ەلباسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا بىرقاتار ماسەلەلەردى اتاپ كورسەتتى.
پرەزيدەنت جولداۋىندا ايتىلعان ايقىن مىندەتتەردى جۇزەگە اسىرۋ ماقساتىندا ەلىمىزدىڭ بارلىق وڭىرلەرىندە وركەندى ىستەر قولعا الىنىپ كەلەدى. بۇل رەتتە جامبىل وبلىسىندا دا حالىقتىڭ تۇرمىس ساپاسىن ارتتىرۋعا نەگىزدەلگەن جۇيەلى جۇمىستار از ەمەس. بۇل ورايدا جامبىل ءوڭىرى جاڭا نىساندارمەن تولىعۋدا. قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي اۋليەاتا وڭىرىندە 41 نىسان پايدالانۋعا بەرىلدى. ەلباسى ءوز جولداۋىندا مەديتسينالىق قىزمەت ساپاسى حالىقتىڭ الەۋمەتتىك كوڭىل-كۇيىنىڭ اسا ماڭىزدى كومپونەنتى بولىپ سانالاتىنىن باسا ايتقان بولاتىن. ۇلت ساۋلىعى قاشاندا تۇرمىس ساپاسىن ارتتىرۋدىڭ ناقتى كەپىلى. سوندىقتان دا وڭىردە اشىلعان 41 نىساننىڭ 32-ءسى مەديتسينالىق مەكەمەلەر بولىپ وتىر.
ەلباسى «ەڭ الدىمەن, اسىرەسە اۋىلدىق جەرلەردە العاشقى مەديتسينالىق-سانيتارلىق كومەكتىڭ قولجەتىمدى بولۋىن قامتاماسىز ەتۋ قاجەت. العاشقى مەديتسينالىق-سانيتارلىق كومەك كورسەتەتىن قىزمەتكەرلەردى ىنتالاندىرۋ ءۇشىن 2019 جىلدىڭ 1 قاڭتارىنان باستاپ اۋرۋلاردى ەمدەۋ ءىسىن باسقارۋدىڭ جاڭا تاسىلدەرىن ەنگىزگەن ۋچاسكەلىك مەديتسينا قىزمەتكەرلەرىنىڭ جالاقىسىن كەزەڭ-كەزەڭمەن 20 پايىزعا كوبەيتۋدى تاپسىرامىن. وسى ماقساتتارعا كەلەسى جىلى 5 ميلليارد تەڭگە بولىنەدى. 2019 جىلدىڭ 1 قاڭتارىنان باستاپ بارلىق ەمحانالار مەن اۋرۋحانالار مەديتسينالىق قۇجاتتاردى قاعازسىز, تسيفرلىق نۇسقادا جۇرگىزۋگە كوشۋگە ءتيىس. بۇل 2020 جىلعا قاراي بۇكىل تۇرعىنداردىڭ ەلەكتروندى دەنساۋلىق پاسپورتتارىن جاساۋعا, كەزەكتەردى, بيۋروكراتيانى جويۋعا, قىزمەت كورسەتۋ ساپاسىن ارتتىرۋعا مۇمكىندىك بەرەدى», – دەگەن بولاتىن مەملەكەت باسشىسى.
جامبىل وبلىستىق اكىمدىگىنىڭ مالىمەتىنشە, بۇگىنگى تاڭدا وبلىس كولەمىندە حالىق دەنساۋلىعىنىڭ ساپاسىن ارتتىرۋ ماقساتىندا اۋقىمدى جۇمىستار جۇرگىزىلۋدە. جەكەمەنشىك سەكتوردى جۇمىلدىرا وتىرىپ, قارجىلاندىرۋ مەن باسقارۋدىڭ جاڭا ادىستەرىنىڭ قولدانىلۋى سونىڭ ءبىر ايعاعى. جولداۋ جۇكتەگەن مىندەتتەر نەگىزىندە, مەديتسينالىق قىزمەت ساپاسىن ارتتىرۋ بويىنشا يننوۆاتسيالىق ءادىس-تاسىلدەرى ەنگىزىلىپ, جاڭا عيماراتتار مەن نىسانداردىڭ قۇرىلىسى جۇرگىزىلدى. مەرەكە قارساڭىندا وبلىس ورتالىعى تاراز قالاسىندا مەديتسينالىق جەدەل جاردەم ستانساسىنا بەرىلەتىن اۆتوكولىكتەردىڭ كىلتىن تاپسىرۋ سالتاناتى ءوتتى. بۇل كۇنى بارلىعى جالپى سانى 27 كولىك تاپسىرىلدى.
