اپتانىڭ سوڭعى جۇمىس كۇنى ۇلتتىق سپورت قاۋىمداستىعىنىڭ ۇيىمداستىرۋىمەن استاناداعى «قازمەديا» ورتالىعىنىڭ كونتسەرت زالىندا «التىن تۇعىر-2018» اتتى ۇلتتىق سپورت ۇزدىكتەرىن ماراپاتتاۋ سالتاناتتى كەشى ءوتتى.
ۇلتتىق سپورت سالاسىنداعى ۇزدىكتەردىڭ مەرەيىن كوتەرۋدى ماقسات تۇتقان «التىن تۇعىر» سالتاناتتى جيىنى بيىل التىنشى مارتە ۇيىمداستىرىلىپ وتىر. ءداستۇرلى ماراپاتتاۋ جيىنىنا مادەنيەت جانە سپورت ءمينيسترى ارىستانبەك مۇحامەدي ۇلى, ۇلتتىق سپورت قاۋىمداستىعىنىڭ قۇرمەتتى پرەزيدەنتى, گەنەرال-مايور قايرات ساتىبالدى ۇلى, ءماجىلىس دەپۋتاتى, ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان قاتىسىپ, ۇلتتىق سپورتتىڭ جىل ۇزدىكتەرىنە سىيلىقتار تاپسىرىپ, قۇتتىقتاۋ ءسوز سويلەدى.
ەلىمىزگە تانىمال ساحنا ساڭلاقتارىنىڭ سازدى كونتسەرتىمەن ورىلگەن بيىلعى «التىن تۇعىر» سىيلىعىنىڭ يەگەرلەرى – 2018 جىلعى ۇلتتىق سپورتتىڭ حالىقارالىق باسەكەسىندە دارا شىققان جەڭىمپازدار بولدى.ۇلتتىق سپورت تۇرلەرىنىڭ ۇزدىكتەر نوميناتسياسى بويىنشا «ۇزدىك مەرگەن» ابزال تۋلىبەكوۆ, «ۇزدىك شاباندوز» باۋىرجان مىرزاباەۆ, «ۇزدىك كوكپار كومانداسى» – «قۇلاگەر» كومانداسى, «ۇزدىك كوكپارشى» اسلانبەك سايدۋللا, «ۇزدىك اۋدارىسپاقشى» شىڭعىسحان ەرجانوۆ پەن ازامات سەرعازين, «ۇزدىك تەڭگە ءىلۋشى» – ماعجان ساپاربەك, «ۇزدىك قۇسبەگى» باباجان بەرىكبولسىن, «ۇزدىك قازاق كۇرەسىنىڭ بالۋانى» ەرسۇلتان مۇزاپپاروۆ, «ۇزدىك توعىزقۇمالاق ويىنشىسى» اسەل داليەۆا, «ۇزدىك اسىق اتۋشى» مۇحتار احمەتوۆ دەپ تانىلسا, «ۇزدىك بايگە اتى» اتالىمى بويىنشا «التىن تۇعىر» «قاراكوز» اتتى جۇيرىككە بەرىلدى. اتتىڭ يەسى ارتىعالي ميرازوۆ, شاباندوزى بەكزات سادۋاقاس. سونداي-اق, نۇرلان دوداي «ۇزدىك جاتتىقتىرۋشى», قازاقستاندا وتكەن حالىقارالىق ۇلتتىق سپورت چەمپيوناتتارىنا رەسەي ۇلتتىق قۇراما كومانداسىن بىرنەشە جىل باستاپ كەلگەن ەربول ەدىلباەۆ «ۇزدىك جەتەكشى», گۇلنار بازارحانوۆا «ۇزدىك تورەشى» اتاعىمەن ماراپاتتالىپ, قىزىلوردا وبلىسىنىڭ اكىمى قىرىمبەك كوشەرباەۆقا «ەلىمجان» مەدالى تابىس ەتىلدى. ال, دەربىس بايدىلداەۆ, باعدات مۇپتەكەقىزى, جومارت سابىرجانوۆ, ونەرباي جانبالا «ۇلتتىق سپورت ارداگەرى» مەدالىمەن ماراپاتتالدى.
«بيىل ۇلتتىق سپورت ءۇشىن ەرەكشە جىل بولدى دەپ ايتۋعا بولادى. ويتكەنى, حالىقارالىق باسەكەلەردە ءبىزدىڭ ساڭلاقتارىمىز سان مارتە دارا شىقتى. اتاپ ايتساق, اۋدارىسپاقتان ءىىى ازيا چەمپيوناتىندا, تەڭگە ءىلۋ مەن قۇسبەگىلىكتەن ءىى ازيا چەمپيوناتىندا, جامبى اتۋدان XIV الەم چەمپيوناتىندا, كوكپاردان, توعىزقۇمالاقتان, اسىق اتۋدان, قازاق كۇرەسىنەن حالىقارالىق جارىستاردا جۇلدەلى ورىن يەلەنگەن سپورتشىلارىمىز بارشىلىق. سول سياقتى بيىل وڭتۇستىك كورەيادا جامبى اتۋدان وتكەن الەم چەمپيوناتىندا 23 ەلدىڭ ىشىنەن سپورتشىلارىمىز ءى ورىن يەلەندى. بۇگىنگى سىي-قۇرمەت سول ۇلتتىق سپورت باسەكەلەرىندە ەل نامىسىن اسقاقتاتىپ جۇرگەن ازاماتتارىمىزدىڭ ەسىمىن ارداقتاۋعا ارنالادى», - دەدى ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان.
سونىمەن بىرگە, ۇلتتىق سپورت سالاسىنىڭ دامۋىنا ەڭبەك سىڭىرگەن كوپتەگەن ازاماتتار ۇلتتىق سپورت قاۋىمداستىعىنىڭ ارنايى ديپلومى, العىس حاتى جانە قارجىلاي سىيلىقتارىنا يە بولدى. ۇلتتىق رۋحقا دەم بەرگەن ايتۋلى كەشتى ەلىمىزگە تانىمال ونەر جۇلدىزدارى ءان-كۇيمەن ارلەپ, جينالعان كوپتىڭ جىگەرىن جانىپ, ۇلتتىق سپورتتىڭ ناعىز جانكۇيەرى بولۋعا شاقىردى.
ۇلاربەك نۇرعالىم ۇلى, «ەگەمەن قازاقستان»