ۇلتتىق سپورت تۇرلەرىنەن حالىقارالىق تۋرنير جايىق جاعاسىنا 7 مەملەكەتتەن 300-گە جۋىق سپورتشىنى جينادى. «رۋحاني جاڭعىرۋ» باعدارلاماسى اياسىندا وبلىس اكىمدىگىنىڭ باستاماسىمەن وبلىستىق دەنە شىنىقتىرۋ جانە سپورت باسقارماسى, ۇلتتىق سپورت تۇرلەرى قاۋىمداستىعى ۇيىمداستىرعان شارا ماحامبەت اۋدانىنىڭ المالى اۋىلىندا ءوتتى.
كوكپار, اۋدارىسپاق, قىز قۋ, تەڭگە ءىلۋ, جامبى اتۋ, الامان بايگە,توپ بايگە, ۇشقىر بايگە, جورعا جارىس, تازى جارىسى سەكىلدى ۇلتتىق سپورت تۇرلەرىنەن جۇيرىكتەردى انىقتاعان جارىستىڭ جۇلدە قورى – 43 ملن تەڭگە بولدى. شاراعا گەنەرال-مايور, ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى قايرات ساتىبالدى, ۇلتتىق سپورت تۇرلەرى قاۋىمداستىعىنىڭ پرەزيدەنتى, ءماجىلىس دەپۋتاتى بەكبولات تىلەۋحان قۇرمەتتى قوناق رەتىندە قاتىستى. ءتۋرنيردى اشقان وبلىس اكىمى نۇرلان نوعاەۆ شارا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرىلعانىن ايتا كەلىپ, يندونەزيادا وتكەن پارازيا ويىندارىندا جۇلدەگەر اتانىپ كەلگەن اتىراۋلىقتاردى ماراپاتتادى.
ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى قايرات ساتىبالدى قازاقستاننان تىس جەرلەردە ۇلتتىق سپورت تۇرلەرىنىڭ تانىمالدىلىعىن ارتتىرۋ جانە ەل ىشىندە ناسيحاتتاۋ اسسوتسياتسياسىنىڭ الدىندا تۇرعان مىندەتتەر ەكەنىن اتاپ ءوتتى. «اتىراۋ 7 مەملەكەتتەن سپورتشىلاردى جيناپ, استانانىڭ 20 جىلدىعىنا وراي وسىنداي اۋقىمدى شارا ۇيىمداستىرىپ وتىرعانىنا قۋانامىن. وبلىس باسشىلىعى تاراپىنان اتا ءداستۇرىن دامىتىپ, الەمدىك ارەنادا ناسيحاتتاۋدا قولداۋ كورسەتىلىپ وتىر», – دەدى قايرات ساتىبالدى.
جارىس بولعان المالى اۋىلى ناعىز مەرەكەنىڭ ورداسىنا اينالدى. اقشاڭقان كيىز ۇيلەر قۇرىلىپ, كورەرمەنگە ۇلتتىق تاعامدار ۇسىنىلدى. جارىس قورىتىندىسىندا ۇزدىك كوكپارشىعا «التىن قامشى» ارنايى سىيلىعى بەرىلدى. ال 31 شاقىرىم قاشىقتىقتا مارەگە العاش جەتكەن قاتىسۋشى 5 ملن تەڭگە كولەمىندەگى باس جۇلدەنى جەڭىپ الدى. بارلىق سپورت تۇرلەرى بويىنشا جەڭىمپاز اتانعاندار دا, قاتىسۋشىلار دا سىي-قۇرمەتكە يە بولدى.
باقىتگۇل باباش,
«ەگەمەن قازاقستان»
اتىراۋ