شيقىلداق اۋىلىنا سۋ كەلدى!..

اۋىلعا سۋ قۇبىرىن تارتۋ ءۇشىن ۇڭعىمالار قازىلعالى ءبىراز ۋاقىت وتكەن بولاتىن. ءتىپتى, شيقىلداقتىڭ سۋ قورىنا 2 جىل بويى زەرتتەۋ جۇ­مىس­تارى جۇرگىزىلدى. بۇل ماقساتقا قالا­لىق بيۋدجەتتەن 10 ميلليون تەڭگە ءبولىندى. 

– سۋ قۇبىرى قاشان تارتىلار دەپ كۇتىپ جۇردىك. ال اۋىلدا بۇرىننان بەرى جۇمىس ىستەپ تۇرعان ۇڭعىمالار بار. قۇبىردى وسى ۇڭعىمالاردان-اق تارتۋعا بولار ەدى. سۋ قورى مول, ساپاسى دا جاقسى, – دەيدى تۇرعىندار. 

يگى­لىك­تىڭ ەرتە-كەشى جوق. اۋىل تۇر­عىن­دارىن قۋانتقان بۇل يگىلىكتى ىسكە قازىر ءبارى دە ىرزا. سۋ قۇبىرىن جاڭعىرتۋ جۇمىسىنا رەسپۋبليكالىق بيۋدجەتتەن 215,8 ميلليون تەڭگە بولىنگەن. اۋىزسۋدى ۇزدىكسىز بەرۋ ءۇشىن قوس رەزەرۆۋار, سۋ مۇناراسى ور­نا­­تىلعان. سۋ قۇبىرىنىڭ ۇزىن­دىعى – 10,2 شاقىرىم. ەندى اۋىلدىقتار تاۋ­لىگىنە 12 تەكشە مەترگە دەيىن سۋ الا­تىن بولادى.

سۋ قۇبىرىن قايتا جوندەۋ جۇ­مىسىن «گيدروپروم» جشس جۇر­گىز­دى. مەردىگەر يسلامبەك قۇل­تۇ­مانوۆتىڭ ايتۋىنشا, سۋ قۇبىرىن تارتۋ, جوندەۋ جۇمىستارى بيىل ماۋ­سىم ايىندا باستالعان. 

مەر­دى­گەردىڭ مىندەتى – سۋدى اۋىل­داعى سۋ تولتىرۋ رەزەرۆۋارلارىنا دەيىن جەتكىزۋ جانە ءۇش ساتىلى سۋ تازارتۋ قۇرىلعىسىن ورناتۋ. بۇل جۇمىس جوسپارعا ساي ورىندالدى. ەندى سىيىمدىلىعى 500 تەكشە مەتر ەكى رەزەرۆۋارداعى سۋ قۇبىر ارقىلى ۇيلەرگە جەتەدى.

اۋىلدا 500-دەن استام تۇرعىن تۇرادى. اۋىزسۋ قۇبىر ارقىلى تۇرعىن ۇيلەرگە, مەكتەپكە, امبۋ­لا­توريا­عا, مادەنيەت ۇيىنە, اكىمدىككە جەتتى.  اۋىلدىڭ مەكتەبى, بالاباقشاسى, دارىگەرلىك بولىمشە جۇمىس ىستەپ تۇر. شيقىلداقتا «جارسور», «جاڭا اۋىل», «NOMAD», «رودومانوۆ», «يمانماحمۇت» سياقتى 20-عا جۋىق شارۋا قوجالىعى بار. 

ج. ايماۋىتوۆ جازعان «كۇنى­كەي­دىڭ جازىعى» اڭگىمەسىندەگى وقيعا وسى شيقىلداق اۋىلىنىڭ ماڭىندا ءوتىپتى. كەيىپكەرى دە وسى اۋىلدان. شيقىلداق دەگەن كول دە بار, باستىسى شيقىلداق دەگەن ءبىر اۋلەتتىڭ اتاسى, ادامنىڭ ەسىمى.

تۇرعىنداردىڭ ايتۋىنشا, جىل­دا كوكتەم كەزىندە ق.ساتباەۆ اتىن­داعى سۋ ارناسى ارقىلى اۋىل­دا­عى وزەندەرگە, شيقىلداق كو­لى­نە سۋ مولىنان جىبەرىلەدى. قازىر تۇزدى­كول­دىڭ سۋى ءمولدىر, تازارىپ, ءتىپتى بالىقتار ءجۇزىپ ءجۇر. باس­تى­سى – ارنادان كەلەتىن وسى مول سۋ ىسىراپسىز, اۋىلدىڭ ىرىزدىعىنا پايدالانىلۋدا. 

سونىمەن بىرگە قالاعا قاراستى بوزشاكول ستانساسىنىڭ تۇرعىندارى دا ەندى «ايماقتاردى دامىتۋ-2020» مەملەكەتتىك باعدارلاماسى ارقىلى ستانساعا سۋ قۇبىرى ارقىلى كەلەتىن ق. ساتباەۆ اتىنداعى ارنا سۋىن پايدالانا الادى.

فاريدا بىقاي,

«ەگەمەن قازاقستان» 

ەكىباستۇز قالاسى