التى اي قاقاعان قىسى بار التاي استە قاتەلىكتى كەشىرمەيدى. اسىرەسە قىستىڭ كوزى قىراۋدا بۇل جاقتا جاياۋ جۇرمەگەنىڭىز ابزال. جۇرسەڭىز, يىعىڭىزعا قارۋ اسىنىڭىز. بىراق مۇنى تۇرعىنداردىڭ ءبارى ەسكەرە بەرە مە؟ تۇرعىنداردىڭ ءبارى ورالحان بوكەيدىڭ «قار قىزىن» وقىدى دەيسىز بە؟
جۋىقتا كاتونقاراعاي اۋدانىندا وقىس وقيعا ورىن الا جازداپ, ابىروي بولعاندا جەر جاعدايىن ءجىتى بىلەتىن جەرگىلىكتى ازاماتتاردىڭ ارالاسۋىمەن ادامدار ءبىر قاتەردەن امان قالدى.
وقيعا بىلاي بولىپتى. اۋدان تۇرعىندارى پاۆەل ليگوستاەۆ جۇبايى سالاۋات تابىسباەۆا جانە دوسى بەكبولات تەكەنەۆپەن بىرگە نوۆو-پولياكوۆكا اۋىلىنان 20 شاقىرىم جەردەگى ومارتاعا بارىپ, ءبىر قونىپ, تاڭەرتەڭ جاياۋلاپ جولعا شىعادى. التايدىڭ اۋا رايىنىڭ كۇرت قۇبىلاتىنىن بىلسە دە, ەشتەڭەدەن سەزىكتەنبەي الاڭسىز كەلە جاتادى. ارادا ءبىر جارىم ساعاتتاي ۋاقىت وتەر-وتپەستە بوران سوعىپ, ۇشەۋى اداسىپ كەتەدى. قولدارىندا بالتا مەن ۇيالى تەلەفوننان باسقا تۇك جوق. دەگەنمەن ۇيالى تەلەفوندارى كادەگە جاراپ, اق تۇتەكتىڭ اراسىندا 112 نومىرىنە قوڭىراۋ شالىپ, اداسىپ كەتكەن جەردى شامالاپ ايتىپ ۇلگەرەدى.
اداسقانداردى ىزدەۋگە نوۆو-پولياكوۆكا اۋىلىنىڭ اكىمى سەرجان بايبوسىنوۆ, اۋىلدىق وكرۋگتىڭ مامانى اسحات راحيموۆ, جۇرگىزۋشى دامير اۋباكىروۆ, ۋچاسكەلىك پوليتسيا قىزمەتكەرى رادمير بۇتاباەۆ, فەلدشەر ناتاليا داركيمباەۆا جانە وگنەۆو اۋىلىنىڭ تۇرعىندارى ايتقازى قۇستىباەۆ پەن سەرىك التىنوۆ اتتانادى. قىسقاسى, ولار اداسقان ۇشەۋدى تۇنگى ساعات 1 شاماسىندا ءبىر-اق تابادى.
«كەشكى ساعات التىلارعا قاراي جەل سايابىرسىدى. قاراڭعى ءتۇسىپ, قار جاۋدى. ءبىزدى قاسقىر تورۋىلداپ ءجۇر ەكەن. شوشىتۋ ءۇشىن قاتتى ايعايلاپ, جاقىنداپ قالعان كەزدە قولشامنىڭ جارىعىن ءتۇسىرىپ وتىردىق. ەڭ باستىسى, ءبىزدى ىزدەپ تابادى دەگەن ءۇمىتىمىزدى ۇزبەدىك. اسىرەسە زايىبىمدى قاتتى ۋايىمدادىم. ول بارىنشا شىداۋعا تىرىستى, بىراق ءبىزدى تاۋىپ الۋعا ءبىر ساعاتتاي ۋاقىت قالعاندا قالجىراپ, ۇيقىسىراپ كەتتى. باعىمىزعا وراي, ىزدەۋگە جەرگىلىكتى جەردى جاقسى بىلەتىن, بۇعان دەيىن دە تالاي ادامدى قۇتقارىپ جۇرگەن ايتقازى قۇستىباەۆ شىعىپتى. نوۆو-پولياكوۆكا اكىمى سەرجان بايبوسىنوۆ, ايتقازى قۇستىباەۆ جانە سەرىك التىنوۆ ۇشەۋى اتپەن ءجۇر ەكەن, ءبىزدى ءبىرىنشى تاپقان سولار. ءدال سول كەزدە ۇيالى تەلەفونىمىز دا ءسوندى. ازاماتتارعا ايتار العىسىمىز شەكسىز», دەيدى ءبىر اجالدان امان قالعان پ.ليگوستاەۆ.
ەستەرىڭىزگە سالا كەتەيىك, وسى جىلى كوكتەمدە بولعان سۋ تاسقىنى كەزىندە زىريان اۋدانى اكىمىنىڭ ورىنباسارى جاننا اسقارقىزى تۇرعىنداردى قۇتقارۋ ءۇشىن ءوز ءومىرىن قاتەرگە تىككەن بولاتىن.
ازامات قاسىم,
«ەگەمەن قازاقستان»
شىعىس قازاقستان وبلىسى, كاتونقاراعاي اۋدانى