وبلىس ورتالىعىنداعى «سارىارقا» دەپ اتالاتىن جاڭا شاعىن اۋداندا ەكى تۇرعىن ءۇي پايدالانۋعا بەرىلدى.
تۇرعىنداردى تۇڭعىش پرەزيدەنت كۇنىمەن قاتار كەلگەن قۋانىشتارىمەن وبلىس اكىمى بولات باقاۋوۆ قۇتتىقتاپ, پاتەر كىلتتەرىن تابىس ەتتى.
ال, «2020 جىلعا دەيىن وڭىرلەردى دامىتۋ» باعدارلاماسى ارقىلى سالىنىپ جاتقان «سارىارقا» شاعىن اۋدانىنداعى تۇرعىن ۇيلەر كەشەنىنىڭ قۇرىلىسى 2021 جىلى اياقتالادى.
سونىمەن بىرگە, «نۇرلى جەر» باعدارلاماسى بويىنشا بۇل كۇندەرى وبلىس ورتالىعىندا «دوستىق» شاعىن اۋدانىنىڭ قۇرىلىسى باستالدى.
جاڭا ۇيدەن پاتەر العان ينديرا سايفۋروۆا 15 جىلداي كەزەكتە تۇرىپ, قاراجاتىن «تۇرعىن ءۇي قۇرىلىس جيناق» اق بانكىندە جيناعان.
- «نۇرلى جەر» باعدارلاماسى بويىنشا پاتەر قۇنىنىڭ 50 پايىزىن جيناپ, پاتەر الدىم. ەندى 6 جىل ىشىندە قالعان اقشاسىن تولەيمىن,-دەيدى ينديرا.
پاتەرلەردىڭ ءبىر شارشى مەترى 121 مىڭ تەڭگە. مەملەكەتتىك باعدارلامالارعا قاتىسۋ ءۇشىن «تۇرعىن ءۇي قۇرىلىس جيناق» اق بانكىندە پاتەر قۇنىنىڭ 20 پايىزىن قۇرايتىن سالىمعا يە بولۋ كەرەك. بانك وكىلدەرىنىڭ ايتۋلارىنشا, جىل سوڭىنا دەيىن تاعى 288 سالىمشى پاتەر الماقشى.
فاريدا بىقاي
«ەگەمەن قازاقستان»
پاۆلودار
سۋرەتتى تۇسىرگەن: ۆالەري بۋگاەۆ