ەلىمىزدە جۇزەگە اسىرىلىپ جاتقان «7-20-25» يپوتەكالىق باعدارلاماسى بويىنشا بانكتەرگە 57 ميلليارد تەڭگەنى قۇرايتىن 4831 ءوتىنىش كەلىپ ءتۇستى. ونىڭ 37 ميلليارد تەڭگەسى يپوتەكاعا بەرىلىپ, 3144 ءوتىنىش ماقۇلدانعان. بۇل تۋرالى استانا قالاسى اكىمدىگىنىڭ ءباسپاسوز الاڭىندا كەڭىنەن ءسوز بولدى.
جيىندا ءسوز العان يپوتەكالىق «باسپانا» ۇيىمىنىڭ باسقارما توراعاسىنىڭ ورىنباسارى دارحان بايقۋاتوۆ اتالعان باعدارلامانىڭ بۇگىنگى تاڭدا سۇرانىسقا يە ەكەنىن جەتكىزدى. ونىڭ ايتۋىنشا, باعدارلامادا بەلسەندىلىك تانىتقان وڭىرلەردىڭ كوش باسىندا استانا, الماتى قالالارى مەن ماڭعىستاۋ وبلىسى تۇر. استانا قالاسىندا ماقۇلدانعان نەسيە سوماسى 15 ميلليارد تەڭگەدەن اسادى. باعدارلاماعا قاتىسۋشى بانكتەر مىڭنان استام استانالىقتاردىڭ ءوتىنىشىن ماقۇلداعان. بۇعان دەيىن وڭىرلەردە «7-20-25» بويىنشا تۇرعىن ءۇي تاپشىلىعى سەزىلەتىندىگى ايتىلعان بولاتىن. بۇل ماسەلەنى «باسپانا» ۇيىمىنىڭ باسشىلىعى دا راستاپ وتىر.
اتالعان يپوتەكالىق باعدارلامانىڭ تالاپتارىنا سايكەس تەك جاڭادان سالىنعان تۇرعىن ۇيلەر بەرىلۋى ءتيىس. وسى ورايدا وڭىرلەردە باسپانالار سانى جەتىسپەيدى. بۇل ماسەلەنى شەشۋ ماقساتىندا جەرگىلىكتى اتقارۋشى ورگاندارعا 150 ميلليارد تەڭگە ءبولۋ قاراستىرىلعان. بولىنگەن قاراجاتقا تۇرعىن ۇيلەر سالۋ ءۇشىن كەم دەگەندە 1 جارىم, 2 جىل كەتەدى, دەدى د.بايقۋاتوۆ. ونىڭ ايتۋىنشا, بۇگىندە اتالعان باعدارلاما بويىنشا حالىق بانك, تسەنتركرەديت, اتفبانك, تسەسنابانك, Bank RBK, ەۋرازيالىق بانك, ForteBank نەسيە بەرەدى.
ال «باسپانا» يپوتەكالىق ۇيىمى» اق دەپارتامەنت ديرەكتورى قانات ابدرايموۆ ەلوردادا 15 ملن تەڭگەنىڭ پاتەرىن الۋ ءۇشىن تابىس مولشەرى 160 مىڭ تەڭگە كولەمىندە بولۋ قاجەت ەكەنىن ايتتى.
− مىسالى, استانادا پاتەردىڭ باعاسى 15 ملن تەڭگە دەپ الايىق. دەمەك, ازامات اي سايىن پاتەرگە 84 613 مىڭ تەڭگە تولەۋى قاجەت. ەندى وسى ساندى ەكىگە كوبەيتەمىز, شامامەن 160 مىڭ تەڭگە شىعادى. بۇل ازاماتتىڭ اي سايىن الاتىن جالاقىسى. ەندى مۇعالىمنىڭ جالاقىسىن 60-80 مىڭ تەڭگە دەپ الايىق. استانا قالاسىنداعى ورتاشا جالاقى مولشەرىن ايتا المايمىن. ەگەر ازامات پاتەر العىسى كەلىپ, بىراق تولەم قابىلەتىن راستاي الماسا, وزگە قارىز الۋشىنى كومەككە شاقىرا الادى. تۋىسى بولۋ مىندەتتى ەمەس. وسى تابىستىڭ كولەمىمەن ءوزىن باسپانامەن قامتاماسىز ەتۋگە بولادى. وسىلايشا اتالعان باعدارلاماعا قاتىسا الادى», دەدى ول.
ايتا كەتەرلىگى, باعدارلاما اياسىندا, باستاپقى جارنانى تولەۋ ءۇشىن مەملەكەتتىك قىزمەتكەرلەرگە ياعني, مۇعالىمدەر مەن دارىگەرلەر جانە پوليتسيا قىزمەتكەرىنە 1 ملن تەڭگە كولەمىندە سۋبسيديا بەرىلمەك. استانا قالاسى بويىنشا جىل سوڭىنا دەيىن 100 سەرتيفيكات بەرىلەدى دەپ جوسپارلانۋدا. كەلەر جىلى بۇل كورسەتكىش 3 مىڭعا جەتپەك. بۇعان دەيىن «باسپانا» ۇيىمى شىمكەنت قالاسى اكىمدىگىمەن بىرگە العاشقى جوبانى ىسكە قوسقان بولاتىن. جوبا بويىنشا شىمكەنت اكىمدىگى 2 مىڭعا جۋىق تۇرعىنعا قولداۋ كورسەتۋ ءۇشىن 2 ملرد تەڭگە سۋبسيديا بولگەن ەدى. الداعى ۋاقىتتا ەلىمىزدىڭ وزگە وڭىرلەرى دە بۇل ىزگى باستامانى جالعاستىرادى دەپ كۇتىلۋدە.
ەركەجان ايتقازى,
«ەگەمەن قازاقستان»