مىڭ اسكەري قىزمەتشى تقجب ارقىلى جەڭىلدەتىلگەن زاەم الدى

ءۇي ساتىپ الۋعا ارنالعان زايمدار اسكەري قىزمەتشىلەرگە 6-8% ارالىعىنداعى جىلدىق مولشەرلەمەمەن ارنايى «اسكەري ءونىم» باعدارلاماسى اياسىندا بەرىلدى. بۇل باعدارلامانى تۇرعىن ءۇي قۇرىلىس جيناق بانكى («بايتەرەك» حولدينگىنىڭ ەنشىلەس ۇيىمى) 2018 جىلى اسكەري قىزمەتشىلەردى قولداۋ ماقساتىندا ىسكە قوسقان-دى. العاشقى زاەم 2018 جىلدىڭ 5 قىركۇيەگىندە رەسىمدەلدى.

تۇرعىن ءۇي قۇرىلىس جيناق بانكىنىڭ وتان قورعاۋشىلارعا ۇسىنىپ وتىرعان جەڭىلدەتىلگەن زايمدارى ءۇش تۇرگە بولىنەدى. ال ونىڭ شارتتارى ۇمىتكەردىڭ جيناعان قاراجاتىنىڭ كولەمى مەن تاڭدالعان پاتەرىنە بايلانىستى انىقتالادى.

قازىر تۇرعىن ءۇي قۇرىلىس جيناق بانكىندە جالپى سوماسى 10,5 ملرد تەڭگە كولەمىندەگى تاعى 700 ءوتىنىش قاراستىرىلىپ جاتىر. جىل سوڭىنا دەيىن 6 000 اسكەري قىزمەتشىنى نەسيەلەندىرۋ جوسپارلانعان. بۇل ماقساتتا بانك ءوز قاراجاتى ەسەبىنەن 74 ملرد تەڭگە ءبولدى.

تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆانىڭ تۇسىندىرۋىنشە, بيىل پۋلعا ىلىگە الماعان اسكەري قىزمەتشىلەر تۇرعىن ءۇي قۇرىلىس جيناق بانكىندەگى شوتتارىندا اقشا جيناۋدى ارى قاراي جالعاستىرا الادى. بۇل ءۇشىن بانك بارىنشا جايلى جانە قاۋىپسىز جاعداي جاساپ وتىر. ەڭ باستىسى, اسكەري قىزمەتشىلەردىڭ شوتتارىنا ەرەكشە مارتەبە جانە قول سۇعىلماۋشىلىق كەپىلى بەرىلگەن. ولاردىڭ جيناعان قاراجاتى بيۋدجەت ەسەبىنە الىنبايدى. ولارعا تىيىم سالۋعا بولمايدى جانە ۋاقتىلى تولەنبەگەن قانداي دا ءبىر وزگە نەسيە بويىنشا ەكىنشى دەڭگەيلى بانكتەر تولەم تالاپتارىن قويا المايدى. سونداي-اق بۇل دەپوزيتتەردەگى ءتيىمدى جىلدىق سىياقى مولشەرلەمەسى 13,3%-عا دەيىن باراتىنىن ايتا كەتۋ كەرەك. ال تۇرعىن ءۇي قۇرىلىس جيناق بانكى ارقىلى نەسيە الۋ كەزىندە تولەم قابىلەتتىلىگىن راستاۋدىڭ جەڭىلدەتىلگەن ءاناليزى قولدانىلادى. ياعني باعالاۋ بارىسىندا وتباسىعا كەتەتىن شىعىندار مەن باسقا ەكىنشى دەڭگەيلى بانكتەر الدىنداعى مىندەتتەمەلەرى ەسكەرىلمەيدى.

جالپى العاندا جاڭا تۇرعىن ءۇي باعدارلاماسىنىڭ العاشقى كەزەڭىنە قاتىسۋعا 13 مىڭ اسكەري قىزمەتشى نيەت بىلدىرگەن. پۋلعا ەڭ كوپ ۇپاي جيناعان قاتىسۋشىلار كىردى. ۇپاي سانىنا ءبىرىنشى كەزەكتە ۇمىتكەردىڭ اسكەري قىزمەتتە وتكىزگەن جىلدارىنىڭ سانى ىقپال ەتتى.

قازاقستاندا شامامەن 70 مىڭداي اسكەري قىزمەتشى تۇرعىن ءۇي تولەمدەرىن الادى. بۇل – تۇرعىن ۇيگە مۇقتاج اسكەريلەردىڭ سانى. تۇرعىن ءۇي قۇرىلىس جيناق بانكى وسى ازاماتتاردىڭ باسپانا ماسەلەسىن الداعى 5-6 جىلدىڭ ىشىندە شەشۋگە نيەتتى.

ايناش ەسالي,

«ەگەمەن قازاقستان».

الماتى