تۇركىستان وبلىسىنىڭ اكىمى جانسەيىت تۇيمەباەۆ تاتارستاننىڭ قازاقستانداعى وكىلەتتى ۋاكىلى دەنيس ۆالەەۆپەن جانە قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلدىگى, ساۋدا وكىلىنىڭ ورىنباسارى ەركەن جاكاتاەۆپەن كەزدەستى.
تاتار ەلىنىڭ بەلدى كاسىپكەرلەر توبىن باستاپ كەلگەن ازاماتتارعا, العىسىن بىلدىرگەن ءوڭىر باسشىسى ونەركاسىپ, ساۋدا-ەكونوميكالىق, ينۆەستيتسيالىق, سونىمەن بىرگە, تۇرعىن ءۇي-كوممۋنالدى شارۋاشىلىعى, تۋريزم, ترانسپورت جانە قاۋىپسىزدىك سالالارىنا IT-تەحنولوگيا جۇيەلەرىن ەنگىزۋدە ارىپتەستىك ورناتۋعا وبلىس ىنتالى ەكەنىن ايتتى. سونداي-اق تۇركىستان مەن تاتارستان استاناسى قازان قالاسىن باۋىرلاس قالالارعا اينالدىرۋ جونىندە ۇسىنىسىن جەتكىزدى. ءوز كەزەگىندە, تاتارستاننىڭ قازاقستانداعى وكىلەتتى ۋاكىلى د.ۆالەەۆ تۇركىستان وبلىسىمەن كوپتەگەن سالالاردا ىنتىماقتاستىق ورناتۋعا دايىن ەكەندىكتەرىن, باۋىرلاس ۇلتتاردىڭ رۋحاني بايلانىسى دا بەكي تۇسەتىنىن ايتىپ ءوتتى.
كەزدەسۋ ناتيجەسىندە, تۇركىستان وبلىسىنىڭ اكىمدىگى مەن تاتارستاننىڭ «بارس گرۋپ» اق اراسىندا يننوۆاتسيالىق اقپاراتتىق تەحنولوگيالار جانە تسيفرلاندىرۋ سالاسىندا ىنتىماقتاستىق مەموراندۋمى ءتۇزىلدى. اتالعان قۇجاتتا ەلەكتروندى مەملەكەتتىك قىزمەت كورسەتۋدە يننوۆاتسيالىق اقپاراتتىق تەحنولوگيالاردى دامىتۋ ماسەلەلەرى قامتىلعان. ايتا كەتەلىك, ماشينا قۇراستىرۋ, مۇنايحيميا, اسكەري-تەحنيكالىق, كولىك-لوگيستيكالىق سالالارى اياسىندا كاسىپكەرلەر ارىپتەستىك ورناتىپ كەلە جاتقان قازاقستان مەن تاتارستان اراسىنداعى ساۋدا اينالىمى 2017 جىلى 700 ملن. اقش دوللارى بولىپ, الدىڭعى جىلمەن سالىستىرعاندا 1,7 ەسەگە وسكەن.
عالىمجان ەلشىباي,
«ەگەمەن قازاقستان»
تۇركىستان وبلىسى