دارىگەر, سونىڭ ىشىندە جەدەل جاردەم دارىگەرى – قوعامداعى ەڭ قاجەتتى ماماندىق. باس اۋىرىپ, بالتىر سىزداعاندا جۇگىنەتىن ۇلكەن كومەك. اتالعان سالا وتە كۇردەلى, جانقيارلىقتى, كەيدە ادام ءومىرىن قۇتقارۋدا شۇعىل شەشىم قابىلداۋدى تالاپ ەتەدى. مەديتسينا قىزمەتكەرلەرىنىڭ تاجىريبەسى, ولارعا ءتان ادام ءومىرى مەن دەنساۋلىعىنا دەگەن جوعارى جاۋاپكەرشىلىگى ەلىمىزدەگى رەفورمالاردىڭ ءساتتى جۇزەگە اسىرىلۋىنىڭ جانە قوعامنىڭ تۇراقتى دامۋىنىڭ كەپىلى. ياعني, قوعامنىڭ باستى بايلىعى – ادام ءومىرىن ساقتاپ قالۋدا ەلەۋلى ەڭبەك ەتىپ وتىرعان جەدەل جاردەم قىزمەتىنىڭ, ولاردىڭ تەحنيكالىق جاعدايىنىڭ جاقسى بولۋىنىڭ ماڭىزى ءاردايىم وراسان.
ايتۋلى مەرەكە قارساڭىندا اشىلعان 32 مەديتسينالىق نىساننىڭ 29-ى مەملەكەتتىك-جەكەمەنشىك ارىپتەستىك اياسىندا بوي كوتەرىپ وتىر. ونىڭ ىشىندە 13 نىسان اۋىسىمىنا 5 كەلۋشىگە ارنالعان مەديتسينالىق پۋنكتتەر بولىپ سانالادى. اتالعان نىساندار بايزاق اۋدانىنداعى شاحان, كوكوزەن, جاڭاتۇرمىس, جىبەك جولى, سارىباراق, تەگىستىك, قورداي اۋدانىنداعى كوكادىر, مەركى اۋدانىنداعى ەكپىندى, سارىسۋ اۋدانىنداعى شاعالالى, قامقالى, ت.رىسقۇلوۆ اۋدانىنداعى شولاققايىڭدى, تالاس اۋدانىنداعى سەيىلبەك, تۇرىمقۇل اۋىلدارىندا ورنالاسقان.
سونداي-اق, بۇل كۇندەرى بايزاق اۋدانىنداعى ىنتىماق, جامبىل اۋدانىنداعى بەكتوبە, بەساعاش, گرودەكوۆو, پريگورودنوە, اقب ۇلىم, تۇركىسىب, جۋالى اۋدانىنداعى شاقپاقاتا, مەركى اۋدانىنداعى مىحان, سارىسۋ اۋدانىنداعى يگىلىك, شۋ اۋدانىنداعى شوقپار اۋىلدارىندا 15 كەلۋشىگە ارنالعان دارىگەرلىك امبۋلاتوريالار دا پايدالانۋعا بەرىلدى. ال, اۋىسىمىنا 10 كەلۋشىگە ارنالعان 7 فەلدشەرلىك-اكۋشەرلىك پۋنكت بايزاق اۋدانىنداعى ايمانتوبە, جامبىل اۋدانىنداعى ەرنازار, مەركى اۋدانىنداعى ەكپىندى, مويىنقۇم اۋدانىنداعى ۇلانبەل, كوكجەلەك, سارىسۋ اۋدانىنداعى ۇيىم, ت.رىسقۇلوۆ اۋدانىنداعى قاراقات, شۋ اۋدانىنداعى تاسوتكەل اۋىلدارىندا اشىلدى.
