سەيسەنبى جانە سارسەنبى كۇندەرى فۋتبولدان ۋەفا چەمپيوندار ليگاسىنىڭ 5-ءشى تۋر ويىندارى ءوتىپ, پلەي-وفف كەزەڭىنە شىققان 16 كوماندانىڭ 12-ءسى انىقتالدى. قالعان ءتورت كوماندانىڭ اتى سوڭعى تۋردا بەلگىلى بولماق.
اتالعان ءتۋرنيردىڭ 1/8 فينالىنا جولدامانى ەڭ ءبىرىنشى بولىپ يسپانيانىڭ «بارسەلونا» كومانداسى ءۇشىنشى تۋردا-اق يەلەنىپ قويعان-دى. بەسىنشى تۋردىڭ ءبىرىنشى كۇنىندە 7 كوماندا توپتىق كەزەڭنەن شىقتى. ولار: «باۆاريا» (گەرمانيا), «اياكس» (نيدەرلاندى), «رەال» (يسپانيا), «روما» مەن «يۋۆەنتۋس» (يتاليا) جانە «مانچەستەر سيتي» مەن «مانچەستەر يۋنايتەد» (انگليا) كوماندالارى.
ەكىنشى كۇننىڭ قورىتىندىسى بويىنشا, «اتلەتيكو» (يسپانيا), «بورۋسسيا د» مەن «شالكە» (گەرمانيا) جانە «پورتۋ» (پورتۋگاليا) چەمپيوندار ليگاسىنىڭ كەلەسى كەزەڭىنە شىقتى. ال قالعان ءتورت جولدامانى سوڭعى تۋردا «ناپولي» مەن «ينتەر» (يتاليا), پسج مەن «ليون» (فرانتسيا), «ليۆەرپۋل» مەن «توتتەنحەم» (انگليا) جانە «شاحتەر» (ۋكراينا) كلۋبى ساراپقا سالادى.
ءالي بيتورە,
«ەگەمەن قازاقستان»