استانادا مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق جانە «ەل» پروديۋسەرلىك ورتالىعى بىرلەسىپ تۇسىرگەن «الاش تۋى استىندا» اتتى دەرەكتى ءفيلمىنىڭ ارنايى كورسەتىلىمى ۇيىمداستىرىلدى.
وتكەن عاسىر باسىندا الاششىل اقىن سۇلتانماحمۇت تورايعىروۆتىڭ «الاش تۋى استىندا, كۇن سونگەنشە سونبەيمىز!» دەيتىن جالىندى جىرىن تاقىرىپ ەتىپ العان تۋىندىنىڭ باس كەڭەسشىسى تانىمال عالىم مامبەت قويگەلدى بولسا, فيلم رەجيسسەرى – ەرگەن توقمۇرزين. ال دەرەكتى شىعارمانىڭ ستسەناري اۆتورى جانە وقيعالار تىزبەگىنە جان ءبىتىرىپ, وتكەن تاريحتى تاپسىرلەپ جەتكىزۋشى جۋرناليست – بولات ءمۇرسالىم.
تاريحي, ساياسي, الەۋمەتتىك قۇندىلىقتاردىڭ ارا جىگىن اشا ءتۇسۋ ءۇشىن ءفيلمدى تۇسىرۋشىلەر الاش قايراتكەرلەرىنىڭ ءىزى قالعان سەمەيدەگى «الاش قالاسى» اۋماعىندا, ماسكەۋدەگى كرەمل, سانكت-پەتەربۋرگتەگى دۋما وتىرىستارى وتكەن تاۆريا سارايىندا, سمولنىيدا, قازاق زيالىلارى كوپتەپ ءبىلىم العان پەتەربور جانە قازان ۋنيۆەرسيتەتتەرىندە, ۋفاداعى مەملەكەتتىك ءماجىلىس وتكەن بۇرىنعى ء«سىبىر» قوناقۇيىندە ءتۇسىرۋ جۇمىستارىن جۇرگىزىپتى.
بارلىعى 52 مينۋتتان تۇراتىن دەرەكتى فيلم: «ويان, قازاق!», «جاريالانباعان اۆتونوميا» جانە «قاتەرلى وتكەل» اتتى ءۇش بولىمنەن قۇرالعان. ءار ءبولىمنىڭ وزىندىك جۇگى بار. فيلم اۆتورلارى «الاش قايراتكەرلەرى نەگە تاۋەلسىزدىكتى ەمەس, اۆتونوميانى تاڭدادى؟ الاش اسكەرى قالاي قۇرىلدى؟ الاش اۆتونومياسى قۇرىلدى ما, جوق پا؟» دەگەن سياقتى سۇراقتارعا جاۋاپ ىزدەيدى. سوڭعى «قاتەرلى وتكەل» بولىمىندە الاش قايراتكەرلەرىنىڭ قازاق شەكاراسىن شەگەندەۋى, گولوششەكين قىرعىنى, ستاليندىك رەپرەسسيا سياقتى وقيعالار نازارعا الىنادى.
ءسوز اياعىن الاشتانۋشى عالىم م.قويگەلدىنىڭ «الاش يدەياسى – تاۋەلسىزدىك مىڭجىلدىقتار بويى جاساي بەرەتىن بولسا, وندا ەڭ سوڭعى قازاق ولگەنشە بىرگە بولاتىن ماڭگىلىك يدەيا» دەگەن پايىمىمەن تۇيىندەگەندى ءجون كوردىك.
بەكەن قايرات ۇلى,
«ەگەمەن قازاقستان»