تامىزدا سيەتل شتاتىندا ورنالاسقان جاساندى ينتەللەكت جونىندەگى اللەن ينستيتۋتىنىڭ زەرتتەۋشىلەرى كومپيۋتەرلەر ءۇشىن اعىلشىن تەستىن ازىرلەپ شىقتى. وندا تومەندەگىدەي سويلەمدەردى ماشينالار قالاي ورىندايتىنىن انىقتاپ كوردى.
كەيد مەتتس, «نيۋ-يورك تايمس»
«ساحنادا ايەل پيانينونىڭ الدىنا وتىردى. ول ...»
ا) ءسىڭلىسى قۋىرشاقپەن ويناپ جاتقاندا جاعاعا جايعاسا كەتتى.
ءا) مۋزىكا ويناي باستاعاندا بىرەۋمەن بىرگە جىميدى.
ب) توپتىڭ ورتاسىندا بيشىلەرگە قارادى.
ۆ) تولقىعان كۇيى ساۋساقتارىن پەرنەگە قويدى.
ءسىز ءۇشىن بۇل وڭاي سۇراق. الايدا كومپيۋتەردىڭ دۇرىس جاۋاپتى تابۋى قيىنعا سوعادى. ادەتتە ادامداردىڭ 88 پايىزدان استامى وسى ساۋالعا دۇرىس جاۋاپ بەرسە, جاساندى ينتەللەكت جۇيەسى 60 پايىزعا ءدال تاپتى. ساراپشىلار ءۇشىن بۇل تاڭعالارلىق جەتىستىك.
ەكى اي وتكەننەن كەيىن Google كومپانياسىنىڭ زەرتتەۋشىلەرىنەن قۇرالعان توپ Bert دەپ اتالاتىن جۇيە ويلاپ شىعاردى. ونىڭ جەتىلگەن تەحنولوگياسى جوعارعىداي سۇراقتارعا ادام سەكىلدى ءدال جاۋاپ بەرەدى. جۇيە نەگىزى مۇنداي سىناقتان ءوتۋ ءۇشىن ازىرلەنبەگەن.
Bert-ءتىڭ ىسكە قوسىلۋى جاساندى ينتەللەكت جۇيەسىنە ۇلكەن سەرپىن اكەلدى. كەيىنگى بىرنەشە ايدا زەرتتەۋشىلەر كومپيۋتەر جۇيەسىنىڭ تىلگە ءتان وزىندىك ەرەكشەلىكتەردى مەڭگەرىپ, ونى باسقا تاپسىرمالاردى ورىنداۋعا قولدانا الاتىنىن انىقتادى.
مۇنداي جۇيەلەر Alexa نەمەسە Google Home سەكىلدى تسيفرلى كومەكشىلەردە قولدانىلاتىن ءتۇرلى تەحنولوگيالاردى, زاڭ فيرمالارى مەن باسقا دا كاسىپكەرلەردىڭ قۇجاتتارىن وزدىگىنەن ساراپتايتىن باعدارلامالاردى دامىتادى.
ء«بىزدىڭ ادامزات دەڭگەيىنە جەتەعابىل جاڭا زات جاساپ شىعارۋىمىز جۇمىستى اۆتوماتتاندىرادى ءارى جەڭىلدەتەدى», دەيدى دجەرەمي حوۆارد. ول – سان-فرانتسيسكودا ورىن تەپكەن Fast.ai زەرتحاناسىنىڭ نەگىزىن قالاۋشى.
بالكىم, مۇنداي قادامدار اقىر سوڭىندا اڭگىمە-دۇكەن قۇراتىن تەحنولوگيا جاساپ شىعارۋعا كومەكتەسەر.
بىراق حوۆارد مىرزانىڭ ايتۋىنشا, الەۋمەتتىك جەلىلەردە مۇنداي جۇيەلەر اڭگىمەلەسۋشىنى ءوزىن ادام ەكەنىنە سەندىرەتىندەي بوتتار جاساۋعا اكەپ سوعۋى ىقتيمال.
