كورمە مەن مۋزىكانى توعىستىرعان شارا ءوتتى

مادەنيەت جانە سپورت مينيسترلىگى, استانا قالاسى اكىمدىگى جانە «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ۇيىمداستىرۋىمەن وتكەن كورمە ءۇش بولىمگە توپتاستىرىلعان. وندا «ازىرەت سۇلتان» مەملەكەتتىك تاريحي-مادەني قورىق-مۋزەيى قورىنان 60-تان استام جادىگەر قويىلدى.

كورمەنىڭ ءبىرىنشى بولىمىندە ەلباسى ن.ءا.نازارباەۆتىڭ 1985 جىلى قازاق سسر مينيسترلەر كابينەتىنىڭ باسشىسى, تاۋەلسىز قازاقستاننىڭ تۇڭعىش پرەزيدەنتى تۇسىنداعى, باۋىرلاس تۇركيا رەسپۋبليكاسىنىڭ پرەزيدەنتتەرى تۇرعىت وزال, سۇلەيمەن دەميرەل, احمەت سەزار, ابدۋللا گۇل, رەدجەپ تايىپ ەردوعان, وزبەكستان رەسپۋبليكاسىنىڭ تۇڭعىش پرەزيدەنتى ي.كاريموۆپەن, 2018 جىلعى تۇركىستانداعى رەسمي ساپارلارىنان سىر شەرتەتىن فوتوسۋرەتتەرى ەكسپوزيتسيادان ورىن الدى.

كورمەنىڭ ەكىنشى ءبولىمى اۋليەلەردىڭ سۇلتانى اتانعان قوجا احمەت ياساۋي مۇراسىنا ارنالدى. قوجا احمەت ءياساۋيدىڭ ارتىندا قالعان باعا جەتپەس مۇرالارى ءحVىىى عاسىرعا ءتان «ديۋاني حيكمەت» كىتابىنىڭ قولجازبا جانە باسپا نۇسقالارى, ءحىح عاسىردا قايتا كوشىرىلگەن ء«ريسوللا ءدار ادابي تاريقات», «ناسابناما» شەجىرەسى سەكىلدى كوپتەگەن ەڭبەگى قويىلدى.

كورمەنىڭ ءۇشىنشى بولىمىندە تۇركىستان وڭىرىندەگى كيەلى ورىندار مەن تاريحي ەسكەرتكىشتەر جايىندا فوتوسۋرەتتەر كوپشىلىك نازارىنا ۇسىنىلدى.

سونىمەن قاتار, «استانا» كونتسەرت زالىندا تۇڭعىش رەت قوجا احمەت ءياساۋيدىڭ حيكمەتتەرىنە قالام تارتقان ەلگە بەلگىلى اعايىندى كومپوزيتورلار سەرىكجان جانە ءالىبي ءابدىنۇروۆتاردىڭ «ازىرەت قونعان تۇركىستان» كونتسەرتى ءوتتى.

ايتۋلى كەشكە استانا قالاسى مەملەكەتتىك فيلارمونياسىنىڭ اكادەميالىق سيمفونيالىق وركەسترى, كامەرالىق حورى, جەكە ورىنداۋشىلار جانە پاۆلودار قالاسىنان ارنايى كەلگەن ۆوكالدىق كۆينتەت (انشىلەر توبى) قاتىستى.

كەشتە ق.ا.ءياساۋيدىڭ حيكمەتتەرىنە جازىلعان كوپتەگەن شىعارمالار ورىندالدى. ولاردىڭ قاتارىندا ءداستۇرلى انشىلەردىڭ – «راسۋلدىڭ ريزالىعى», «سالاۋات», «اش, ەي مومىن كوزىڭدى» شىعارمالارى, قىلقوبىزبەن – «ديۋاني حيكمەت», بايانمەن – «ارىستانباب», سكريپكا اسپاپتارىمەن – «كۇي-تولعاۋ», اقىن جانە سيمفونيالىق وركەسترمەن – «قوجا احمەت ياساۋي» شىعارمالارى ورىندالدى.

«ازىرەت سۇلتان» مەملەكەتتىك تاريحي-مادەني قورىق-مۋزەيى ديرەكتورى نۇربولات احمەتجانوۆتىڭ ايتۋىنشا, ەلباسىمىز ن.ءا.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى مەن جاقىندا جاريالانعان « ۇلى دالانىڭ جەتى قىرى» اتتى ماقالاسىندا التاي مەن اتىراۋدىڭ اراسىن, ەرتىس پەن ەسىلدىڭ جاعاسىن مەكەندەپ, قاراتاۋدان ۇلىتاۋعا دەيىنگى ۇلى دالانى جايلاعان ۇلتىمىزدىڭ ۇلىلىعىنا, بابالارىمىزدىڭ باتىرلىعىنا ەل تاعى دا ءبىر مارتە قانىقتى. ۇلى دالانىڭ ۇلى ەسىمدەرىن حالىق جادىندا ماڭگى ساقتاۋ ارقىلى ۇلى بابامىز قوجا احمەت ءياساۋيدىڭ رۋحاني مۇراسى مەن ءىلىمىن حالىق ساناسىندا جاڭعىرتىپ قانا قويماي, ءتۇبى ءبىر تۇركى دۇنيەسى رۋحاني تاريحىنىڭ جاڭا بەتتەرىن تانۋعا جول اشىلدى دەۋگە تولىق نەگىز بار.

– بيىل قورىق-مۋزەيىنىڭ 40 جىلدىق مەرەيتويى. وسىعان وراي, بىرنەشە شارالار ۇيىمداستىرىلدى. العاش رەت تۇركيا, گرەكيا, رەسەيدىڭ سوچي قالالارىندا كورمە ۇيىمداستىرىپ, قازاقستاننىڭ كيەلى جەرلەرىن, ۇلىلارىمىزدى جانە تۋريستىك ايماقتارىمىزدى تانىستىردىق. باستى ماقساتىمىز – ەلىمىزدىڭ, ونىڭ ىشىندە تۇركىستاننىڭ ءتۋريزمىن دامىتۋ جانە وعان شەتەلدىكتەردى تارتۋ. ال تۇڭعىش رەت قوجا احمەت ءياساۋيدىڭ حيكمەتتەرىن كاسىبي مۋزىكا تىلىمەن ناسيحاتتاۋدىڭ باستى سەبەبى – سوڭىندا قالعان تەلەگەي-تەڭىز رۋحاني مۇراسىن جۇرتشىلىققا قازىرگى مۋزىكا ستيلىمەن جەتكىزۋ. بۇل باستامامىزعا تۇركسوي ۇيىمى قىزىعۋشىلىق تانىتىپ وتىر. الداعى ۋاقىتتا وسى جوبانى ارى قاراي دامىتىپ, ق.ا.ءياساۋيدىڭ حيكمەتتەرىن وزگە ەلدىڭ تىلدەرىنە اۋدارىپ, شەت مەملەكەتتەردە كونتسەرت ۇيىمداستىرۋ جوسپاردا بار, – دەدى قورىق-مۋزەيىنىڭ ديرەكتورى.

الماس ماناپ,

«ەگەمەن قازاقستان»