فۋتزالدان UMBRO Futsal Awards-2018 جۇلدەسىنەن ۇمىتكەرلەر قاتارى تولىقتاي انىقتالدى. ال سولاردىڭ اراسىنان كىمنىڭ ۇزدىك شىعاتىنى تاياۋ كۇندەرى بەلگىلى بولادى.
ءبىز بۇعان دەيىن «الەمنىڭ ەڭ ۇزدىك قاقپاشىسى» اتالىمى بويىنشا ۇمىتكەرلەر تىزىمىندە قازاقستان ۇلتتىق قۇراماسى مەن الماتىنىڭ «قايرات» كلۋبىنىڭ مۇشەسى يگيتانىڭ بارىن جازعان ەدىك. كۇنى كەشە دۋگلاس جۋنيور مەن حوسسەين تايەبيدىڭ دە مىقتىلار ساناتىنا قوسىلعانى ءمالىم بولدى. ولاردىڭ ەكەۋى دە «قايراتتىڭ» ويىنشىلارى. ماسەلەن, 1988 جىلى برازيليادا تۋىپ-وسكەن دۋگلاس جۋنيور ءبىراز ۋاقىت ءوز ەلىندە جانە چەحيادا ونەر كورسەتتى. 2015 جىلى الماتىلىق كلۋبپەن كەلىسىمشارتقا وتىردى. قازاقستاننىڭ ازاماتتىعىن قابىلداپ, كوپتەگەن بايراقتى باسەكەلەردە ۇلتتىق كوماندامىزدىڭ نامىسىن ابىرويلى قورعادى. امپلۋاسى – قورعاۋشى. سول كەزدەن بەرى 30 رەت الاڭعا شىققان ول 27 مارتە نىسانانى ءدال كوزدەدى.
حوسسەين تايەبي دە 30 جاستا. ول يراننىڭ تۋماسى. بيىلعى ازيا چەمپيوناتىندا ءوز ەلىنىڭ ۇلتتىق كومانداسى ساپىندا ازيا چەمپيونى اتانعان شابۋىلشى سول جارىستىڭ مەرگەندەر كوشىن باستادى.
جوعارىدا ەسىمدەرى اتالعان ويىنشىلاردان بولەك, «Umbro futsal awards-2018» جۇلدەسىنەن ۇمىتكەرلەر قاتارىندا «قايراتتىڭ» باس باپكەرى پاۋلو ريكاردو كاكا دا بار.
عالىم سۇلەيمەن,
«ەگەمەن قازاقستان»