تۇبەكتە تۇڭعىش رەت ۇيىمداستىرىلعان بوكستان ەرلەر اراسىنداعى قر چەمپيوناتى ءوز مارەسىنە جەتتى.
تۋرنير قورىتىندىسى بويىنشا, كوماندالىق ەسەپتە ءبىرىنشى ورىندى 2 التىن, 3 كۇمىس جانە 2 قولا مەدالمەن تۇركىستان وبلىسى, ەكىنشى ورىندى ءبىر التىن, ءۇش كۇمىس جانە ءتورت قولا مەدالمەن ماڭعىستاۋ وبلىسى, ال ءۇشىنشى ورىندى جامبىل وبلىسى 1 التىن, 2 كۇمىس جانە ءۇش قولا مەدالمەن قورىتىندىلادى.
ايتۋلى شاراعا ەلىمىزدىڭ 14 وبلىسى مەن 3 رەسپۋبليكالىق ماڭىزى بار قالادان بارلىعى 206 سپورتشى قاتىستى. قاتىسۋشىلاردىڭ قاتارىندا الەمدىك ارەنالاردا توپ جارىپ جۇرگەن قايرات ەراليەۆ, ۆاسيلي لەۆيت, ءابىلحان امانقۇل, اسلانبەك شىمبەرگەنوۆ, بەكداۋلەت يبراگيموۆ, ابىلايحان ءجۇسىپوۆ, تەمىرتاس ءجۇسىپوۆ, يلياس سۇلەيمەنوۆ, ەرىك ءالجانوۆ, اعايىندى تولتاەۆتار بار. جۇزدەن جۇيرىك شىققاندار كەلەر جىلى وتەتىن ازيا جانە الەم چەمپيوناتتارىندا باق سىنايتىن بولادى.
قازاقستان بوكس فەدەراتسياسى جانە ماڭعىستاۋ وبلىسى اكىمدىگىنىڭ قولداۋىمەن وتكەن جارىسقا ەرماحان ىبرايىموۆ, باقتيار ارتاەۆ, بولات ءجۇمادىلوۆ, باۋىرجان وسپانوۆ, مىرزاعالي ايتجانوۆ, مارات مازىمباەۆ, مەرەي اقشالوۆ, ءبىرجان جاقىپ, نۇرجان كارىمجانوۆ قۇرمەتتى قوناق رەتىندە قاتىستى.
سونىمەن قاتار, سالتاناتتى شارادا ەكى بىردەي وليمپيادا ويىندارى مەن الەم چەمپيوناتتارىنىڭ ەكى دۇركىن كۇمىس جۇلدەگەرى, ازيا ويىندارىنىڭ چەمپيونى, ادىلبەك نيازىمبەتوۆ ۇلكەن سپورتتاعى كارەراسىن اياقتاعانىن مالىمدەدى.
كوپشىلىك الدىندا بوكسشىمىزعا قۇرمەت كورسەتىلىپ, حالىق زور قوشەمەتپەن شىعارىپ سالدى. سونداي-اق, حالىقارالىق دارەجەدەگى سپورت شەبەرى, بوكستان ازيا چەمپيونى, الەم چەمپيوناتىنىڭ قولا جۇلدەگەرى, بىرنەشە دۇركىن ەل چەمپيونى, بەرىك ابدراحمانوۆ تا بىلعارى قولعابىن شەگەگە ءىلىپ, شارشى الاڭداعى ورنىن كەيىنگى جاستارعا اماناتتادى. الداعى جوسپارى شاكىرت تاربيەلەپ, ماڭعىستاۋ بوكس مەكتەبىنىڭ دامۋىنا ءوز ۇلەسىمدى قوسسام دەيدى ول.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى