قىزىلوردادا جەر تەلىمدەرى اۋكتسيونعا شىعارىلدى

اۋكتسيونعا اۋداندىق جەر قاتىناستارى ءبولىمى جالپى كولەمى 2372 گەكتاردى قۇرايتىن 30 جەر تەلىمىن ۇسىندى. ولاردىڭ 15-ءى شارۋا قوجالىعىن جۇرگىزۋ ءۇشىن, 14-ءى عيماراتقا قىزمەت كورسەتۋ ءۇشىن, 1-ەۋى وندىرىستىك ماقساتقا ارنالعان جەر تەلىمدەرى.

جەر تەلىمدەرىنىڭ جالپى باعالىق قۇنى 3 ملن 947 مىڭ تەڭگەگە باعالانسا, باستاپقى ساتىلۋ باعاسى 4 ملن 342 مىڭ تەڭگە بولىپ كورسەتىلگەن بولاتىن. وتكىزىلگەن اۋكتسيون ناتيجەسىمەن اتالمىش جەرلەر 4 ملن.737 مىڭ تەڭگەگە ساتىلدى.

كاسىپكەرلىك ماقساتتاعى جەر تەلىمدەرىن پالاتا الاڭىندا وتكىزۋ باستاماسىن كاسىپكەرلەر پالاتاسىنىڭ كوتەرۋىمەن وسىدان ەكى جىل بۇرىن قىزىلوردا قالاسى اكىمدىگى قولداعان بولاتىن. سودان بەرى جەر تەلىمدەرىن اۋكتسيون ارقىلى بەرۋ شاراسى قىزىلوردادا ناتيجەلى جۇزەگە اسىرىلىپ كەلەدى.

ناتيجەسىندە وتكەن جىلدىڭ قورىتىندىسى بويىنشا 53 جەر تەلىمى جەكە مەنشىك قۇقىعىمەن, 89 جەر تەلىمى ۋاقىتشا وتەۋلى جەر پايدالانۋ (جالداۋ) قۇقىعىمەن ساتىلىپ, مەملەكەتتىك بيۋدجەتكە 101 ملن 51 مىڭ تەڭگە قاراجات ءتۇستى.

اۋدانداردىڭ اراسىندا العاشقى بولىپ شيەلى اۋدانى اۋكتسيونداردى پالاتا الاڭىندا وتكىزۋدى باستادى. بۇل تۋرالى پالاتا ديرەكتورىنىڭ ەكونوميكالىق ماسەلەلەر جونىندەگى ورىنباسارى قوجاحمەت ءىلياسوۆ: «بۇگىن العاش رەت شيەلى اۋدانىندا كاسىپكەرلىك ءۇشىن جەر تەلىمدەرىنە ارنالعان اۋكتسيون شيەلى اۋداندىق فيليالىنىڭ الاڭىندا وتۋدە. بۇل اۋدان كاسىپكەرلىگىن دامىتۋدا جاسالىپ وتقان وڭ باستاما. جاپپاي كاسىپكەرلىكتى, ونىڭ ىشىندە وتباسىلىق كاسىپكەرلىكتى دامىتۋدا جەرگىلىكتى دەڭگەيدە شەشۋدى قاجەت ەتەتىن بىردەن-ءبىر تۇيتكىلدى ماسەلە – جەر تەلىمدەرىنە كەلىپ تىرەلەدى. اۋكتسيوننىڭ كاسىپكەرلەردىڭ قارا شاڭىراعى - پالاتا الاڭىندا وتكىزىلۋى – اشىقتىقتى, جەر بويىنشا ورىن الىپ جۇرگەن بىرقاتار ماسەلەلەردىڭ وڭ شەشىلىپ, قولجەتىمدى بولۋىن قامتاماسىز ەتەدى. ءبىزدىڭ ۇسىنىسىمىزدى قابىل الىپ, قولداعان شيەلى اۋدانى اكىمدىگىنە ريزاشىلىعىمىزدى بىلدىرەمىز», - دەدى.

باقتيار تايجان,

«ەگەمەن قازاقستان».