ماڭعىستاۋ وبلىسىنا كەلەتىن تۋريستەردىڭ سانى جىل سايىن ارتىپ كەلەدى. ايماققا بيىل 220 مىڭ ساياحاتشى كەلىپتى.
ماڭعىستاۋ وبلىستىق تۋريزم باسقارماسىنىڭ باسشىسى ءو.بيساقاەۆتىڭ ايتۋىنشا, 2017 جىلى ماڭعىستاۋ وبلىسىنا 205 904 تۋريست كەلگەن. بۇل 2016 جىلعا قاراعاندا 7 پروتسەنتكە وسكەندىگىن كورسەتەدى. 205 904 ساياحاتتاۋشىنىڭ 177 178-ءى ەل ازاماتتارى ياعني ىشكى ءتۋريزمدى قۇرايدى. ال, 280 726 ادام شەتەلدەن كەلگەن.
ال, 2020 جىلعا دەيىن ايماققا ات باسىن تىرەيتىن قوناقتاردىڭ سانى 400 مىڭعا دەيىن وسەدى, 2025 جىلعا دەيى بۇل كورسەتكىش 700 مىڭنان اساتىن بولادى.
- وسىعان بايلانىستى 7-8 مىڭ ورىندى قۇرايتىن قوناق ۇيلەر سالىناتىن بولادى. قازىرگى تاڭدا وبلىستا 82 قوناقۇي بار, ونىڭ ىشىندە «3-4-5 جۇلدىزدى» ساناتىمەن 16 قوناق ءۇي جۇمىس ىستەپ تۇر, دەدى باسقارما باسشىسى. قوناق ۇيلەر مەن باسقا دا تۋريستىك نىسانداردىڭ قۇرىلىسىن سالۋعا قاجەتتى ينۆەستيتسيانى قامتاماسىز ءۇشىن 5 جىلعا ارنالعان جوسپار قۇرىلىپ جاتىر. جەرگىلىكتى بيلىك كاسپي جاعالاۋى بويىمەن اقتاۋ قالاسىنان قۇرىق پورتىنا دەيىن جاعاجاي ءتۋريزمىن دامىتپاقشى. اۋماقتىڭ ۇزىندىعى 63 شاقىرىم. جاسالىپ جاتقان ءتۋريزمدى دامىتۋ مەملەكەتتىك باعدارلاماسىنا جەتىسپەيتىن ەلەكتر قۋاتىمەن, سۋمەن, گازبەن قامتۋ, سونىمەن قاتار قولدانىستاعى جولدى ءتورت جولاققا دەيىن كەڭەيتۋ قۇرىلىستارى بويىنشا جوبالار ەنگىزىلدى. بۇل جۇمىستارعا رەسپۋبليكالىق بيۋدجەتتەن 2019-2020 جىلدارعا 27 ميلليارد تەڭگە قاراجات باعىتتاۋ جوسپارلانۋدا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى