قالا اكىمىنىڭ ءباسپاسوز قىزمەتىنىڭ حابارلاۋىنشا, بۇل ورتالىق «دەگدار» گۋمانيتارلىق قورىنىڭ قايىرىمدىلىق جوباسىنىڭ اياسىندا اۋتيزمگە شالدىققان بالالاردى وڭالتۋعا ارنالعان.
ال «ەرەكشە ءۇي» دەگەن اتاۋى بار ورتالىق قوردىڭ قامقورلىق كەڭەسىنىڭ ءتورايىمى داريعا نازارباەۆانىڭ, ەكىباستۇز قالاسى اكىمدىگىنىڭ, سونداي-اق ERG كومپانياسىنىڭ قولداۋىمەن اشىلدى
بۇل كۇندەرى قالادا اۋتيزم دەرتىنە شالدىققان 145 بالا تۇرادى, ونىڭ ىشىندە مەكتەپ جاسىنا دەيىنگىسى-109 بولسا, ولار 23 بالاباقشاعا, 8-ءى مەكتەپتەرگە بولىنگەن بولاتىن.
- قالامىزدا «ەرەكشە ءۇي» ورتالىعىنىڭ اشىلۋىنا اۋتيزم دەرتىنە شالدىققان بالالاردىڭ اتا-انالارى باستاماشى بولدى. ويتكەنى,ولار بالالارىن وڭالتۋ ءۇشىن باسقا وڭىرلەرگە, شەت ەلدەرگە اپارۋعا ءماجبۇر ەدى. ەندى مىنە, قالالىق اكىمدىك تاراپىنان اتا-انالاردىڭ وتىنىشتەرى قولداۋ تاپتى. بۇگىن ورتالىق ەسىك اشىپ, العاشقى وقۋشىلارىن قارسى الۋدا, - دەيدى ورتالىق باسشى ايدا سەيىتوۆا.
قالاداعى «ەرەكشە ءۇيدىڭ» اشىلۋىنا قالا اكىمى نۇرجان اشىمبەتوۆ, رەسپۋبليكالىق «دەگدار» قورىنىڭ توراعاسى جانات سەكسەمباەۆ, قالالىق ءماسليحات دەپۋتاتتارى قاتىستى.
بۇگىندەرى ورتالىق 32 بالامەن جۇمىس جاساۋدا. وڭالتۋ كۋرسى ءۇش ايعا ەسەپتەلگەن. جىل بويى ورتالىقتا 120-دەن استام بالا كەلەتىن بولادى.
ال ورتالىق ماماندارى بالالار مەن ولاردىڭ وتباسىلارىنا جالپى دامۋدىڭ, ءبىلىمنىڭ جانە الەۋمەتتىك بەيىمدەلۋگە قول جەتكىزۋ ءۇشىن جان-جاقتى كاسىبي قولداۋ كورسەتپەك.
اۋتيزمگە شالدىققان بالالارعا كەشەندى پسيحولوگيالىق, ءبىلىم بەرۋ, الەۋمەتتىك كومەك كورسەتۋ جانە ۋاقىتىلى انىقتاۋ.
ورتالىق ءوز جۇمىسىندا كەشەندى پەداگوگيكالىق ءادىستى قولدانادى, جەكە تۇزەتۋ باعدارلامالارىن ازىرلەيدى. ماماندار تۇزەتۋ ادىستەرى, سەنسورلىق ينتەگراتسيا, ابا-تەراپيا بويىنشا استانادا ءبىلىم الادى.
فاريدا بىقاي,
«ەگەمەن قازاقستان»
ەكىباستۇز
سۋرەتتى تۇسىرگەن: ايدانا ايتۋعانوۆا