پاۆلودار وڭىرىندەگى كوممۋنالدىق قىزمەتتەردىڭ قىسقا دايىندىعى قانداي؟ وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىق باسقارماسىنىڭ باسشىسى ەرجان يمانزايىپوۆتىڭ ايتۋىنشا, الداعى قىستا وبلىس ورتالىعى, ەكىباستۇز, اقسۋ قالالارىن قاردان تازالاۋ ءۇشىن كوممۋنالدىق قىزمەتتەردىڭ قاراماعىندا 365 ارنايى تەحنيكا, 31 سۋ سورعىش ماشينا جانە 410 جۇمىسشى بار.
– قىسقى كەزەڭدە بلوگ-پلاتفورماما كەلىپ تۇسەتىن وتىنىشتەردىڭ 80 پايىزى جىلۋدىڭ دۇرىس بەرىلمەۋى, ىستىق سۋدىڭ جوق بولۋىنا جانە كوشەلەردىڭ قاردان تازالانباۋىنا بايلانىستى, – دەدى وبلىس اكىمى بولات باقاۋوۆ.
ءتىپتى وبلىس ورتالىعىندا بيىلعى جىلۋ ماۋسىمىنا دايىن ەمەس 60-قا جۋىق تۇرعىن ۇيلەر انىقتالعان. قالادا پەشپەن جابدىقتالعان 2300-دەن استام جەر ءۇي دە بار. بىلتىر وبلىس ورتالىعىنىڭ تولستوي كوشەسىندەگى №82 ءۇيدىڭ تۇرعىندارى پاتەرلەرىندەگى تەمپەراتۋرا 14-16 گرادۋس دەڭگەيىندە عانا تۇرعانىن, جىلىتقىشتارمەن جىلىنىپ وتىرعاندارىن, كۋتۋزوۆ كوشەسىندەگى №291 ءۇي, ءۇشىنشى كىرە بەرىستىڭ تۇرعىندارى ايازدىڭ كەسىرىنەن ءليفتىنىڭ توقتاپ قالۋ قاۋپى بار ەكەنىن, كاتاەۆ كوشەسىندەگى №12 ءۇيدىڭ پاتەرلەرىندەگى تەمپەراتۋرا 18 گرادۋسقا ارەڭ جەتىپ تۇرعانىن وبلىس اكىمىنىڭ سايتىنا جازعان-دى.
سونىمەن بىرگە ءوڭىر باسشىسى بيىلعى جىلىتۋ ماۋسىمى باستالعاننان بەرى اكىمدىكتىڭ رەسمي بلوگ-پلاتفورماسىنا 29 شاعىم كەلىپ تۇسكەنىن ايتتى. جەر قارا, كۇن جىلىدا جىلۋ ماسەلەسىنە قاتىستى شاعىمدار ءتۇسىپ جاتسا, ەرتەڭگى ايازداردا تۇرعىنداردىڭ امالى قايسى؟ ال قالالىق اكىمدىكتىڭ سايتىندا اكىمدىك بولىمدەرىنىڭ قۇر سىزباسى عانا بەرىلگەن. اكىمدىك سايتىندا باسقا بولىمدەردىڭ سايتتارىمەن بىرگە, ەڭ نەگىزگى تۇرعىندارعا كەرەكتى دەگەن بايلانىس, حابارلاسۋ, جەدەل جەلىلەر جايلى اقپاراتتار بەرىلەتىن تۇرعىن ءۇي-كوممۋنالدىق شارۋاشىلىق ءبولىمىنىڭ سايتى ەنگىزىلمەپتى دە. ال قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ اتىنا ساي جالپى جۇمىسى جايلى ەشقانداي اقپارات كەزدەستىرمەيسىز.
– تۇرعىندار امالسىزدان قابىلداۋ بولمەمە قوڭىراۋ شالادى. قالالىق كوممۋنالدىق شارۋاشىلىق ءبولىمىنىڭ جەدەل جەلىسى قوڭىراۋ قابىلدامايدى دەپ شاعىمدانۋدا, – دەدى ب.باقاۋوۆ. – ءبىز جەدەل جەلىنى قالا تۇرعىندارىنىڭ تۇرعىن ءۇي-كوممۋنالدىق شارۋاشىلىق ماسەلەلەرىن شۇعىل شەشۋ ءۇشىن قۇرعان جوقپىز با؟!
فاريدا بىقاي,
«ەگەمەن قازاقستان»
پاۆلودار