زەرتتەۋشىلەردىڭ ايتۋىنشا, جاساندى ينتەللەكت ءتاسىلىنىڭ قارقىندى دامۋى شىنايى سەكىلدى كورىنەتىن جالعان سۋرەتتەر جاساۋعا مۇمكىندىك بەرەدى. حوۆارد مىرزا مۇنداي تەحنولوگيا ءتىل ماسەلەسىنە دەندەپ ەنگەن سايىن, ولاردىڭ ونلاين نۇسقاسىنىڭ شىعۋىنا سكەپتيكالىق كوزقاراسپەن قاراۋ قاجەتتىگىن ايتادى.
مۇنداي جاڭا تىلدىك جۇيەلەر ادامدار جازعان ميلليونداعان سويلەمدى ساراپتاي الادى. سان-فرانتسيسكوداعى OpenAI زەرتحاناسى جاساعان جۇيە مىڭداعان كىتاپتى وقىپ شىعادى. Google-دىڭ Bert تەحنولوگياسى سولاردىڭ بارىمەن بىرگە, ۋيكيپەدياداعى بۇكىل اقپاراتقا قانىق بولدى.
ءار جۇيە ناقتى ءبىر ءتاسىلدى دامىتىپ شىعارادى. OpenAI-دىڭ تەحنولوگياسى سويلەمدەگى كەلەسى ءسوزدى انىقتاۋدى مەڭگەردى. Bert سويلەمدە ءتۇسىپ قالعان ءسوزدى ءدال تابۋدى ۇيرەندى. وعان قوسا, بەرىلگەن تاپسىرمالاردى ورىنداي وتىرا ولار ءتىلدىڭ قالاي قۇرىلاتىنىنان دا حاباردار بولا ءتۇستى.
Bert-ءتىڭ جاسالۋىنا اتسالىسقان Google-دىڭ زەرتتەۋشىسى ياكوب دەۆليننىڭ سوزىنە قاراعاندا, ەگەر جۇيە ميلليونداعان سويلەمنەن ءتۇسىپ قالعان ءسوزدى ءدال تابا بىلسە, وندا ول اعىلشىن تىلىندەگى سوزدەردىڭ نەگىزگى بايلانىسىن جاقسى تۇسىنەدى.
«مۇنداي تەحنولوگيا جاساندى ينتەللەكتىڭ نەگىزگى ماقساتىنا جاسالعان العاشقى قادام. ونىڭ قاتارىندا كوپ, تۇسىنىكسىز اقپاراتتىڭ ىشىنەن ادامعا قاجەتتىسىن تاۋىپ, ماڭىزدى شەشىم قابىلداۋعا كومەكتەسەتىن, ساراپتايتىن تەحنولوگيا جاساپ شىعۋ بار», دەيدى نيۋ-يورك ۋنيۆەرسيتەتىنىڭ پروفەسسورى سەم بوۋمان.
وتكەن ايدا Google Bert جۇيەسىن كوپشىلىكتىڭ پايدالانۋىنا ۇسىندى. سوعان ساي, وعان قوسىمشا تاپسىرما بەرۋگە بولادى. دەۆلين مىرزا مەن ونىڭ ارىپتەستەرى Bert-ءتى 102-گە جۋىق تىلدە سىناپ كوردى.
الايدا مۇنداي جۇيەنىڭ جەدەل دامىپ كەتۋىنە كۇمانمەن قارايتىندار دا بار. ويتكەنى زەرتتەۋشىلەر جاساندى ينتەللەكت ورىنداي الاتىن تاپسىرمالارعا عانا نازار اۋدارىپ, باسقاسىن نازاردان تىس قالدىراتىنىن ايتادى نيۋ-يورك ۋنيۆەرسيتەتىنىڭ پسيحولوگيا پروفەسسورى گاري ماركۋس. «مۇنداي جۇيەلەر ءوز ماقساتىنا تولىققاندى جەتتى دەۋ ءۇشىن ءالى كوپ ەڭبەك ەتۋ كەرەك», دەيدى ول.
© 2018 The New York Times News Service
ماقالانى اۋدارعان اباي اسانكەلدى ۇلى,
«ەگەمەن قازاقستان»