مەنىڭ قازاقستان رەسپۋبليكاسىمەن كاسىبي تانىستىعىم 11 جىل بۇرىن ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى مەن ن.گ.چەرنىشەۆسكي اتىنداعى ساراتوۆ مەملەكەتتىك ۋنيۆەرسيتەتى اراسىنداعى ىنتىماقتاستىق تۋرالى كەلىسىمگە قول قويۋعا بارعان ساتتەن باستالدى.
بۇدان سوڭ استانا, الماتى جانە ورال قالالارىنداعى جوعارى وقۋ ورىندارى مەن ساراپتامالىق ورتالىقتارىنا بىرنەشە رەت ىسساپارمەن بارۋدىڭ ءساتى ءتۇستى. الايدا, سول كەزدە قالتامداعى سوڭعى اقشاما قازاقستان پرەزيدەنتى نۇرسۇلتان نازارباەۆتىڭ كىتاپتارىن («ۆ پوتوكە يستوري», «ەپيتسەنتر ميرا», «كريتيچەسكوە دەسياتيلەتيە» جانە باسقالارى) ساتىپ العان العاشقى ساپارىم ەسىمدە ساقتالىپ قالدى.
ءبىر ارىپتەسىمنىڭ: «ساعان ن.نازارباەۆتىڭ ەڭبەكتەرىنىڭ كەرەگى قانشا؟» دەگەن ساۋالىنا, «قالاي؟ ءسىز ونىڭ نەلىكتەن قاجەت ەكەندىگىن تۇسىنبەدىڭىز بە؟ بۇل ناعىز دەرەككوز! بۇل زاماناۋي قازاقستاننىڭ ستراتەگياسى مەن دامۋ جولى», دەپ تاڭىرقاي جاۋاپ بەرگەنىم ەسىمدە. وسى وقيعادان سوڭ قازاقستان پرەزيدەنتىنىڭ جىل سايىنعى جولداۋلارىن مۇقيات تالداي كەلە قازاقستاندىق قوعامعا زور ىقپالىن تيگىزەتىن ۇزاقمەرزىمدى «قازاقستان-2030», «قازاقستان-2050», «رۋحاني جاڭعىرۋ» باعدارلامالارىنىڭ بارىنا شىن كوڭىلىممەن قۋاندىم.
مۇنداي قۇجاتتارعا ادەتتە ءتۇرلى كوزقاراس بولعانىمەن, ولاردىڭ مەملەكەتتىڭ دامۋى مەن ۇلتتىق يدەيانى قالىپتاستىرۋعا ىقپالى زور بولادى. بيىلعى 21 قاراشا كۇنى اقوردانىڭ رەسمي سايتىندا قازاقستان پرەزيدەنتى نۇرسۇلتان نازارباەۆتىڭ « ۇلى دالانىڭ جەتى قىرى» اتتى ماقالاسى جاريالانىپ, ونىڭ «رۋحاني جاڭعىرۋ» باعدارلاماسىنىڭ زاڭدى جالعاسى ەكەندىگىنە كوز جەتكىزدىم. بۇل ەڭبەكتە ەل تاريحى مەن قازاق حالقىنىڭ الەمدىك دامۋعا قوسقان ۇلەسى باستى نازارعا الىنعان. وعان قوسا, ماقالادا قازاقستاننىڭ تاريحي ساباقتاستىقتىڭ جالعاستىرۋشى قاسيەتىنە, قازاق دالاسىنىڭ ۇلى جەتىستىكتەرى جانە قازاق حالقىنىڭ بۇگىنى مەن ەرتەڭىنە ماڭىز بەرىلگەن.
ماقالا قازىرگى ءساتتىڭ ماڭىزىن اشىق سيپاتتايدى – قازاقستان ساياسي ترانزيت جاعدايى مەن ۇرپاق الماسۋىنىڭ الدىندا تۇر. جاڭا بۋىن نەمەسە تسيفرلى قوعامنىڭ بيىك مۇراتتارى, ومىرلىك باعدارى جانە دامۋ كەلەشەگى بويىنشا الدىڭعى بۋىننان ايتارلىقتاي وزگەشە بولاتىندىقتان, ۇرپاقتار ساباقتاستىعىنىڭ ءتىنى اجىراپ كەتپەۋى ءتيىس.
الايدا, تاريحي جادىنى ساقتاپ قالۋ مەن بايىتۋ ۇدەرىسىندە قازاقستان الەۋمەتتىك-ەكونوميكالىق تۇرعىدا وركەندەۋدى, ادام كاپيتالىن دامىتۋدى قاپەردەن شىعارماۋ قاجەت. ءوزىنىڭ وتكەنىمەن ماقتانۋ, ۇزدىك داستۇرلەردى ۇرپاقتارىنا ءسىڭىرۋ, جارقىن بولاشاعىنا سەنۋ – تولىق قالىپتاسقان ءارى وزىنە سەنىمدى ادامنىڭ ءىسى.
مارينا لاپەنكو,
تاريح عىلىمدارىنىڭ كانديداتى, ن.گ. چەرنىشەۆسكي اتىنداعى ساراتوۆ مەملەكەتتىك ۋنيۆەرسيتەتى تاريح جانە حالىقارالىق قاتىناستار ينستيتۋتى حالىقارالىق قاتىناستار جانە رەسەيدىڭ سىرتقى ساياساتى كافەدراسىنىڭ دوتسەنتى, «ەۋرازيا-پوۆولجە» اقپاراتتىق-ساراپتامالىق ورتالىعىنىڭ ديرەكتورى