سىرتقى ىستەر ءمينيسترى قايرات ءابدىراحمانوۆ ەۋروپاداعى قاۋىپسىزدىك جانە ىنتىماقتاستىق ۇيىمى پارلامەنتتىك اسسامبلەياسىنىڭ (ەقىۇ پا) توراعاسى گەورگي تسەرەتەلي مەن ەقىۇ پارلامەنتتىك اسسامبلەياسىنىڭ ورتالىق ازيا بويىنشا ارنايى وكىلى رومان حايدەرمەن كەزدەستى.
بەدەلدى پارلامەنتتىك بىرلەستىك باسشىلىعى ورتالىق ازيا ايماعىنا جاساعان تۋرنە اياسىندا استاناعا ەكى كۇندىك رەسمي ساپارمەن كەلدى.
سىرتقى ىستەر مينيسترلىگىندە وتكەن كەزدەسۋ بارىسىندا تاراپتار قازاقستان مەن ەقىۇ اراسىنداعى ىنتىماقتاستىقتىڭ اعىمداعى جاعدايى مەن پەرسپەكتيۆالارىن, حالىقارالىق كۇن ءتارتىپى جانە پارلامەنتارالىق ديالوگتى ودان ءارى نىعايتۋ ماسەلەلەرىن تالقىلادى.
ق.ءابدىراحمانوۆتىڭ ايتۋىنشا, پارلامەنتتىك ديپلوماتيا مەملەكەتارالىق قاتىناستاردىڭ ءتيىمدى جانە سەنىمدى قۇرالى بولىپ تابىلادى جانە جالپىعا ورتاق ماقساتتارعا قول جەتكىزۋ ءۇشىن حالىقارالىق ارەناداعى بارلىق قاتىسۋشىلارمەن تولىق كولەمدە پايدالانىلۋى ءتيىس. قازاقستاندىق ديپلومات ەقىۇ پارلامەنتتىك اسسامبلەياسى باسشىلىعىنىڭ قىزمەتىن جوعارى باعالاپ, ونىڭ قاۋىپسىزدىكتىڭ بارلىق ءۇش ولشەمىندە ۇيىمنىڭ وزەكتى ماسەلەلەرىن شەشۋگە ماڭىزدى ۇلەس قوساتىنىن ايتتى. سونىمەن قاتار, ەلىمىزدىڭ اسسامبلەيامەن جانە ەقىۇ قۇرىلىمدارىمەن وسى باعىتتا ءتيىمدى ىنتىماقتاستىقتى جالعاستىرۋعا دايىن ەكەندىگى اتاپ ءوتىلدى.
گ.تسەرەتەلي قازاقستان مەن ەقىۇ پارلامەنتتىك اسسامبلەياسىنىڭ ءوزارا ارەكەتتەستىگىنىڭ جوعارى قارقىنىن اتاپ ءوتتى. ەقىۇ پارلامەنتتىك اسسامبلەياسى توراعاسىنىڭ ايتۋىنشا, قازاقستان ۇيىمنىڭ نەگىزگى قۇندىلىقتارىن قولدايتىن, جاۋاپتى جانە سەنىمدى ارىپتەس بولىپ تابىلادى. كەزدەسۋ بارىسىندا قازاقستاننىڭ تاۋەلسىزدىك جىلدارىندا قول جەتكىزگەن الەۋمەتتىك-ەكونوميكالىق جانە سىرتقى ساياسي جەتىستىكتەرى تالقىلاندى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ باسشىلىعىمەن جۇزەگە اسىرىلعان ەلىمىزدىڭ تەحنولوگيالىق ترانسفورماتسيا ءۇردىسى اتاپ ءوتىلدى, ونىڭ ناتيجەسىندە قازاقستان الەمنىڭ دامىعان ەلدەرىنىڭ قاتارىنا قوسىلۋدا.
حالىقارالىق كۇن ءتارتىبىنىڭ ماسەلەلەرىن تالقىلاۋ اياسىندا پرەزيدەنت نۇرسۇلتان نازارباەۆتىڭ سىرتقى ساياساتى جانە ونىڭ حالىقارالىق بىتىمگەرشىلىك كۇشتەرى جوعارى باعالاندى. شەتەلدىك ساياساتكەرلەر مەن ساراپشىلار مەملەكەت باسشىسىنىڭ 2018 جىلعى 13 قاراشادا «Astana Club» قاتىسۋشىلارىنىڭ كەزدەسۋىندە جاريالانعان جاھاندىق قاۋىپسىزدىك پەن ىنتىماقتاستىقتى نىعايتۋ جونىندەگى باستامالارىنا قولداۋ ءبىلدىردى. ەقىۇ پارلامەنتتىك اسسامبلەياسى باسشىلىعىنىڭ ايتۋىنشا, اتالعان باستامالار قاۋىپسىزدىكتىڭ السىرەۋى مەن سەنىمسىزدىك جاعدايىندا اسا ماڭىزدى جانە ورىندى بولىپ تابىلادى.
سونداي-اق, تاراپتار حالىقارالىق ىنتىماقتاستىقتى ودان ءارى كەڭەيتۋ جانە زاماناۋي قاۋىپ-قاتەرلەرگە, ونىڭ ىشىندە حالىقارالىق لاڭكەستىك, ءدىني ەكسترەميزم, زاڭسىز كوشى-قون, ەسىرتكىنىڭ زاڭسىز اينالىمى, ترانسۇلتتىق ۇيىمداسقان قىلمىس جانە باسقا دا قاتەرلەرگە قارسى كۇرەستە حالىق قالاۋلىلارىن تارتۋ قاجەتتىگى تۋرالى كەلىستى.
كەزدەسۋ سوڭىندا تاراپتار ءوزارا مۇددەلى ماسەلەلەر بويىنشا سىندارلى ديالوگتى جالعاستىرۋ سونداي-اق تىعىز جۇمىس بايلانىستارىن, قازاقستان رەسپۋبليكاسىنىڭ ەقىۇ-عا توراعالىعى كەزىندە باستاۋ العان داستۇرلەردى ساقتاۋ جانە ۇيىمنىڭ 21-عاسىرداعى جالعىز ءسامميتىن الداعى ۋاقىتتا جالعاستىرۋ تۋرالى ۋاعدالاستى.
ەقىۇ پارلامەنتتىك اسسامبلەياسى دەلەگاتسياسىنىڭ قازاقستانعا ساپارى اياسىندا سەنات توراعاسى قاسىم-جومارت توقاەۆ پەن ءماجىلىس توراعاسى نۇرلان نىعماتۋلينمەن كەزدەسۋلەر وتكىزىلدى. جوعارعى سوت توراعاسى جاقىپ اسانوۆپەن, باس پروكۋراتۋرا مەن ىشكى ىستەر مينيسترلىگىنىڭ باسشىلىعىمەن كەزدەسۋلەر جوسپارلانعان.
پارلامەنتتىك دەلەگاتسيا قازاقستانداعى ساپارى اياقتالعاننان كەيىن وزبەكستانعا بارادى.