اقان سەرى قورامسا ۇلىنىڭ تۋعانىنا 175 جىل تولۋىنا وراي بيۋست ورناتىلدى

عيبراتتى وقيعاعا وراي يەن تىرەسە جينالعان كوپشىلىكتىڭ ورتاسىنان جالىنداپ ىقشام شاپان جامىلعان, سارىالا قامشى ۇستاعان جاۋشى بالالار شىقتى. قۋانىش الا كەلدى. ساڭقىلداعان ۇندەرىنەن ءبىر جاقسىلىقتىڭ بولارىن سەزگەندەيسىڭ. شىنىندا دا, ءانشىنىڭ اتىن يەلەنگەن كوللەدج ۇجىمىنىڭ ىنتىماقتى تالپىنىسى تالايدى ءتانتى ەتكەندەي. مىنە, ءبيۋستى تۇمشالاعان پەردە ەتەگى تۇرىلگەن كەزدە الاش جۇرتىنا ماڭگى ولمەس رۋحاني مۇرا قالدىرعان اقان سەرىنىڭ نۇر بەينەسى بۇلتتى كۇنگى جارىق اي ءتارىزدى جارق ەتە ءتۇستى. ءان شا­پاعاتىن, ءان مەيىرىن شاشاتىنداي. 

ءبيۋستىڭ اۆتورى – رەسپۋب­ليكالىق «شابىت» فەستيۆالىنىڭ لاۋرەاتى رەنات ابەنوۆ. قولادان قۇيىلعان ءمۇسىن ارقانىڭ اق­تاڭ­گەرى اقان سەرىنىڭ تۇلا بو­يىن­داعى تاماشا دارىندى, اي­رىقشا قابىلەتتى پاش ەتىپ تۇر­عانداي. قىران قاباقتارى جازىلىپ, كەڭ ماڭدايدان ورىلگەن ونەر قۋاتى وشپەس ساۋلەنى مەڭ­زەيدى. سالتاناتتى راسىمدە ءسوز العان قارىمدى قالامگەر تو­لەگەن قاجىباي, كوكشەتاۋ قا­لاسى اكىمىنىڭ ورىنباسارى ال­تىناي امىرەنوۆالار كوللەدج ۇجىمىنىڭ ونەگەلى ىسىنە ريزاشىلىقتارىن ءبىلدىردى. وسى ارادا اتالمىش ءبىلىم وشاعى بيىلعى جىلى اقان سەرىنىڭ 175 جىلدىعىنا وراي جاستار اراسىندا رەسپۋبليكالىق اقىندار ايتىسىن وتكىزگەندىگىن, ءان باي­قاۋىن ۇيىمداستىرعانىن, ارنايى جيناق شىعارعاندىعىن ايتا كەتكەن ءلازىم. كىشكەنتاي عانا وقۋ ورنىنىڭ ۇلى تۇلعانى ۇلىقتاۋداعى ۇلاعاتتى ءىسى وزگەگە ۇلگى بولارلىقتاي. سالتاناتتى را­سىمدە ءداستۇرلى ءانشى قاجىباي جا­حين سەرىنىڭ «ماڭماڭگەر» ءانىن ناشىنە كەلتىرە ورىنداپ بەردى. 

بايقال ءبايادىل,

«ەگەمەن قازاقستان» 

اقمولا وبلىسى