سۇلەيمەن دەميرەل اتىنداعى ۋنيۆەرسيتەتتە جوعارى وقۋ ورىندارىمەن ءتۇرلى سالالارداعى يدەيالار مەن سوڭعى زەرتتەۋلەر ناتيجەلەرىن بىرىكتىرۋگە باعىتتالعان حالىقارالىق ەلەكتروندىق كومپيۋتەر جانە ەسەپتەۋ تەحنيكاسى (International Conference on Electronics Computer and Computation - ICECCO كونفەرەنتسياسى ءوتتى.
عىلىمي تاجىريبەلەر الاڭىنا باسقوسۋعا وتاندىق جاس عالىمدار, شەتەلدىك ساراپشىلار قاتىستى, ولاردىڭ قاتارىندا اقش-تىڭ پەرديۋ, نيگەريانىڭ نيل ۋنيۆەرسيتەتىنەن كەلگەن جانە دە نازارباەۆ ۋنيۆەرسيتەتىنىڭ پروفەسسورلارى عىلىمي ەڭبەكتەرىمەن ءبولىستى.
شەتەلدىك قوناقتارعا قازاقتىڭ قوناقجايلىق داستۇرىمەن ەرەكشە سىي-قۇرمەت جاسالدى. سدۋ رەكتورى قانات قوجاحمەت پەن ينجەنەرلىك جانە جاراتىلىستانۋ فاكۋلتەتىنىڭ دەكانى مەيرامبەك جاپاروۆ بۇگىنگى تاجىريبە الاڭىنىڭ ماڭىزدىلىعىن اتاپ ءوتتى. عالىمدار زامانۋي ترەندتەگى IT سالاسىنىڭ جان-جاقتى باعىتتارى بويىنشا كاسىبي تاقىرىپتاردى كەڭىنەن تالقىلادى. جوباعا 35 عىلىمي جۇمىس قابىلدانسا, ولاردىڭ 25-ءى وتاندىق اۆتورلاردان, 10-ى سدۋ ۋنيۆەرسيتەتىنىڭ جاس عالىمدارىنىڭ زەرتتەۋلەرى بولىپ تابىلادى. تاراتىلعان ينتەللەكتۋالدى جۇيەلەر, مەديتسينالىق ينفورماتيكا, جاساندى ينتەللەكت, عىلىمي ەسەپتەۋلەر, ساندىق سيگنالداردى وڭدەۋ, ينجەنەرلىك مودەلدەۋ جانە باقىلاۋ, باعدارلامالىق قامتاماسىز ەتۋدى جوبالاۋ, ەسەپتەۋ (ەسەپتەۋ عىلىمدارى), كومپيۋتەرلىك كورۋ, قىزىقتى قوسىمشالار جانە باعدارلامالاۋ تىلدەرى سىندى ءتۇرلى وزەكتى تاقىرىپتاردى قامتىعان عىلىمي جۇمىستار قاتىسۋشىلار تاراپىنان جوعارى باعاسىن الىپ, زور قىزىعۋشىلىق تۋعىزدى.
اقش-تىڭ پەرديۋ ۋنيۆەرسيتەتىنەن كەلگەن پروفەسسور ەريك مەتسون عىلىمي ەڭبەگىندە زامانۋي تەحنولوگيالار مۇمكىندىگىمەن دروندار ارقىلى لاڭكەستىك اكتىلەرىنىڭ جاسالۋ قاۋپى, ونىمەن كۇرەسۋ جولدارىن ءتۇسىندىردى.
كونفەرەنتسياعڭا كەلگەنىنە جىلى لەبىزىن بىلدىرگەن ساراپشى ەريك مەتسون جاس عالىمداردىڭ عىلىمي تۇرعىدا جاڭا تەحنولوگيالارمەن بايلانىستى مۇمكىندىكتەرىمەن قاتار قوعامدا بولىپ جاتقان ءتۇرلى ماسەلەلەردى كوتەرۋىنە ءوز باعاسىن بەرىپ, عىلىمي جۇمىستاردىڭ مازمۇنى مەن ماعىناسى وتە ساپالى دەگەن پىكىرىن ءبىلدىردى.
جاس عالىمدار مەن دوكتورانتتار ەلەكتروندى كومپيۋتەر جانە ەسەپتەۋ تەحنيكالارىنىڭ بارلىق اسپەكتىلەرىنەن وقۋ-ادىستەمەلىك جۇمىستارىن, ءجۇز تانۋ عىلىمى بويىنشا كۇردەلى الگوريتم, ميكرووقۋلىقتاردى ازىرلەۋ جانە تاجىريبە جۇزىندە پايدالانۋ سياقتى ءتۇرلى زەرتتەۋلەرىن جيىنعا قاتىسۋشى عالىمدار قاۋىمداستىعىنىڭ نازارىنا ۇسىندى.
سدۋ اعا وقىتۋشىسى دجەميل تۇران «كونفەرەنتسيادا تالقىلانىپ جاتقان ءتۇرلى تاقىرىپتار ەڭ الدىمەن عالىمدارعا زور تاجىريبە الماسۋ مۇمكىندىگىن ءارى زەرتتەۋ سالاسىنا تىڭ سەرپىلىس بەرەدى» دەگەن پىكىرىن ءبىلدىردى.
ەلۆيرا سەرىكقىزى,
«ەگەمەن قازاقستان»
الماتى