قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ جاس عالىمدارى روبوتوتەحنيكا بويىنشا ستارتاپ جوبالار جاساۋدى قولعا الماق.
ۋنيۆەرسيتەتتە وسى تاراپتا عىلىمي-زەرتتەۋ جۇمىستارىن جۇرگىزۋگە باعىتتالعان ارنايى سەكتسيالىق ۇيىرمەلەر قۇرۋ دا كوزدەلىپ وتىر. وندا ۋنيۆەرسيتەت عالىمدارى روبوتوتەحنيكا بويىنشا وڭىرلەردەگى جوعارى وقۋ ورىندارىنىڭ ستۋدەنتتەرى مەن مەكتەپ وقۋشىلارىن زاماناۋي زەرتحانالىق جۇمىستارعا تارتىپ, ولاردىڭ عىلىمي الەۋەتىن كوتەرمەك.
بۇعان قىزدار ۋنيۆەرسيتەتىنىڭ ماتەريالدىق-تەحنيكالىق بازاسى تولىق مۇمكىندىك بەرەدى. فيزيكا-ماتەماتيكا فاكۋلتەتىنىڭ جانىنداعى «روبوتوتەحنيكا» زەرتحاناسى Lego, اrduino جانە Raspberry روبوتتارىمەن, وقۋ-ادىستەمەلىك جانە باعدارلامالىق نۇسقاۋلىقتارمەن جابدىقتالعان.
اتالعان زەرتحانا ناقتى ەكى ماقسات بويىنشا جۇمىس ىستەيدى. بىرىنشىدەن, قازىرگى كۇندە ورتا ءبىلىم سالاسى ءۇشىن زاماناۋي بىلىكتىلىگى جوعارى, باسەكەلەستىك قابىلەتى مىقتى مامان دايارلاۋ مىندەتى تۇر. بۇگىندە ەلىمىزدىڭ بارلىق ورتا ءبىلىم بەرۋ مەكەمەلەرى نازارباەۆ زياتكەرلىك مەكتەپتەرىندە باستاۋ العان STEAM ءبىلىم بەرۋ تەحنولوگياسىن جۇزەگە اسىرۋدى كوزدەپ وتىر. وسى تالاپتارعا ساي مامان وقىتىپ شىعارۋ ماقساتىنداعى العاشقى قادام روبوتوتەحنيكا زەرتحاناسىنىڭ اشىلۋى. ەكىنشىدەن, قازىر اقپاراتتىق تەحنولوگيالاردىڭ قارىشتاپ دامىعان ۋاقىتى. بۇل باعىتتا بۇگىندە الەمدە قارقىندى جۇمىستار جۇرگىزىلىپ جاتىر. ءبىر عانا ازيادا بەس ميلليونعا جۋىق مەكتەپ وقۋشىسى روبوتوتەحنيكامەن اينالىسىپ جاتقاندىعى كوپ نارسەدەن حابار بەرىپ تۇرعانى ايتپاسا دا تۇسىنىكتى.
Marwin برەندىمەن جابدىقتالعان جيىنتىقتار ارقىلى ستۋدەنتتەر تەوريا مەن تاجىريبەنى ۇشتاستىرا الادى. سونىمەن قاتار زاماناۋي قۇرالدى تەرەڭ مەڭگەرە تۇسەدى. ءبىر بۇل عانا ەمەس. كومپيۋتەرلىك باعدارلامالار ارقىلى جۇمىس ىستەيتىن بولشەكتەردەن ءتۇرلى روبوتتار جاساۋعا بولادى. بۇل – شىعارماشىلىقتىڭ تىڭ تۇرىمەن اينالىسۋعا مۇمكىندىك بەرەدى.
– روبوت تەحنيكالارىمەن جۇمىس ىستەۋ بالانىڭ ويلاۋ قابىلەتىن دامىتىپ, وزگە پاندەردى دە جاقسى مەڭگەرۋىنە سەپتىگىن تيگىزەدى. ۋنيۆەرسيتەت ستۋدەنتتەرى Lego قۇراستىرمالى بولشەكتەرىنەن ارنايى باعدارلاما ارقىلى وزدىگىنەن جۇرەتىن ءتۇرلى روبوتتى كولىكتەر, ءتۇرلى كەدەرگىلەر كەزدەسسە دە ءوز باعىتىنان تايمايتىن تانكىلەردى قۇراستىرۋدى ۇيرەنۋدە. ولار باستاپقىدا شاعىن ماشينالار قۇراستىرىپ, كەيىننەن كۇردەلى باعدارلامالارعا كوشەدى. ماقسات –بولاشاق پەداگوگ ماماندارعا روبوت تەحنيكالارىن قۇراستىرۋدى جەتە تانىستىرۋ, زاماناۋي تەحنولوگيالارمەن جۇمىس ىستەۋگە ماشىقتاندىرۋ.
ايناش ەسالي,
«ەگەمەن قازاقستان»
الماتى