بۇگىن تۇڭعىش پرەزيدەنت كۇنى مەرەكەسىندە وبلىس اكىمىنىڭ ورىنباسارى اسەم ءنۇسىپوۆا مەن وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ, ورىنباسارى رايفا سافيوللينوۆا وسكەمەندەگى انا مەن بالا ورتالىعىنا ارنايى كەلىپ, مەيرامدا دۇنيەگە ءسابي اكەلگەن انالاردى قۇتتىقتاپ, سىيلىقتار تاپسىردى.
بۇگىن وسى ورتالىقتا 18 ءسابي ءومىر ەسىگىن اشىپتى. سونىڭ ۇشەۋى ەگىز ەكەن. جالپى, وبلىس بويىنشا بۇگىن 30-عا جۋىق نارەستەنىڭ كىندىگى كەسىلىپتى (تۇسكە دەيىنگى دەرەكتەر). اكىمدىك قىزمەتكەرلەرى ءسابيلى بولعان ءاربىر انانى پالاتاسىنا كىرىپ قۇتتىقتاپ, جىلى لەبىزدەرىن ءبىلدىرىپ, توسەك, اۆتوكرەسلو, اربا سەكىلدى قاجەتتى دۇنيەلەردى سالتاناتتى تۇردە تابىس ەتتى.
پالاتالاردى ارالاۋ بارىسىندا ەكى انا ىرىمداپ, جاڭا تۋعان نارەستەلەرىنە نۇرسۇلتان دەپ ات قويعانىن جەتكىزدى. «بۇگىن ەرەكشە كۇن. بارشا وبلىس تۇرعىندارىن ايتۋلى كۇنمەن قۇتتىقتايمىن. مىنا عاجاپتى كورمەيسىزدەر مە, تۇڭعىش پرەزيدەنت كۇنىندە انا مەن بالا ورتالىعىندا ءۇش ەگىز بالا دۇنيەگە كەلدى. جالپى, كۇن سايىن وڭىرىمىزدە 60-قا جۋىق ءسابي ءومىر ەسىگىن اشادى. جىلىنا 22 مىڭنان استام بالا كىندىگىن كەستىرەدى. سوڭعى ءۇش جىلدا وبلىستا بالالار ەمحانالارىن جابدىقتاۋعا ەرەكشە كوڭىل ءبولىنىپ جاتىر. بۇل ماقساتقا جەرگىلىكتى بيۋدجەت ەسەبىنەن 4,7 ميلليارد تەڭگە كولەمىندە قارجى ءبولىندى. سەمەي قالاسى مەن اياگوز مەن التاي اۋداندارىنداعى پەرزەنتحانالاردى ءۇشىنشى دەڭگەيگە كوتەردىك. 50-گە جۋىق بالا دارىگەرى شەت ەلدە وقىپ كەلدى. كەلەسى جىلى وسىنشا دارىگەرلەردى تاعى دا وقۋعا جىبەرەمىز», - دەيدى وبلىس اكىمىنىڭ ورىنباسارى.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن تىلەۋبەك شاياحمەت