الماتىداعى اتى اڭىزعا اينالعان «مەدەۋ» مۇز ايدىنىنىڭ قوناقتارى ءار اپتانىڭ سەنبى جانە جەكسەنبى كۇندەرى كەشكى ساعات جەتىدەن توعىزعا دەيىن ارنايى نۇسقاۋشىلاردىڭ كومەگىمەن كونكيدە سىرعاناۋدى تەگىن ۇيرەنە الادى.
«مەدەۋ» قوناقتارى تەك كونكي تەۋىپ قانا قويماي, ارنايى ويىن-ساۋىقتىق باعدارلامالارعا قاتىسىپ, كونتسەرت تاماشالاپ, ءتۇرلى باعالى سىيلىقتار ويناتىلاتىن سايىستاردا باعىن سىناۋىنا بولادى.
مەنىڭ كونكيمەن سىرعاناپ جۇرگەنىمە 5 جىل بولدى. نۇسقاۋشى بولسام دەپ ءوز شەبەرلىگىمدى شىڭدادىم. ماعان ساباق بەرگەن ەرەكشە ۇنايدى. كەلۋشىلەرگە كەڭەسىمدى بەرىپ تۇرامىن. بۇل سپورتتا ەڭ باستىسى قىزىعۋشىلىق پەن ىنتا. كوپ ادامدار كونكي تاڭداۋدان قاتەلەسىپ جاتادى, جانە وزدەرىنىڭ تەپە-تەڭدىكتەرىن ساقتاي المايدى. ونىڭ ءبارى جاتتىعا كەلە تۇزەلەدى, تەك تالاپتانىپ, قورىقپاۋ كەرەك, – دەيدى نۇسقاۋشى دميتري پودپورين.
ەسكە سالساق, قىس ايلارىندا بۇل جوبا الماتىلىقتار مەن قالا قوناقتارى ءۇشىن بىلتىر دا ۇزدىكسىز ۇيىمداستىرىلعان بولاتىن. كونكيمەن سىرعاناۋعا اقىسىز تۇردە ۇيرەتۋ ساباقتارى بيىلعى جىلدىڭ سوڭىنا دەيىن جالعاسادى دەپ جوسپارلانعان.
«سپورتتىق شارانىڭ باستى ماقساتى قالاداعى بۇقارالىق سپورت تۇرلەرىن دامىتىپ, قالا تۇرعىندارى مەن قوناقتارىن سالاۋاتتى ءومىر سالتىن ۇستانۋعا شاقىرۋ» دەيدى جوبانى ۇيىمداستىرۋشىلار
ارمان وكتيابر,
«ەگەمەن قازاقستان»
الماتى