مىڭ تۇرعىنعا قىزمەت كورسەتە الادى.
شاقىرتۋلارعا جالپى 24 جەدەل جاردەم بريگادالارى شىعادى. ولاردىڭ ىشىندە ينتەنسيۆتى تەراپيا بريگاداسى, جەلىلىك دارىگەرلىك بريگادا, ينتەنسيۆتى پەدياتريالىق بريگادا, جالپى پەدياتريالىق جانە فەلدشەرلىك بريگادالار بار.
باسقارما باسشىسىنىڭ ايتۋىنشا, جەدەل جاردەم قىزمەتىنىڭ ساپاسىن جاقسارتۋ ماقساتىندا تۇرىك كاسىپكەرلەرىمەن مەموراندۋم جاسالعان. سونىڭ اياسىندا كەلەسى جىلى قالاعا جاڭا 100 جەدەل جاردەم كولىگى جەتكىزىلەتىن بولادى.
نۇرشات توكەن,
«ەگەمەن قازاقستان»