مەملەكەت باسشىسىنىڭ تىكەلەي قولداۋىمەن ءبىلىم سالاسىنىڭ ينفراقۇرىلىمىن دامىتۋعا زور كوڭىل ءبولىنىپ كەلەدى. بيىلدىڭ وزىندە الىپ شاھار الماتىدا ءبىلىم نىساندارى قۇرىلىسى مەن كۇردەلى جوندەۋدەن وتكىزۋگە 17 ملرد تەڭگەدەن ارتىق قارجى بولىنگەن. تاۋەلسىزدىك جىلدارىنان بەرى قالادا 117 وقۋ ورداسى بوي كوتەرسە, سوڭعى بەس جىلدا سالانى قارجىلاندىرۋ 37%-عا وسكەن.
جىل باسىنان بەرى جاڭاشا ءبىلىم بەرۋگە كىرىسكەن الماتىلىق مۇعالىمدەردىڭ 70%-نىڭ جالاقىسى 30 پايىزعا كوبەيگەن. ال قىركۇيەكتەن باستاپ ۇلتتىق كاسىبي تەستىلەۋدى ەڭسەرگەن 1293 ۇستاز العاش رەت وزدەرىنىڭ قىزمەتتىك ەڭبەكاقىسىنا 30-دان 50 پايىزعا دەيىن قوسىمشا اقى الاتىن بولادى. بۇل تۋرالى قالانىڭ پەداگوگتار قاۋىمىمەن كەزدەسكەن شاھار باسشىسى باۋىرجان بايبەك ايتتى. اسىرەسە فيزيكا, حيميا, ينفورماتيكا پاندەرىن اعىلشىن تىلىندە وقىتاتىن ماماندارعا ايرىقشا جاعداي جاساۋ كوزدەلگەن. مۇنداي مۇعالىمدەردىڭ قىزمەتتىك جالاقىلارىنا قوسا 200%-دىق كولەمدە قوسىمشا اقى تولەنەدى.
قالانىڭ ۇزدىك پەداگوگتارىمەن كەزدەسكەن قالا اكىمى مەملەكەت باسشىسىنىڭ جولداۋىن جۇزەگە اسىرۋ اياسىندا ءبىلىم جانە عىلىم مينيسترلىگىنىڭ «پەداگوگ مارتەبەسى تۋرالى» جانە «وقۋشى مەن مۇعالىمنىڭ جۇكتەمەسىن ازايتۋ بويىنشا بىرقاتار زاڭ اكتىلەرىنە وزگەرىستەر مەن قوسىمشالار ەنگىزۋ تۋرالى» زاڭداردىڭ جوبالارىن دايىنداعانىن اتاپ ءوتتى. ونىڭ سوزىنشە, قالاداعى بارلىق ۇستازدار مەن اتا-انالار قاۋىمداستىعىنىڭ وكىلدەرى اتالعان زاڭدى تالقىلاۋعا بەلسەندى تۇردە قاتىسۋى كەرەك.
«ەڭ ماڭىزدىسى, جوبادان قازاقستاندىق پەداگوگتەر ءوز جۇمىستارىنىڭ جوعارى باعاعا يە ەكەنىن, ءبىلىم سالاسىندا تۋىنداعان بارلىق ماسەلەگە, وقۋشىلار مەن مۇعالىمدەرگە ايرىقشا نازار اۋدارىلاتىنىن كوردى. سىزدەردىڭ قالانىڭ ءبىلىم سالاسىن دامىتۋعا قوسقان ۇلەستەرىڭىز وتە جوعارى, جاۋاپتى ءارى قيىندىعى مول ۇستازدىق قىزمەتتەرىڭىزگە العىس ايتامىن. وقۋشىلاردىڭ ءتۇرلى ءبىلىم سايىستارىندا بيىك جەتىستىكتەرگە جەتۋى جەكە كاسىبي بىلىكتىلىكتەرىڭىزدىڭ ساپاسىن ايقىنداي تۇسەدى», دەدى ب.بايبەك.
الماتى قالاسىنىڭ ءبىلىم بەرۋ جۇيەسىندە 1078 ءبىلىم بەرۋ ۇيىمى جۇمىس ىستەسە, سونىڭ 700-دەن استامى مەكتەپكە دەيىنگى ءبىلىم بەرۋ مەكەمەسى. ماسەلەن, سوڭعى ەكى جىلدىڭ وزىندە قالادا 10,4 مىڭ ادامعا ارنالعان 262 مەكتەپكە دەيىنگى مەكەمە اشىلعان. بۇگىندە مەكتەپكە دەيىنگى ءبىلىم بەرۋ جانە تاربيەلەۋ ىسىمەن قالاداعى ءۇش جاستان التى جاسقا دەيىنگى جەتكىنشەكتەردىڭ 81,2 پايىزى قامتىلىپ وتىر. مەكتەپتەر مەن مەكتەپتەن تىس ۇيىمداردا ىسكە قوسىلعان روبوتتەحنيكا جانە 3D مودەلدەۋ ۇيىرمەلەرىندە 3 مىڭنان استام شاكىرت ءبىلىم الادى.
ارمان وكتيابر,
«ەگەمەن قازاقستان»
الماتى