ايتا كەتۋ كەرەك, مەملەكەتتىك-جەكەمەنشىك ارىپتەستىك اياسىندا بوي كوتەرگەن 29 مەديتسينالىق نىسانعا بارلىعى 843 ميلليون تەڭگە قارجى جۇمسالعان. اتالعان مەملەكەتتىك جەكەشەلىك ارىپتەستىك شەڭبەرىندەگى بۇل نىسانداردىڭ قۇرىلىسىن سالۋ بارىسىندا وزگە وڭىرلەردەگى بيۋدجەتتىك ينۆەستيتسيالىق جوبالارمەن سالىستىرعانداعى قۇنى تومەن بولىپ, 1,4 ميلليارد تەڭگە كولەمىندە بيۋدجەتتىك قاراجات ۇنەمدەلگەن. بۇل ارقىلى اۋىلدىق جەرلەردەگى العاشقى مەديتسينالىق كومەك كورسەتۋ قاجەتتىلىگى 84 پايىزعا قامتىلاتىن بولادى. بۇگىنگى تاڭدا اتقارىلىپ وتىرعان جۇمىستار حالىقتىڭ تۇرمىس ساپاسىن ارتتىرۋمەن قاتار, مەديتسينالىق قىزمەت ساپاسىن ىلگەرىلەتۋگە دە ايرىقشا ۇلەس قوسىپ وتىر.
جالپى, جامبىل وبلىسىندا 95 العاشقى مەديتسينالىق كومەك كورسەتۋ ۇيىمدارىنا عيمارات قاجەت ەدى. بۇل بيۋدجەتتىك ينۆەستيتسيالىق جوبا رەتىندە جۇزەگە اسىرىلعاندا, وعان جالپى 6 567,6 ميلليون تەڭگە قاراجات جانە 7 جىل ۋاقىت كەرەك بولاتىن. ال, بۇل نىسانداردى وبلىس اكىمدىگى مەملەكەتتىك-جەكەمەنشىك ارىپتەستىك اياسىندا سالۋ ارقىلى مەرزىمىن 3 جىلعا, جۇمسالاتىن قارجى كولەمىن 2 376 ميلليون تەڭگەگە ۇنەمدەگەن. ناقتى ايتقاندا, 4 جىل ۋاقىت جانە 4 192 ميلليون تەڭگە قارجى ۇنەمدەلىپ وتىر. ياعني, 95 نىساننىڭ 29-ى بيىل اشىلسا, كەلەسى جىلى 40, ال 2020 جىلى 25 نىسان بوي كوتەرەدى دەپ جوسپارلانۋدا.
ەلباسى جولداۋىندا «قاۋىپسىزدىك تۇرمىس ساپاسىنىڭ اجىراماس بولىگى بولىپ سانالادى» دەي كەلە, ەڭ الدىمەن, پوليتسيا جۇمىسىن تۇبەگەيلى جاقسارتۋدى ايتقان بولاتىن. ناتيجەسىندە, تۇڭعىش پرەزيدەنت كۇنىنە وراي جامبىل وبلىسىندا حالىقتىڭ مەديتسينالىق مەكەمەلەرگە دەگەن قولجەتىمدىلىگىن ارتتىرۋعا ارنالعان نىسانداردان بولەك, جۇرتشىلىقتىڭ الەۋمەتتىك تۇرمىس ساپاسىن ارتتىرۋعا نەگىزدەلگەن مەكەمەلەر دە ەل يگىلىگىنە بەرىلدى. اتاپ ايتار بولساق, تاراز قالاسىندا پوليتسيا باسقارماسى №1 پوليتسيا ءبولىمىنىڭ قابىلداۋ بولمەسى اشىلدى. سونىمەن قاتار, جامبىل اۋدانىندا ء«مولدىر», جۋالى اۋدانىندا «اسەم دوستار» جەكەمەنشىك بالاباقشالارى, قورداي اۋدانىندا 75 ورىندىق «بالالىق-شۋاعى», 50 ورىندىق «نۇر-ءادىل»», 50 ورىندىق «بالالىق بازارى» بالاباقشالارى جانە 120 ورىندىق «بولاشاق» شاعىن ورتالىعى, ت.رىسقۇلوۆ اۋدانىندا 120 ورىندىق «بوتا» بوبەكجايى جانە اۋقاتتى اۋىلدىق پوليتسيا بولىمشەلەرى پايدالانۋعا بەرىلدى. ايتۋلى كۇن قارساڭىندا پايدالانۋعا بەرىلگەن بۇل بارلىق 41 نىسان الداعى ۋاقىتتا دا ەلباسى جولداۋىنداعى نەگىزگى مىندەتتەردىڭ ورىندالۋى جولىندا ەل يگىلىگى ءۇشىن جۇمىس اتقارا بەرەتىن بولادى.
حاميت ەسامان,
«ەگەمەن قازاقستان»
جامبىل وبلىسى