پەتروپاۆل بوتانيكالىق باعىندا اگاۆا وسىمدىگى 1912 جىلدان بەرى وسەدى. وسىندا ەت كومبيناتى قۇرىلىسىن جۇرگىزۋگە سانكت-پەتەربۋرگتەن ارنايى جىبەرىلگەن اسكەري ينجەنەر, پولكوۆنيك يلحام كۋراپوۆ كوك گۇلدى ەكى اگاۆانى وزىمەن بىرگە الا كەلىپتى. قازىر مۇندا ەكى مىڭعا جۋىق تروپيكالىق, سۋتروپيكالىق اعاشتار مەن وسىمدىكتەردى كەزىكتىرۋگە بولادى. ولاردىڭ اراسىندا لالا گۇلدى تۇقىمداس مەكسيكالىق, امەريكالىق اگاۆانىڭ ورنى بولەك.
جۋىردا قالا جۇرتشىلىعى توسىن وقيعانىڭ كۋاسى بولدى. بيىكتىگى توعىز مەترگە جەتەتىن اگاۆا گۇل جارىپ, حوش ءيىسى مۇرىن قىتىقتادى.
– ونىڭ ەرەكشەلىگى سول, ءجۇز جىلدا ءبىر رەت گۇلدەيدى. جارتى عاسىرعا جۋىق باپتاپ كەلسەم دە, مۇنداي عاجايىپ ءساتتى ءبىرىنشى رەت كەزدەستىرىپ وتىرمىن. قازاقستاندا دەكوراتيۆتى ماقساتتا عانا وسىرىلسە, مەكسيكادا كۇندەلىكتى تۇرمىستا كەڭىنەن قولدانىلادى. جاپىراعىنان ماتا جاساپ, ساباعىنان ارقان, ءجىپ ەسەدى. تىكەنىن ينە رەتىندە پايدالانادى. ەفير, سپيرت مايىن, سابىن, تەكيلا وندىرەدى. مەديتسيناعا دا جاراتادى, – دەيدى باس اگرونوم راۆيل ريازاپوۆ.
قاۋىزىنا جەمىس شىرىنى مەن كومىرسۋتەگىن جيناپ, ابدەن قورەكتەنىپ العاننان كەيىن گۇل شاشادى ەكەن. بۇل پروتسەسس كەمى ءجۇز جىلعا سوزىلاتىن كورىنەدى. بىلتىرلارى جۇرتشىلىق سولتۇستىك امەريكانىڭ سۋبتروپيكتىك ايماعىندا كەزدەسەتىن ءبىر عاسىرلىق تاريحى بار اگاۆا تۇقىمداس يۋككي وسىمدىگىنىڭ بۇرشىك جارعانىن قىزىقتاعان بولاتىن.
باق قىزمەتكەرلەرىنىڭ ايتۋىنشا, اگاۆا قۇرعاق اۋاعا ءتوزىمدى, سونشالىق كۇتىمدى قاجەت ەتپەيدى. وسى قاسيەتتەر سەبەپ پە ەكەن, تەرىسكەيگە تەز جەرسىنىپ كەتكەن. مامانداردىڭ ەسەبى بويىنشا, اگاۆانىڭ ادەمى دە اسەم كەيپى جاڭا جىلعا دەيىن سوزىلىپ, سوسىن جاپىراقتارى بىرتىندەپ ءومىر ءسۇرۋىن توقتاتا باستايدى. كەلەسى بۇرشىك جارۋىن ءبىر عاسىرعا جۋىق ۋاقىت كۇتۋگە تۋرا كەلەدى.
مۇندا وسەتىن وسىمدىكتەردىڭ ارقايسىسىنىڭ وزىندىك ەرەكشەلىگى مەن بيولوگيالىق سيپاتتاماسى بار.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى