بۇگىن ۇكىمەت وتىرىسىندا «نۇرلى جەر» مەملەكەتتىك باعدارلاماسىنىڭ وسى جىلدىڭ توعىز ايىندا ىسكە اسىرىلۋ قورىتىندىسىن شىعارۋ بارىسىندا پرەمەر-مينيستر باقىتجان ساعىنتاەۆ تۇرعىن ءۇي قۇرىلىسىن ودان ءارى دامىتۋعا قاتىستى ناقتى تاپسىرمالار بەردى.
بەيىندى مينيسترلىكتەردىڭ جانە بىرقاتار اكىمدەردىڭ باياندامالارىن تىڭداعاننان كەيىن, ب. ساعىنتاەۆ جالپى 9 ايدىڭ قورىتىندىسى بويىنشا «نۇرلى جەر» مەملەكەتتىك باعدارلاماسىنىڭ بارلىق نەگىزگى باعىتتارى بويىنشا ءوسىم بايقالاتىنىن اتاپ ءوتتى. سونىمەن قاتار, پرەمەر-مينيستر ۇكىمەت مۇشەلەرىنىڭ نازارىن بىرقاتار باستى اسپەكتىگە اۋداردى.
ءبىرىنشى — بۇل مەملەكەتتىك باعدارلامانى ىسكە اسىرۋعا بولىنگەن قاراجاتتى يگەرۋ ماسەلەسى. قر ينۆەستيتسيالار جانە دامۋ مينيسترلىگىنىڭ اقپاراتىنا سايكەس, بىرقاتار وڭىردە 9 ايدىڭ قورىتىندىسى بويىنشا وتكەن جىلعى جانە جوسپارلى كورسەتكىشتەرمەن سالىستىرعاندا قاراجاتتى يگەرۋ قارقىنى تومەندەگەن.
وتكەن جىلى 11,2 ملن شارشى مەتر تۇرعىن ءۇي تاپسىرىپ, جوعارى كورسەتكىشكە قول جەتكىزىلدى. پرەمەر-مينيستر بيىل 12,1 ملن شارشى مەتر پايدالانۋعا بەرۋ كەرەكتىگىن ەسكە سالدى.
وسىعان وراي, وبلىستاردىڭ اكىمدەرىنە تۇرعىن ءۇيدىڭ جوسپارلانعان كولەمىن تاپسىرۋ جانە بولىنگەن قاراجاتتى ءتيىمدى يگەرۋ ءۇشىن قاجەتتى شارالاردىڭ بارلىعىن قابىلداۋ تاپسىرىلدى.
ەكىنشى — قۇرىلىس الاڭدارىنا ينجەنەرلىك كوممۋنيكاتسيالاردى جەتكىزۋ ماسەلەسى. بۇل كوپپاتەرلى ۇيلەرگە دە, جەكە ءۇي قۇرىلىسىنا دا قاتىستى. بيىل مەملەكەتتىك باعدارلامانى ىسكە اسىرۋعا بولىنگەن بيۋدجەت قاراجاتىنىڭ جارتىسىنا جۋىعى وسى باعىتقا كوزدەلگەن. سونىمەن قاتار, ب. ساعىنتاەۆ كەيبىر وڭىرلەردە قاجەتتى ينفراقۇرىلىم بولماعاندىقتان, سالىنىپ دايىن تۇرعان ۇيلەر پايدالانۋعا بەرىلمەي وتىرعانىن ايتتى.
جەكە تۇرعىن ءۇي بويىنشا وسى جىلى 40 مىڭنان استام جەر تەلىمى جەلىمەن قامتاماسىز ەتىلۋگە ءتيىس, 9 ايدا تەك 40% عانا قامتاماسىز ەتىلگەن. سوندىقتان وبلىستاردىڭ اكىمدەرىنە وسى ماسەلەنى قاتاڭ باقىلاۋعا الىپ, تاپسىرمالاردىڭ الداعى ەكى ايدا ورىندالۋىن قامتاماسىز ەتۋ تاپسىرىلدى.
قازاقستان حالقىنا ارناعان جولداۋىندا ەلباسى 2019 جىلى جاڭا «نۇرلى جەر» باعدارلاماسىن ازىرلەۋ مىندەتىن قويدى. ونى وڭىرلىك دامۋ اسپەكتىلەرىن ەسكەرىپ, جاڭا باعىتتارمەن تولىقتىرۋ قاجەت. قر ينۆەستيتسيالار جانە دامۋ مينيسترلىگىنە جاڭا مەملەكەتتىك باعدارلامادا تۇرعىن ءۇي قۇرىلىسى مەن تۇرعىن ءۇي-كوممۋنالدىق شارۋاشىلىق ماسەلەسى بويىنشا بارلىق اسپەكتىلەردى قاراستىرۋ تاپسىرىلدى.