ەحرو كونگرەسس-ورتالىعىندا ءوتىپ جاتقان «يندۋستريالاندىرۋدىڭ ەكىنشى بەسجىلدىعى: قازاقستاندا جاسالعان» اتتى جالپىۇلتتىق تەلەكوپىر بارىسىندا ەلباسى نۇرسۇلتان نازارباەۆ قازاقستاندىق ءونىم شىعاراتىن ءۇش كاسىپورىندى ىسكە قوستى, دەپ حابارلايدى قازاقپارات.
«قۇرمەتتى ەلباسى! «پرومماشكومپلەكت» جشس جىلىنا 200 مىڭ تەمىرجول دوڭگەلەگىن شىعاراتىن زاۋىت قۇرىلىسىن اياقتادى. بۇل, جوعارى تەحنولوگيالى, 100 پايىز يمپورتتىڭ ورنىن باساتىن ءوندىرىس. جوبا قۇنى 54 ملرد تەڭگە, ونىڭ 36 ملرد تەڭگەسى - قازاقستان دامۋ بانكىنىڭ كرەديتتىك قاراجاتى. وندىرىستىك قۋاتقا شىققاننان كەيىن «پرومماشكومپلەكت» شتاتى مىڭ ادامنان اساتىن بولادى. ءونىمنىڭ ۇشتەن ەكىسى سىرتقى نارىققا شىعارىلادى», - دەدى «پرومماشكومپلەكت» جشس باسقارما توراعاسى داۋلەت سىزدىقوۆ.
ال «Alageum Electric» اق باقىلاۋ كەڭەسىنىڭ توراعاسى سايدۋللا قوجاباەۆ قازاقستان تاريحىندا ءبىرىنشى بولىپ كەرنەۋى 220 كۆ ترانسفورماتورلار ءوندىرىسىن جولعا قويىلعانىن اتاپ ءوتتى.
«قۇرمەتتى نۇرسۇلتان ءابىش ۇلى, «Asia Trafo» بۇل - يننوۆاتسيالىق كاسىپورىن. ءبىز وندىرىستىك قۋاتىمىزدى ارتتىرىپ قانا قويماي, ورتالىق ازيادا تەڭدەسى جوق ەلەكتر سىناق زەرتحاناسىن قۇردىق. جوبانىڭ العاشقى كەزەڭىن اياقتادىق. ناتيجەسىندە قازاقستان تاريحىندا ءبىرىنشى بولىپ كەرنەۋى 220 كۆ ترانسفورماتورلار ءوندىرىسىن جولعا قويدىق. ەكىنشى كەزەڭدە تسيفرلىق ترانسفورماتورلاردى ءوندىرۋدى جوسپارلاپ وتىرمىز. بۇگىندە جۇزدەگەن كاسىپورىن سەرپىندى تۇردە دامىپ, وسى ۋاقىتقا دەيىن ەلىمىز يمپورتتاپ كەلگەن ونىمدەردى وزدەرى شىعارا باستاعانى ءۇشىن سىزگە العىسىمىزدى بىلدىرەمىز!», - دەدى ول.
«سhina Gezhouba Group Cement Co., Ltd» كومپانياسىنىڭ باس ديرەكتورى, «كومپانيا گەجۋبا شيەلى تسەمەنت» جشس باسقارما توراعاسى مينگ لي قازاقستان پرەزيدەنتىنەن ءۇش كاسىپورىندى ىسكە قوسۋعا رۇقسات سۇرادى.
«قادىرلى پرەزيدەنت! ءبىزدىڭ كاسىپورىن قازاقستاندا قالىپتاسقان قولايلى ينۆەستيتسيالىق احۋالدىڭ جەمىسى. بۇكىل الەم ينۆەستيتسيالار مەن تەحنولوگيالاردى تارتۋ جولىنداعى ءسىزدىڭ ەڭبەگىڭىزدى جاقسى بىلەدى. ءبىزدىڭ جوبا قازاقستان-قىتاي سەرىكتەستىگىنىڭ ناتيجەسى. قازاقستاننىڭ ءۇش بىردەي جاڭا ءوندىرىسىنىڭ ۇجىمدارى سىزدەن كاسىپورىنداردى ىسكە قوسۋدى سۇرايدى», - دەدى مينگ لي.
قر پرەزيدەنتى اتالعان ءۇش كاسىپورىننىڭ دا جۇمىسىن باستاۋعا رۇقسات بەردى.
«بارشالارىڭىزدى وسى تابىستارىڭىزبەن شىن جۇرەكتەن قۇتتىقتايمىن. بۇل وندىرىستەردىڭ ۇشەۋى دە بۇرىن قازاقستاندا بولماعان. تەمىرجول قۇرامالارىنا ارنالعان دوڭگەلەكتەردى يمپورتايتىن ەدىك. مۇنداي قۋاتتى تراسفورماتورلاردى شىعارعان جوقپىز», - دەپ اتاپ وتكەن ەلباسى, شيەلى تسەمەنت زاۋىتىنىڭ دا الداعى الەۋەتىن جوعارى باعالادى.