استانادا ەڭبەك كۇنى مەن الەۋمەتتىك قورعاۋ قىزمەتكەرلەرى كۇنىنە وراي «جالپىعا ورتاق ەڭبەك قوعامىنا قاراي» اتتى رەسپۋبليكالىق فورۋم ءوتتى. سالتاناتتى جيىندا ەلىمىزگە ەڭبەگى سىڭگەن ءار سالانىڭ قىزمەتكەرلەرىنە «ەڭبەك ارداگەرى» مەدالى تابىستالىپ, «ەڭبەك جولى» جانە «ۇزدىك الەۋمەتتىك قىزمەتكەر» رەسپۋبليكالىق كونكۋرستارىنىڭ جەڭىمپازدارى ماراپاتتالدى.
ەڭبەك كۇنى مەملەكەت باسشىسى نۇرسۇلتان نازارباەۆتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسىن ناسيحاتتاۋ جانە ەڭبەك ادامىنىڭ بەدەلىن ارتتىرۋ ماقساتىندا 2014 جىلدان بەرى اتالىپ كەلەدى. سول جىلى ۇكىمەتتىڭ قاۋلىسىمەن «ەڭبەك ارداگەرى» مەدالى, 2015 جىلى «ەڭبەك داڭقى» مەدالى بەكىتىلگەن بولاتىن. بۇعان قوسا ەڭبەك جانە حالىقتى الەۋمەتتىك قورعاۋ مينيسترلىگى 2016 جىلدان باستاپ جىل سايىن «ەڭبەك جولى» كونكۋرسىن وتكىزىپ كەلەدى.
فورۋمنىڭ اشىلۋ سالتاناتىندا ءسوز العان ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا فورۋمنىڭ ماڭىزدىلىعىنا توقتالا كەلىپ, ەلىمىزدە الەۋمەتتىك قورعاۋ جۇيەسىنىڭ جەتىلە بەرەتىندىگىن جانە قازاقستاندىقتارعا ۋاقتىلى, تولىق الەۋمەتتىك قولداۋ كورسەتىلۋى قاجەتتىگىن نازارعا الدى. «بۇل فورۋم ەڭبەك ادامىنىڭ قوعامداعى بەدەلىن كورسەتىپ, جاستاردى ءوندىرىس سالاسىنا تارتۋدى كوزدەيدى. پرەزيدەنت جاڭا جولداۋىندا ءار وتباسىنىڭ تابىسىن ارتتىرۋدا ەڭبەكتىڭ ماڭىزدى ورنىن اتاپ ءوتتى. ەلباسى قازاقستان حالقىنىڭ ءال-اۋقاتىن ءوسىرۋدى ەلىمىزدى دامىتۋدىڭ نەگىزگى ماقساتى رەتىندە ايقىندادى. حالىقتىڭ تابىسىن ارتتىرۋ ماقساتىندا مەملەكەت باسشىسىنىڭ تاپسىرماسىنا سايكەس 2019 جىلدىڭ 1 قاڭتارىنان باستاپ قازاقستاندىقتاردىڭ ەڭ تومەنگى جالاقىسى 28 مىڭنان 42 مىڭ تەڭگەگە دەيىن كوبەيەتىن بولادى. ناتيجەسىندە 1 ملن 300 مىڭ ادامنىڭ, ونىڭ ىشىندە 275 مىڭ ازاماتتىق قىزمەتشىنىڭ, سونىمەن قاتار الەۋمەتتىك قىزمەت كورسەتۋ سالاسىندا جۇمىس ىستەيتىن ادامداردىڭ جالاقىسى وسەدى. ەڭبەك رەسۋرستارىنىڭ باسەكەگە قابىلەتتىلىگىن ارتتىرۋ ءۇشىن ءبىلىم بەرۋ ساپاسىن بارلىق دەڭگەيدە جاقسارتۋ شارالارى كوزدەلەدى. سالاماتتى ۇلت قالىپتاستىرۋ ءۇشىن مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ بويىنشا شارالار قابىلدانادى. حالىقتىڭ تابىسىن ارتتىرۋ, جۇمىسپەن قامتۋ جانە جۇمىسقا ورنالاستىرۋ مۇمكىندىگىنە, ەڭبەك ونىمدىلىگىن ارتتىرۋعا بايلانىستى وسىنداي اتقارىلىپ جاتقان جۇمىستاردا ەڭبەك ارداگەرلەرى مەن كۇن سايىن وندىرىستە ماڭداي تەرىن توگىپ ەڭبەك ەتىپ جاتقان ەڭبەك اۋلەتتەرىنىڭ ۇلەسى ولشەۋسىز», دەگەن مينيستر جينالعان جۇرتتى قوس مەرەكەمەن قۇتتىقتادى جانە «ەڭبەك ارداگەرى» مەدالىن تابىستادى.
بيىل «ەڭبەك ارداگەرى» مەدالىنە سەمەي قالاسىنداعى «سيليكات» جشس باس مەحانيگى نيكولاي لازۋرين, استانا مەديتسينا ۋنيۆەرسيتەتى اكۋشەريا جانە گينەكولوگيا كافەدراسىنىڭ اسسيستەنتى رامزيا رازۋموۆا, ورىس ءتىلى ءپانىنىڭ مۇعالىمى حازيما ايداربەكوۆا, باس اسكەري كلينيكالىق گوسپيتالى حيرۋرگيا ءبولىمىنىڭ حيرۋرگى ەسىمعالي تالاسباەۆ, ت.جۇرگەنوۆ اتىنداعى قازاق ۇلتتىق ونەر اكادەمياسى كاسىپتىك باعدارلاۋ ءبولىمىنىڭ مەڭگەرۋشىسى عاليا مولداجانوۆا, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ سۋرەتشىسى ولگا ۆولودينا, استانا قالاسى الەۋمەتتىك-كاسىپكەرلىك كورپوراتسيالاردىڭ قىزمەتىن ۇيلەستىرۋ جانە ادىستەمەلىك قامتاماسىز ەتۋ بويىنشا جۇمىستاردى باسقارعان گۇلنار قاسەنوۆا, مىندەتتى الەۋمەتتىك ساقتاندىرۋ جانە زەينەتاقىمەن قامسىزداندىرۋ سالاسىندا ۇزاق جىل قىزمەت ەتكەن گۇلزادا سۇلتانوۆا يە بولدى.
