وسىدان جيىرما جىل بۇرىن قۇت-مەكەن – ارقا توسىنە كوشىن تۇسىرگەن استانا بۇگىندە الەم تانىعان اسقاق شاھارعا, مەيماندوس مەگاپوليسكە اينالىپ وتىر. ەلباسى نۇرسۇلتان نازارباەۆتىڭ قازاقستاننىڭ زامانعا لايىق جاڭا استاناسىن سالۋ يدەياسى ءىس جۇزىندە قۋاتتى ەكونوميكالىق ءىرى جوبانىڭ باستاۋى بولاتىن.
شىن مانىندە ازاتتىعىمىزدىڭ التىن تاجىندەي جارقىراعان ارۋ استانا بۇگىندە ينفراقۇرىلىمى دامىعان, مادەني وشاقتارى كوپ, قالالىق قىزمەت كورسەتۋى تۇرعىندار مەن قوناقتار ءۇشىن قولايلى, ەل ەكونوميكاسىنىڭ باس قاينارى رەتىندە الەمنىڭ ۇزدىك قالالارىنىڭ بىرىنە اينالدى.
مەملەكەت باسشىسى نۇرسۇلتان نازارباەۆ ءار سوزىندە استانا تەك ەلىمىزدىڭ باس شاھارى ەمەس, ەكونوميكا لوكوموتيۆى, رەسپۋبليكالىق بيۋدجەتتىڭ نەگىزگى دونورى ەكەنىن ۇنەمى ايتىپ وتىرادى.
ەڭ الدىمەن استانانىڭ – ەۋرازيا قۇرلىعىنىڭ كىندىگىندە ورنالاسۋى قالانىڭ ەكونوميكالىق تۇرعىدان ءتيىمدى دامۋىنا, ونىڭ كولىك, قاتىناس جانە لوگيستيكا ورتالىعىنا اينالۋىنا كەڭ جول اشتى. ودان بولەك تاۋەلسىزدىك جىلدارىندا ەلىمىزدە وتكەن ءتۇرلى حالىقارالىق ءىس-شارالار دا استانانىڭ ەكونوميكالىق دامۋىنا قۋاتتى سەرپىن بەردى.
مەملەكەتىمىزدىڭ اتىن الەمگە پاش ەتكەن حالىقارالىق ەكسپو-2017 كورمەسىن وتكىزۋ بارىسىندا پرەزيدەنت «بۇگىندە استانادا شەتەلدىك 2700 كومپانيا جۇمىس ىستەيدى. ولار قالا ەكونوميكاسىنا 3,2 ميلليارد اقش دوللارى كولەمىندە ينۆەستيتسيا سالىپ وتىر», دەگەن بولاتىن. سايكەسىنشە, قالا ەكونوميكاسىنىڭ قارقىندى دامۋى كوپتەگەن ينۆەستور ءۇشىن دە قولايلى بولىپ وتىر.
سونداي-اق باس شاھاردىڭ ءىرى بيزنەس ورتالىعىنىڭ بىرىنە اينالۋى ەكونوميكالىق تۇرعىدان جايلى احۋال قالىپتاستىرۋدا. ەلوردادا كاسىپكەرلىك جاڭاشىل كوزقاراستار دامىپ كەلە جاتقانى انىق بايقالۋدا. ايتالىق, استانادا 128 مىڭنان استام شاعىن جانە ورتا كاسىپكەرلىك نىساندارى جۇمىس ىستەيتىنىنىڭ ءوزى كوپ جايتتى اڭعارتادى.
بۇگىندە استانامىزدىڭ ەكونوميكالىق الەۋەتى ەسەلەپ ارتىپ, دونور قالاعا اينالدى. مۇنى بىلتىر قالانىڭ ەكس-اكىمى اسەت يسەكەشەۆ اتاپ كورسەتتى. «20 جىل بويى بيۋدجەت استاناعا شىن مانىندە 2,3 تريلليون كولەمىندە ۇلكەن اقشا ينۆەستيتسيالادى. بىراق قازىردىڭ وزىندە استانا سالىقتارىنىڭ ءوزى 6 ترلن تەڭگە كولەمىندە قايتارىلدى, ياعني العاشقى سومانى 2,5 ەسە وتەدى», دەگەن بولاتىن ءا.يسەكەشەۆ. ونىڭ ايتۋىنشا, ەلوردالىق كاپيتال جىل سايىن رەسپۋبليكالىق قازىناعا 750 ملرد تەڭگە اۋدارادى.
