ءومىر وزىڭە كەرەك, جۇرگىزۋشى!

كولىك تىزگىنىنە وتىرعاندا «ساقتانساڭ – ساقتايدى» دەگەن ءسوزدى قاپەرىمىزدەن شىعارماعانىمىز ابزال. جول ەرەجەسىنە پىسقىرمايتىن جۇرگىزۋشىلەر ءوزىنىڭ عانا ەمەس, وزگەنىڭ دە ومىرىنە قاۋىپ ءتوندىرىپ جاتادى. جان تۇرشىكتىرەر اپاتتاردان قول-اياعىنان ايىرىلىپ ارباعا تاڭىلىپ جاتقاندار قانشاما. الماتى قالاسى پد اكىمشىلىك پوليتسيا باسقارماسىنىڭ باسشىسى جاندوس مۇراتاليەۆتىڭ سوزىنە قاراعاندا, جول-كولىك وقيعالارىنىڭ ەڭ باستى سەبەبى – جۇرگىزۋشىلەردىڭ جول ەرەجەسىن ساقتاماۋى. ونىڭ ىشىندە, جىلدامدىقتى شامادان تىس اسىرىپ ءجۇرۋى نەمەسە ءتۇرلى وقىس قيمىل جاساپ باسقا كولىكتەرگە جول بەرمەۋىنىڭ سالدارىنان بولىپ جاتادى.

الماتىلىق پوليتسەيلەر جۇر­گىزۋ­شىلەرگە ساباق بولسىن دەگەن ماقساتپەن, جان­تۇرشىگەرلىك اپاتقا ۇشىراپ, تاس-تالقا­نى شىققان كولىكتەردى قالا كوشە­لەرىمەن الىپ ءوتتى. ولار مۇنداي شارا ار­قىلى جۇرگىزۋشىلەردى جولدا اباي بو­لىپ, ساق جۇرۋگە شاقىرادى. جول قۇر­بان­دارىن ۇنسىزدىكپەن ەسكە الىپ, ولاردىڭ قۇرمەتىنە گۇل شوقتارى قويىلدى.

 بۇدان بىلاي كولىك جۇرگىزۋشىلەرىنە بۇرىنعىدان دا مۇقيات بولۋعا تۋرا كەلەدى. شاھاردا جول-كولىك اپاتىن ازايتۋ ماقساتىندا پوليتسەيلەر ەندى كولىك جىلدامدىعىن قاتاڭ باقىلاۋعا الماق. وسى ورايدا بارلىق بەينەكامەرالارعا جاڭا ەرەجە ەنگىزىلگەن. ەندى قالا ىشىندە ساعاتىنا 60 نەمەسە 80 شاقىرىمنان اسىرۋعا تىيىم سالىنعان بەينەبا­قى­لاۋدان وتكەن سوڭ, كەلەسى كامەراعا جەت­كەنشە جىلدامدىقتى ۇدەتۋگە بولمايدى. اقىلدى كامەرالار كولىكتىڭ سول ارالىقتى قانشا ۋاقىتتا ءجۇرىپ وتكەنىن ءاپ-ساتتە-اق انىقتايدى.

 – جاڭا ەرەجەنىڭ ەرەكشەلىگى – جىل­دامدىق شەگىن تەك پوستتارعا جاقىن جەردەن ەمەس, بۇكىل باعىت بويىمەن انىقتايدى. قازىر جۇرگىزۋشىلەردىڭ كوبى باقىلاۋ كامەرالارىنىڭ الدىندا عانا جىلدامدىقتى ازايتىپ, پوستتان وتكەننەن كەيىن بىردەن جىلدامدىقتى مولشەردەن اسىرادى. بۇدان بىلاي ەكى پوست اراسىنداعى ۋاقىتتى ءدال كورسەتەتىن سەرۆەر ورناتامىز. ماسەلەن, ءسىز سول ارالىقتى 5 مينۋت ەمەس, 3 مينۋتتا ءجۇرىپ وتسەڭىز, جىلدامدىقتى اسىردىڭىز دەگەن ۇيعارىم شىعارىلادى, – دەيدى الماتى قالاسى پد تەحنيكالىق قىزمەت كورسەتۋ ورتالىعىنىڭ باسشىسى ولگا اگافونوۆا.

 قازىر بۇل جۇيە قالا بويىنشا 110 بەكەتكە ورناتىلىپتى. ال تاياۋ كۇن­دەرى ولاردىڭ سانىن 140-قا جەتكىزۋ كوزدەلگەن. جول ەرەجەسىن ەلەمەگەندەرگە جەلتوقسان ايىنان باستاپ ايىپپۇل سالىناتىن بولادى. 550 مىڭ كولىك رەسمي تۇردە تىركەلگەن شاھارعا, تاۋلىگىنە وزگە وڭىرلەردەن كەلىپ-كەتەتىن اۆتوكولىكتەر سانى 250 مىڭنان اسىپ جىعىلادى. مۇن­داي جاعدايدا جۇرگىزۋشىلەر مادەنيەتى مەن ءتارتىبىن قالتقىسىز قاداعالاۋ وڭاي شارۋا ەمەس. «تارتىپكە باعىنعان قۇل بولمايدى». اينالىپ كەلگەندە, ءومىرىڭ وزىڭە كەرەك, جۇرگىزۋشى!

ارمان وكتيابر,

«ەگەمەن قازاقستان»

الماتى