اۋعانستان ەلدەگى ساياسي جانە ەكونوميكالىق جاعدايدىڭ اسا كۇردەلىلىگىنە قاراماستان, ارا-تۇرا ءوز سپورتشىلارىن حالىقارالىق جارىستارعا جىبەرىپ تۇرادى.
ماسەلەن, بۇل مەملەكەتتىڭ وكىلدەرى جازعى وليمپيا ويىندارىندا 13 مارتە بوي كورسەتىپ, 100-گە جۋىق ورەن باق سىناعان ەكەن. بايراقتى باسەكەدە قول جەتكىزگەن بار تابىسى – قوس قولا مەدال. سول جۇلدەنىڭ ەكەۋى دە تاەكۆوندو شەبەرى روحۋللا نيكپايعا تيەسىلى. ال سول ساڭلاق جايىندا ءبىز نە بىلەمىز؟
سپورتتىق دودالاردا اۋعان حالقىنىڭ ابىرويىن اسقاقتاتىپ جۇرگەن روحۋللا نيكپاي حازار ۇلتىنان. ول 1987 جىلى ۆارداك وڭىرىندە دۇنيەگە كەلىپ, كەيىننەن اتا-اناسىمەن بىرگە كابۋلعا كوشەدى. سول جەردە ءجۇرىپ, تاەكۆوندونىڭ قىر-سىرىنا قانىعا باستايدى. تاليبتەر بيلىككە كەلگەن تۇستا نيكپايلار وتباسى كابۋلدان كەتىپ, يراندىقتار قۇرعان بوسقىندار لاگەرىنەن پانا تابادى. ارادا ءبىراز جىل ءوتىپ, اۋعانستانداعى شيەلەنىس ءبىراز وڭالعاننان كەيىن ولار استاناعا ورالادى. ءوزىنىڭ سۇيىكتى ىسىمەن اينالىسۋعا مۇمكىندىك العان روحۋللا سپورت زالىن جاعالاپ, جاتتىعۋىن قايتا باستايدى.
شىنى كەرەك, «بايتال تۇگەل باس قايعى» بولعان زاماندا سپورتتى دارىپتەپ, بۇل ونەرمەن بار ىنتا-نيەتىن سالىپ, كۇش-قۋاتىن سارپ ەتىپ شۇعىلداناتىن ادام تابىلا قويمايتىنى انىق. جان-جاعىڭدا قىناداي قىرىلىپ, قان جىلاعان حالىق, اتىس پەن شابىس, زورلىق پەن زومبىلىق, جەتىمدەر مەن جەسىرلەر, اشقۇرساق ادامدار...
2004 جىلى افينا وليمپياداسىندا ساتسىزدىككە ۇشىرعان روحۋللا نيكپاي 2008 جىلى بەيجىڭدە الاۋى تۇتانعان دوداعا كەرەمەت دايارلىقپەن كەلدى. 58 كيلو سالماق دارەجەسىندە ونەر كورسەتكەن ول قولا مەدالدى كەۋدەسىندە جارقىراتتى. وسىلايشا, بۇل جىگىتتىڭ ەسىمى وليمپيا ويىندارىندا جۇلدە العان اۋعانستاننىڭ تۇڭعىش سپورتشىسى رەتىندە تاريحتا قالدى.
كابۋل اۋەجايىنان كۇتىپ العان ساڭ مىڭ حالىق قاھارمان ۇلعا ەرەكشە قوشەمەت كورسەتتى. اۋعانستاننىڭ سول كەزدەگى پرەزيدەنتى حاميد كارزاي حان سارايىنداي ءۇي سىيلاپ, تەمىر تۇلپاردىڭ كىلتىن تابىس ەتتى. جاماعاتتىڭ الدىندا ءسوز العان روحۋللا: «وتىز جىل بويى قاندىبالاق سوعىستان كوز اشپاي, قان جىلاپ, قارا جامىلىپ وتىرعان حالقىنا قۋانىش سىيلاپ, يگىلىكتى ءبىر ءىس تىندىرۋ – اۋعانستاننىڭ ءاربىر سانالى ازاماتتىڭ اسقاق ارمانى. مەنىڭ دە ماقساتىم سول ەدى», – دەپ كوز جاسىن ءبىر ىركىپ الدى.
2012 جىلى لوندوندا الاۋى تۇتانعان وليمپيا ويىندىرىندا جانكەشتى جىگىت ءدال سول ناتيجەنى قايتالادى. ءسويتىپ نيكپاي وليمپيا ويىندارىنىڭ ەكى دۇركىن قولا جۇلدەگەرى اتاندى. سونىمەن قاتار روحۋللا 2012 جىلى كەنجۋدە وتكەن الەم چەمپيوناتىندا قولا مەدالدى يەلەنسە, ازيا بىرىنشىلىگىندە ءۇش رەت جۇلدەگەرلەر قاتارىنان كورىندى. تاەكۆوندوشىلارى بىلاي تۇرسىن, اۋعانستانداعى باسقا دا سپورت ءتۇرى وكىلدەرىنىڭ ەشبىرى ءدال وسىنداي وراسان زور تابىسىمەن ماقتانا المايدى.
عالىم سۇلەيمەن,
«ەگەمەن قازاقستان»