كۇرشىم اۋدانى اۋىل شارۋاشىلىعىن دامىتۋعا, ونىڭ ىشىندە تاۋارلى-ءسۇت فەرمالارىن اشۋعا, مال بورداقىلاۋ الاڭدارىن سالۋعا, كووپەراتيۆ جۇمىستارىن جانداندىرۋعا, دۇرىس پايدالانىلماي جاتقان جەرلەردى قايتارۋعا دەن قويماق.
«جوسپار كوپ. مەكتەپتەردى تازا ەكولوگيالىق ونىمدەرمەن قامتاماسىز ەتۋ ءۇشىن تاۋارلى-ءسۇت فەرمالارىن اشىپ, شاعىن تسەحتار قۇرىپ, پاستەرلەنگەن ءسۇت, ماي, ىرىمشىك شىعارساق دەيمىز. كووپەراتيۆ جۇمىستارىن جانداندىرۋ دا ويىمىزدا بار. جاسىراتىنى جوق, قازىر ەشكىم مال باققىسى كەلمەيدى. تۇرعىندارعا: «كووپەراتيۆ اشامىز, مالدىڭ ءبارىن سوندا قوساسىزدار. ءسۇتتى كووپەراتيۆ توراعاسىنا وتكىزەسىزدەر. اقشالارىڭىزدى كۇندەلىكتى تولەپ وتىرادى» دەپ ءتۇسىندىرىپ جاتىرمىز. نەگىزى اۋداننىڭ بارلىق اۋىلدىق وكرۋگتەرىندە كووپەراتيۆتەر اشىلعان. بىراق جۇمىستارى دۇرىس جۇرمەي تۇر. كەلەسى جىلى اباي مەن بۋراباي اۋىلدارىندا مىڭ باسقا ارنالعان ەكى مال بورداقىلاۋ الاڭىن اشۋدى جوسپارلاپ وتىرمىز. دۇرىس, ءتيىمدى پايدالانبايتىن جەرلەردى مەملەكەتكە قايتارىپ, ول جەرلەردى تاۋارلى ءسۇت فەرمالارىن اشۋعا, بورداقىلاۋ الاڭدارىن سالۋعا بەرسەك دەيمىز», دەيدى كۇرشىم اۋدانىنىڭ اكىمى دۋلات قاجانوۆ.
سونىمەن قاتار اۋدانداعى دەربەس بيۋدجەتكە يە بولعان 5 اۋىلدىق وكرۋگكە 10 ميلليون تەڭگەدەن قاراجات ءبولۋ, مارقاكول كولى جانىنداعى ۇرانقاي اۋىلىنا 6 گەكتار جەرگە 1 ميلليارد تەڭگەگە دەمالىس بازاسىن سالۋ جوسپارلانىپ وتىرعان كورىنەدى. بۇل جوبانى جەكە كاسىپكەرلەر جۇزەگە اسىرماق. جاقىندا اۋدان اكىمدىگىمەن مەموراندۋم جاساسىپتى. كۇرشىمدە 60 پاتەرلى ءۇي سالۋ جانە كۇرشىم مەن مارقاكول اۋىلدارىنىڭ كارىز جۇيەلەرىن جوندەۋ ءۇشىن جوبالىق-سمەتالىق قۇجاتتار ازىرلەنگەن. مارالدى اۋىلىنىڭ سۋ قۇبىرىن جوندەۋ دە جوسپارعا ەندى. جالپى بۇگىندە كۇرشىم اۋدانىنىڭ اۋىزسۋمەن قامتىلۋى 60 پايىزدى قۇرايدى. «اۋدانداعى وزەكتى ماسەلەنىڭ ءبىرى – مادەنيەت ۇيلەرىنىڭ جاعدايى. اۋدانداعى 10-عا جۋىق مادەنيەت ءۇيى جوندەۋدى قاجەت ەتەدى. ماتەريالدىق-تەحنيكالىق بازاسى ناشار. وسى ماسەلەگە كوڭىل ءبولۋ كەرەك», دەيدى ول.
ازامات قاسىم,
«ەگەمەن قازاقستان»
شىعىس قازاقستان وبلىسى,
كۇرشىم اۋدانى