ءۇش اتالىم بويىنشا وتكەن «ەڭبەك جولى» كونكۋرسىنىڭ جەڭىمپازدارى ونلاين داۋىس بەرۋ جانە رەسپۋبليكالىق كوميسسيانىڭ شەشىمىمەن انىقتالدى. اتالعان بايقاۋدىڭ «ۇزدىك ەڭبەك اۋلەتى» اتالىمىن 458 جىل ءتورت ۇرپاق بويى ورمان شارۋاشىلىعى سالاسىندا 25-تەن استام اۋلەت مۇشەسى ەڭبەك ەتكەن قۇرمانعاليەۆتەر وتباسى جەڭىپ الدى. «جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا «كازحروم «تۇك» اق مەتاللۋرگى ابىلقايىر سوتقاروۆ ماراپاتتالسا, «دوسسورمۇنايگاز» مۇناي-گاز ءوندىرۋ بىرلەستىگىنىڭ مۇنايشىسى ايبەك تۇرسىنبەك «وندىرىستەگى ۇزدىك جاس جۇمىسكەر» اتالىمىنىڭ جەڭىمپازى اتاندى.
«ۇزدىك الەۋمەتتىك قىزمەتكەر» رەسپۋبليكالىق بايقاۋىنىڭ «زەينەتاقى جۇيەسىندەگى ۇزدىك قىزمەتكەر» نوميناتسياسى ەڭبەك, الەۋمەتتىك قورعاۋ جانە كوشى-قون كوميتەتىنىڭ سولتۇستىك قازاقستان وبلىسى بويىنشا دەپارتامەنتىنىڭ زەينەتاقى جانە الەۋمەتتىك قامتاماسىز ەتۋ ءبولىمىنىڭ باسشىسى گۇلجان سۇلتانعازيەۆاعا بۇيىرسا, «الەۋمەتتىك ساقتاندىرۋ جۇيەسىندەگى ۇزدىك قىزمەتكەر» اتالىمىن «مەملەكەتتىك الەۋمەتتىك ساقتاندىرۋ قورى» اق اقمولا وبلىسى فيليالىنىڭ ديرەكتورى ايناگۇل سابىروۆا ەنشىلەدى. باتىس قازاقستان وبلىسى «شاپاعات» ارناۋلى الەۋمەتتىك قىزمەتتەر كورسەتۋ ورتالىعىنىڭ دەفەكتولوگى بيبىگۇل جارتىباەۆا «ۇزدىك الەۋمەتتىك قىزمەتكەر», اقتوبە وبلىسى مۇعالجار اۋدانى اكىمدىگىنىڭ حالىقتى جۇمىسپەن قامتۋ ورتالىعىنىڭ مامانى راۋشان كۇبايدۋللينا «جۇمىسپەن قامتۋ ورتالىعىنىڭ ۇزدىك قىزمەتكەرى» اتاندى. «ۇزدىك مەديتسينالىق-الەۋمەتتىك مەكەمە» نوميناتسياسىن قىزىلوردا وبلىسى «بالالارعا ارناۋلى الەۋمەتتىك قىزمەت كورسەتۋ ورتالىعى» ال «ۇزدىك الەۋمەتتىك ۇكىمەتتىك ەمەس ۇيىم» نوميناتسياسىن الماتى قالاسىنداعى «امال-يمان» قوعامدىق قورى جەڭىپ الدى. «الەۋمەتتىك سالانىڭ ۇزدىك مەنەدجەر-ۇيىمداستىرۋشىسى» اتالىمى قىزىلوردا وبلىسى «مۇگەدەكتەرگە ارنالعان وڭالتۋ ورتالىعى» ديرەكتورىنىڭ ورىنباسارى گۇلميرا كەنجەباەۆاعا بۇيىرسا, «مەديتسينالىق-الەۋمەتتىك ساراپتامانىڭ ۇزدىك قىزمەتكەرى» نوميناتسياسىن استانا قالاسى مەديتسينالىق-الەۋمەتتىك ساراپتاما ءبولىمىنىڭ باس مامانى ءلاززات تىلەكينا ەنشىلەدى. «ۇزدىك مەملەكەتتىك ەڭبەك ينسپەكتورى» نوميناتسياسى بويىنشا قىزىلوردا وبلىسىنىڭ ەڭبەك سالاسىنداعى باقىلاۋ باسقارماسىنىڭ ەڭبەك قاۋىپسىزدىگى جانە ەڭبەكتى قورعاۋدى باقىلاۋ ءبولىمىنىڭ باسشىسى-مەملەكەتتىك ەڭبەك ينسپەكتورى ابدىمالىك ءايتىموۆ, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ەڭ ۇزدىك الەۋمەتتىك قىزمەتكەرى» نوميناتسياسى بويىنشا اتالعان مەكەمەنىڭ ورتالىق فيليالىنىڭ باس مامانى اتامەكەن اشماحانوۆا ماراپاتتالدى.
مايگۇل سۇلتان,
«ەگەمەن قازاقستان»