«قامقورشىسى جوق قارت ادامدارعا كومەك بەرۋ» اكتسياسى ۇيىمداستىرىلدى

شاراعا شاعىن شاھارداعى №1 ورتا مەكتەپتىڭ وقۋشىلارى بەلسەنە قاتىسىپ, جالعىز باستى قاريالاردىڭ ۇيلەرىنە بارىپ, ۇلدار اۋلانىڭ قارىن كۇرەپ, وت جاعىسىپ, قىزدار ءۇي ءىشىنىڭ تازالىق جۇمىستارىنا جاردەمدەستى. «جاسىراتىنى جوق, قازىر بالالاردىڭ كوبى, بالالار تۇگىلى اتا-انالاردىڭ دەنى ۇيالى تەلەفونعا شۇقشياتىنى بەلگىلى. ودان قالسا, تەلەديدارعا تەلمىرەدى. قوزعالىس, قيمىل از. ال تازا اۋادا قولعا كۇرەك الىپ, ماڭدايدان تەر تامشىلاپ, ەڭبەك ەتۋدىڭ ءلاززاتىن سوزبەن جەتكىزۋ قيىن شىعار. سوندىقتان وقۋشىلارىمىزدى وسى اكتسياعا قاتىستىرۋدى ءجون كوردىك. بۇل ءبىر جاعىنان, ولاردى ەڭبەككە باۋلۋ, ەكىنشى جاعىنان, تاربيە. ۇلكەندەردى قۇرمەتتەۋگە ۇيرەتۋ», - دەيدى وقۋشىلارىن اكتسياعا اپارعان ۇستاز بالجان احمەتجانوۆا.    

اياگوز اۋداندىق ىشكى ساياسات ءبولىمىنىڭ باسشىسى مەدەت مىرزىكەشوۆ  №1 ورتا مەكتەپ وقۋشىلارىنىڭ وتكىزگەن قايىرىمدىلىق شاراسى وزگەلەرگە ۇلگى بولارلىقتاي ءىس بولعانىن ايتادى. «جالعىزدىق قۇدايعا عانا جاراسقان» دەگەن عوي بابالارىمىز. بۇل ءسوزدىڭ ومىرشەڭدىگىن باسىنا تۇسكەن جان عانا بىلەدى. بۇگىن جاس ورەندەر قايىرىمدىلىق دەگەن ءسوزدىڭ ءمانى مەن ماعىناسىنا ءۇڭىلىپ, وزدەرى سوعان تىكەلەي اتسالىستى», - دەيدى ول.

ازامات قاسىم,

«ەگەمەن قازاقستان»

شىعىس قازاقستان وبلىسى,

اياگوز اۋدانى