ورتا ءجۇزدىڭ حانى ابىلاي حاننىڭ ەكىنشى ايەلى سايمان حانىمنان تۋعان ءۋالي حاننىڭ مازارى كوكشەتاۋ قالاسىنان تاياقتاستام جەردەگى قازاقستان اۋىلىنىڭ ماڭىندا. حان مازارى 2008 جىلى تۋعانىنا 270 جىل تولۋىنا وراي سالىنعان بولاتىن.
بيىل «ازيا اگروحيم» جاۋاپكەرشىلىگى شەكتەۋلى سەرىكتەستىگىنىڭ ديرەكتورى بوريس كوزلوۆتىڭ دەمەۋشىلىگىنىڭ ارقاسىندا مازاردىڭ ماڭايى ادەمىلەپ قورشالدى, توبە باسىنا جيەكتەي كوتەرىلەتىن جول سالىندى. مازارعا كەلىپ ءمىناجات ەتكەن ادامدار جايعاسىپ, دەمالاتىن ورنىقتى ورىندىقتار قويىلدى. مازار توڭىرەگى اباتتاندىرىلىپ, تاپ-تۇيناقتاي ەتىلىپ تازالانىپ, كوركەيىپ قالدى.
– بۇرىن مازار سالىنباي تۇرعاندا حاننىڭ التىن-كۇمىسىن ىزدەگەن الدەكىمدەر تالاي رەت قازىپ, بەرەكەسىن كەتىرگەن ەكەن, – دەيدى بوريس كوزلوۆ, – ەندى مىنە كوكشەتاۋعا ات ءىزىن سالعان, ەل تاريحىن ەتەنە بىلگىسى كەلەتىن ادامداردىڭ ات باسىن بۇراتىن جەرىنە اينالىپ وتىر. حان مازارى قاراۋسىز قالسا, كەيىنگىلەرگە سىن ەمەس پە؟
سەرىكتەستىك باسشىسىنىڭ اتالى ءسوزى جەردە قالمادى. جاقسى ءىسى جالعاسىن تاۋىپ, ىلە اعاش وتىرعىزۋ جۇمىستارى جۇرگىزىلدى. وعان كوكشەنىڭ اقساقالدارى, ءۋالي حاننىڭ ءوز ۇرپاقتارى, ناۋان حازىرەت اتىنداعى وبلىستىق مەشىتتىڭ, وبلىستىق تاريحي-ولكەتانۋ مۋزەيىنىڭ ۇجىمدارى اتسالىستى.
بايقال ءبايادىل,
«ەگەمەن قازاقستان»
اقمولا وبلىسى