قازاقستاندا بيىلدان باستاپ جاڭعىرمالى ەنەرگيا كوزدەرىن (جەك) ىرىكتەۋ ءىسى اۋكتسيوندىق ساۋدا ارقىلى جۇرگىزىلەدى. ەنەرگەتيكا ۆيتسە-ءمينيسترى اناتولي شكارۋپا ۇكىمەتتىڭ ءباسپاسوز ورتالىعىندا وتكەن بريفينگتە ونىڭ قالاي جۇزەگە اسىپ جاتقانى تۋرالى تولىعىراق ايتىپ بەردى.
ا.شكارۋپا اتاپ وتكەندەي, جەك سالاسىنداعى تەحنولوگيالاردىڭ قارقىندى دامۋى, وعان قارجى سالۋعا نيەتتى ينۆەستورلار سانىنىڭ ارتۋى تەحنولوگيالىق شەشىمدەرى ءتيىمدى ءارى ۇتىمدى, شىعىنى از جوبالاردى تاڭداۋ ءۇشىن ءادىل جانە باسەكەگە قابىلەتتى ىرىكتەۋدى وتكىزۋدە جاڭا تەتىكتى تالاپ ەتتى.
«بۇگىندە وسى تالاپتارعا جاۋاپ بەرەتىن جاھاندىق ءۇردىس – جاڭعىرمالى ەنەرگيا كوزدەرىن تاڭداۋدىڭ اۋكتسيوندىق ساۋدا تەتىگى», دەدى ۆيتسە-مينيستر. وسىعان وراي الەمدىك تاجىريبەگە سۇيەنىپ, قازاقستاندا دا جەك جوبالارىن ىرىكتەۋدە اۋكتسيوندىق ساۋدا ءتاسىلى ەنگىزىلىپ, جەك سالاسىن ىسكە قوسۋعا مۇمكىندىك بەرگەن ءارى 2018 جىلعا دەيىن قولدانىلىپ كەلگەن بەلگىلەنگەن تاريفتەردى الماستىرعان بولاتىن.
«اۋكتسيوندىق ساۋدانى ەنگىزۋ ءۇشىن ءبىراز جىل دايىندىق جۇمىستارى جۇرگىزىلىپ, جەك سالاسىنداعى قولدانىستاعى زاڭناماعا بىرقاتار وزگەرىس ەنگىزىلدى. جوبالاردى ىرىكتەۋدە اۋكتسيوندىق ساۋدا-ساتتىقتى ءتيىمدى وتكىزۋ ءۇشىن ەنەرگەتيكا مينيسترلىگى مۇددەلى جاقپەن بىرلەسىپ اۋكتسيوندىق ساۋداعا ينۆەستورلاردى تارتۋعا باعىتتالعان اۋقىمدى ءتۇسىندىرۋ جۇمىستارىن جۇرگىزدى», دەدى ا.شكارۋپا.
اۋكتسيوندىق ساۋدا «كورەم» اق-تىڭ ەلەكتروندى ساۋدا الاڭىندا وتكىزىلەدى. بارلىق شاراعا باقىلاۋ كوميسسياسى قاتىسادى. باقىلاۋ كوميسسياسىنىڭ قۇرامىندا ەنەرگەتيكا مينيسترلىگىنىڭ, مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى بار.
كوكتەمگى اۋكتسيوندىق ساۋدا-ساتتىق قورىتىندىسى بويىنشا كەلەسى ناتيجەلەرگە سۇيەنسەك, ەكى جىل ىشىندە الماتى جانە قىزىلوردا وبلىستارىندا ءتورت كۇن ەلەكتر ستانساسى ىسكە قوسىلادى. ءۇش جىل ىشىندە اقمولا, الماتى, شىعىس قازاقستان, سولتۇستىك قازاقستان, قوستاناي جانە ماڭعىستاۋ وبلىستارىندا توعىز جەل, ءبىر بيوگازەلەكترستانساسىن سالۋ جۇزەگە اسىرىلادى. ءتورت جىل ىشىندە الماتى وبلىسىندا ەكى سۋ ەلەكتر ستانساسى ىسكە قوسىلادى.
بيىل 3-18 قازان ارالىعىندا جەك اۋكتسيوندارىنىڭ كۇزگى سەسسياسى ءوتتى. ينۆەستورلارعا جەك-ءتىڭ بارلىق ءتۇرى ۇسىنىلدى. كۇزگى اۋكتسيوندىق ساۋدا قورىتىندىسى بويىنشا ەكى جىل ىشىندە الماتى, تۇركىستان, قىزىلوردا, جامبىل وبلىستارىندا جانە شىمكەنت قالاسىنىڭ ماڭىندا سەگىز كۇن ەلەكتر ستانساسى ىسكە قوسىلادى. ءۇش جىل ىشىندە اقمولا, الماتى, شىعىس قازاقستان, سولتۇستىك قازاقستان جانە جامبىل وبلىستارىندا 400 مۆت قۋاتى بار التى جەل ەلەكتر ستانساسى, ءتورت جىل ىشىندە الماتى جانە جامبىل وبلىستارىندا ءۇش سۋ ەلەكتر ستانساسى پايدالانۋعا بەرىلەدى.
ەنەرگەتيكا ۆيتسە-ءمينيسترى قاتتى تۇرمىستىق قالدىقتاردى, قوقىستى قايتا وڭدەۋ بويىنشا جۇمىس ىستەيتىن بيوەلەكترستانسالاردىڭ قۇرىلىسى ماسەلەسىن پىسىقتاۋ قاجەتتىگىن اتاپ ءوتتى.
سۇڭعات ءالىپباي,
«ەگەمەن قازاقستان»