بۇگىن ۇكىمەتتىڭ باسپاسوز ورتالىعىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ناريمان مۇقىشەۆ ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن ىسكە اسىرۋ اياسىندا قازاقستاندىقتاردى جۇمىسپەن قامتۋ بويىنشا قابىلدانىپ جاتقان شارالار تۋرالى ايتىپ بەردى, دەپ حابارلايدى پرەمەر-ءمينيستردىڭ ءباسپاسوز قىزمەتى.
ن. مۇقىشەۆتىڭ ايتۋىنشا, «ەڭبەك» مەملەكەتتىك باعدارلاماسى اياسىندا وقۋدان وتكەن ازاماتتاردى ەڭبەكپەن بارىنشا قامتۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى بىرقاتار شارالار قابىلداپ جاتىر.
ءبىرىنشى كەزەكتە, ءبىلىم بەرۋشى مەكەمەلەر مەن ورتالىقتارعا تالاپتار قويىلۋدا. بۇل ء—تيىستى ماتەريالدىق-تەحنيكالىق بازانىڭ بولۋى, قوسارلى ءبىلىم بەرۋ ەلەمەنتتەرىن پايدالانۋ جانە وقۋدان وتكەن ادامداردىڭ كەم دەگەندە 60%-نىڭ جۇمىسقا ورنالاسۋى.
ەكىنشىدەن — بۇگىندە وقۋ ورتالىقتارى مەن وقۋ مەكەمەلەرىنىڭ تىزىلىمىن قالىپتاستىرۋ بويىنشا جۇمىستار جۇرگىزىلىپ جاتىر. بۇل تىكەلەي كاسىپتىك وقىتۋدى قاجەت ەتەتىن ماماندىقتار مەن داعدىلار ءتىزىمىن قالىپتاستىرۋ جانە بەكىتۋ ءۇشىن جاسالادى.
«بارلىق باعدارلاما تەك نارىقتا سۇرانىسقا يە ماماندىققا وقىتۋعا باعىتتالعان. ءبىز بۇنى بىلەمىز, بىزدە بارلىق جاعدايدى كورۋگە بولاتىن ەڭبەك بيرجاسى بار. نارىقپەن, ءبىلىم جانە عىلىم مينيسترلىگىمەن, «اتامەكەن» ۇكپ-مەن بىرلەسىپ, ازاماتتاردى وقىتۋعا قاجەتتى ماقساتتى باعىتتاردى قالىپتاستىرىپ جاتىرمىز», — دەپ ءتۇسىندىردى ن. مۇقىشەۆ.
ۇشىنشىدەن — ەڭبەك نارىعىنا ىقپال ەتەتىن, تسيفرلاندىرۋ سالاسىندا اۋقىمدى جۇمىستار جۇرگىزىلىپ جاتىر: جاڭا باعىتتار, تالاپتار, جۇمىس فورماتى ازىرلەنۋدە. باعدارلاما اياسىندا قر ەحاقم جۇمىس بەرۋشىلەرمەن ولاردىڭ قىزمەتكەرلەرى ات-كەڭىستىكتە زاماناۋي جۇمىس تاسىلدەرىن مەڭگەرۋى ءۇشىن قايتا دايارلاۋ ماقساتىندا تىعىز بايلانىس ورناتقان.
تورتىنشىدەن — «ماڭگىلىك ەل جاستارى – يندۋسترياعا!» جوباسى بويىنشا جوعارى, تەحنيكالىق جانە كاسىپتىك ءبىلىمى بار كادرلاردى دايىنداۋ بويىنشا مەملەكەتتىك قولداۋدىڭ بىرىكتىرىلگەن شارالارى قابىلدانۋدا, تۇلەكتەر وقىعان وڭىرلەرىنە جۇمىس ىستەۋگە جىبەرىلەدى.
ۆيتسە-مينيستر «ەڭبەك» باعدارلاماسى اياسىندا جۇمىسقا ورنالاسۋ كورسەتكىشتەرى تۋرالى ايتا وتىرىپ, بۇگىندە قىسقا مەرزىمدى كاسىپتىك وقىتۋدان وتكەن 31 مىڭ ادامنىڭ 18 مىڭى جۇمىسقا ورنالاسقانىن ايتتى. ەڭ جوعارعى كورسەتكىشتەر اقمولا, قوستاناي, الماتى, سولتۇستىك قازاقستان وبلىستارىندا بەلگىلەنگەن.
