كاتار استاناسى دوحادا بۇگىن كاتار حالىقارالىق كۋبوگى ءتۋرنيرىنىڭ سوڭعى كۇنى ءوتىپ جاتىر. اتالمىش تۋرنير بارلىق سالماق ءتۇرى بويىنشا وتەتىن, 2020 جىلعى وليمپيادا ويىندارىنا ليتسەنزيا بەرۋ بويىنشا ءىرى جارىستاردىڭ ءبىرى, دەپ حابارلايدى قازاقپارات.
قازاقستان رەسپۋبليكاسىنىڭ اۋىر اتلەتيكا فەدەراتسياسى ءباسپاسوز قىزمەتىنەن حابارلاعانداي, سايىستىڭ العاشقى كۇنى اۋىر اتلەتتەر فارحاد حاركي مەن ارلي چونتەي ءتورتىنشى ورىن يەلەنگەن. يگور سون بولسا قازاقستان قۇراماسىنىڭ قورجىنىنا كۇمىس مەدال سالعان.
سايىستىڭ كەشەگى قورىتىندىسى بويىنشا, نيجات راحيموۆ (73 كەلىگە دەيىنگى سالماقتا) قولا مەدال يەلەنگەن ەدى.
سونىمەن بىرگە, قوس سايىستىڭ بىرىنەن ورىن العانى ءۇشىن بەرىلەتىن «كىشى» مەدالعا ايدار قازوۆ (81 كەلىگە دەيىنگى سالماقتا, سەرپە كوتەرۋ), كارينا گوريچەۆا (64 كەلىگە دەيىنشى سالماقتا, سەرپە كوتەرۋدە) يە بولدى.
سونىمەن بىرگە, 89 كەلىگە دەيىنگى سالماقتا ونەر كورسەتكەن رۇستەم سىباي قوس سايىستىڭ قورىتىندىسى بويىنشا 8-ءشى ورىننان كورىندى.
ءتۋرنيردىڭ سوڭعى كۇنىندە جارىس الاڭىنا 2018 جىلعى الەم چەمپيوناتىنىڭ كۇمىس جۇلدەگەرى اتانعان - راۋشان مەشىتحانوۆا شىقتى. راۋشان 87 كەلىگە دەيىنگى سالماق ساناتىندا ونەر كورسەتىپ, قوس سايىستا 215 كەلىنى باعىندىردى. وسىلايشا, قازاقستان قۇراماسىنىڭ قورجىنى تاعى ءبىر كۇمىس مەدالمەن تولىقتى. ايتا كەتەرلىگى, راۋشان جۇلقا كوتەرۋدە (100 كەلىنى كوتەرىپ) ءبىرىنشى ورىننان كورىنىپ, سەرپە كوتەرۋدە (115 كەلىنى) ەكىنشى ورىندى يەلەندى.
بۇگىن جاراقات الۋىنا بايلانىستى ليتسەنزيالىق ءتۋرنيردىڭ پوموستىنا يليا يلين شىعا الماي قالعان ەدى. باپكەرلەر قۇرامى اۋىر اتلەتكە سايىسقا قاتىسۋعا رۇقسات بەرمەگەن.
ء«بىز يليانىڭ اۋىر جاراقات الۋىن بولدىرماۋ كەرەك دەپ شەشتىك. ەم جۇرگىزىلىپ, دەنساۋلىعىن قالپىنا كەلتىرۋ پروتسەسى جۇرگىزىلىپ جاتقانىنا قاراماستان, جاتتىعۋ كەزىندە ومىترتقاسى قايتا سىر بەردى. ناتيجەگە قول جەتكىزۋگە بارىنشا تىرىسۋعا بولار ەدى, بىراق ونداي جاعدايدا بەلدى ءۇزىپ الۋ قاۋپى بار-تىن. جاتتىقتىرۋشىلار شتابى ونى پوموستقا جىبەرمەۋ تۋرالى شەشىم قابىلدادى, ويتكەنى الداعى ۋاقىتتا باسىمدىققا يە باسەكەلى سايىستار بار», - دەدى اۋىر اتلەتيكادان قر ۇلتتىق قۇراماسىنىڭ باس باپكەرى يۋري مەلنيكوۆ.