قالا ەكونوميكاسىنىڭ نەگىزى – ساۋدا, ونەركاسىپ ءوندىرىسى, كولىك, بايلانىس جانە قۇرىلىس سالالارى. شاھاردىڭ ونەركاسىپ ءوندىرىسى نەگىزىنەن قۇرىلىس زاتتارىن, ازىق-ت ۇلىك ونىمدەرىن شىعارۋ مەن ماشينا جاساۋ ءىسى توڭىرەگىنە شوعىرلاندىرىلعانىن ايتا كەتكەنىمىز ءجون. استانا قازاقستاندا قۇرىلىس مەتالل بۇيىمدارىن, پايدالانۋعا دايىن بەتون جانە بەتوننان جاسالعان قۇرىلىس زاتتارىن شىعارۋ جونىنەن بۇگىندە الدىڭعى ورىندى يەلەنەدى.
قالانىڭ ءىرى كاسىپورىندارى قاتارىندا ۆاگون جوندەۋ زاۋىتىن, «تسەسنا-استىق» كونتسەرنىن, «تۇلپار-تالگو» جشس جولاۋشىلار ۆاگونىن قۇراستىرۋ زاۋىتىن, «ەۋروكوپتەر كازاحستان ينجينيرينگ» جشس تىكۇشاق قۇراستىرۋ زاۋىتىن ايتۋعا بولادى.
بۇگىندە ەلورداداعى حالىق سانى 1 ميلليوننان اسقانى بەلگىلى. استانانى ودان ءارى قارقىندى دامىتۋ بارىسىندا ۋربانيزاتسيا ءۇردىسىن ەسكەرسەك, ەلباسى ايتقانداي, 2030 جىلعا قاراي قالا تۇرعىندارىنىڭ سانى تاعى 1 ميلليون ادامعا ءوسۋى مۇمكىن. بۇل قالا ۇنەمى جاڭا جۇمىس ورىندارىن اشۋ ارقىلى ەل-جۇرتتى ەڭبەكپەن, تۇرعىن ۇيمەن قامتاماسىز ەتۋ مىندەتىن العا قويادى.
ەلوردا قۇرىلىس اۋقىمى جونىنەن ەلىمىزدە كوش باستاپ تۇر. استانا مارتەبەسىن العالى بەرى قالادا ميلليونداعان شارشى مەتر تۇرعىن ءۇي سالىنىپ, استانا قۇرىلىسىنا جۇزدەگەن وتاندىق جانە شەتەلدىك قۇرىلىس كومپانيالارى قاتىسقان. الداعى جوسپار اياسىندا 2023 جىلعا دەيىن استانادا 9,5 ميلليون شارشى مەتر تۇرعىن ءۇي سالىنىپ, 500 مىڭ ادامعا ارنالعان 156 مىڭ پاتەر بەرىلمەك. 2027 جىلعا دەيىن 800 مىڭ ادامعا ارنالعان 16 ميلليون شارشى مەتر تۇرعىن ءۇي سالىنادى دەپ كۇتىلۋدە.
قىسقاشا ايتقاندا, قازاقستاننىڭ تۇڭعىش پرەزيدەنتىنىڭ يدەياسىمەن ىرگەسى قالانعان جاڭا ەلوردا قىسقا مەرزىم ىشىندە جالپىۇلتتىق يدەيا مارتەبەسىنە يە بولىپ, جاس مەملەكەت تاۋەلسىزدىگىنىڭ سيمۆولىنا جانە ەلىمىزدىڭ زور تابىس كوزىنە اينالىپ وتىر.
ميراس اسان,
«ەگەمەن قازاقستان»