باعدارلامانىڭ ەكىنشى باعىتى اياسىندا ستارتاپ جوبالاردى قولداۋعا جانە ناتيجەسىندە جاڭا جۇمىس ورىندارىن قۇرۋعا شاعىن نەسيە بەرۋ باعىتى بەلسەندى تۇردە دامۋدا. اۋىلداردا جانە قالالاردا شاعىن نەسيە بەرۋ اياسىندا قازانداعى جاعداي بويىنشا 42 ملرد تەڭگە, ونىڭ ىشىندە اۋىلداردا — 31 ملرد تەڭگە جانە قالالاردا 11 ملرد تەڭگە يگەرىلگەن.
سونىمەن قاتار, ن. مۇقىشەۆ شاعىن نەسيە بەرۋ باعىتى بويىنشا نەسيەلەر بەرۋ ماسەلەلەرى اياسىندا تالداۋ مەن باعالاۋدان بولەك, ءبىرىنشى كەزەكتە, ناقتى باعىتتىڭ سۇرانىسقا يە بولۋى ماسەلەسى دە قارالاتىنىن اتاپ ءوتتى.
«بيزنەس-جوسپارلار ەگجەي-تەگجەيلى زەردەلەنەدى, سوندان كەيىن بارىپ جوبانى ىسكە اسىرۋعا قاراجات ءبولۋ-بولمەۋ تۋرالى شەشىم قابىلدانادى. شاعىن نەسيەلەردىڭ 81% اۋىل, ورمان, بالىق شارۋاشىلىعى سالالارىنا بەرىلگەن. بۇلار جالپى سالانى دامىتۋعا قاجەتتى ستارتاپتاردى تارتۋعا جانە سالانى جاڭا دەڭگەيگە شىعارۋعا ءتيىستى سەكتورلار», — دەدى ن. مۇقىشەۆ.
بۇدان وزگە, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ۆەدومستۆو ەڭبەكاقى تولەۋ جۇيەسىن دامىتۋ ماسەلەسىن بەلسەندى تۇردە پىسىقتاپ جاتقانىن اتاپ ءوتتى.
«ەلباسى جولداۋى اياسىندا ەڭ تومەنگى جالاقىنى 28 مىڭنان 42 مىڭ تەڭگەگە دەيىن كوبەيتۋ جۇمىستارى جۇرگىزىلىپ جاتىر جانە جاستار اراسىندا ءونىمدى جۇمىسپەن قامتۋدى دامىتۋ اياسىندا ەڭبەكاقىنى كوبەيتۋگە قاتىستى بارلىق سۇراقتار قولداۋعا يە بولۋدا», — دەدى ول.
ءوز كەزەگىندە قر ەحاقم حالىقتى جۇمىسپەن قامتۋ جəنە ەڭبەك نارىعىن دامىتۋ دەپارتامەنتى ديرەكتورىنىڭ م.ا. جەڭىسبەك دۋلاتوۆ بۇگىنگى تاڭدا ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك قىزمەتكەرلەردىڭ ەڭبەكاقىسىن قايتا قاراۋدىڭ جاڭا ادىستەمەسىن ەنگىزۋدى ازىرلەۋ ماقساتىندا مەملەكەتتىك قىزمەت ىستەرى جونىندەگى اگەنتتىكپەن بەلسەندى ءىس-قيمىل ورناتقانىن اتاپ ءوتتى.
«پيلوتتىق رەجيمدە ەكى مەملەكەتتىك ورگان جانە ەكى وبلىستىق ءوڭىر قاتىسىپ جاتىر, ولاردا ەڭبەكاقى 2–2,5 ەسەگە وسكەن. اتالعان ادىستەمە كەلەسى جىلدان باستاپ باسقا دا مەملەكەتتىك ورگاندار مەن وڭىرلەردە ەنگىزىلەدى. مەملەكەتتىك قىزمەتكەرلەرگە جاڭا ادىستەمەگە سايكەس جالاقىنى ەسەپتەۋ ارقىلى جاس مامانداردىڭ بۇل سالاعا دەگەن قىزىعۋشىلىعىن ارتتىرامىز دەگەن سەنىمدەمىز», — دەدى ج. دۋلاتوۆ.
ەسكە سالا كەتەيىك, 2017–2021 جىلدارعا ارنالعان ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى بويىنشا جۇمىسپەن قامتۋعا جاردەمدەسۋ شارالارىمەن 563 مىڭ ازامات قامتىلعان. ونىڭ 458 مىڭى جۇمىسقا ورنالاسقان, سونىڭ ىشىندە تۇراقتى جۇمىس ورىندارىنا — 327 مىڭ ادام.