استانادا پرەزيدەنت اكىمشىلىگىنىڭ باسشىسى اسەت يسەكەشەۆتىڭ توراعالىعىمەن قازاقستان رەسپۋبليكاسى پرەزيدەنتىنىڭ جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەزەكتى وتىرىسى بولىپ ءوتتى.
ۇلتتىق كوميسسيا وتىرىسىنىڭ كۇن ءتارتىبى بويىنشا نەگىزگى ماسەلە – «رۋحاني جاڭعىرۋ» باعدارلاماسىن ىسكە اسىرۋدىڭ جانە باعدارلامانى باسقارۋ كەڭسەسىنىڭ قىزمەتىن ۇيىمداستىرۋدىڭ ناتيجەلەرى تالقىلاندى.
ۇلتتىق كوميسسيا توراعاسى وتىرىستى اشۋداعى سوزىندە «رۋحاني جاڭعىرۋ» باعدارلاماسىنىڭ مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنىڭ نەگىزگى باعىتتارىن ىسكە اسىرۋ اياسىنداعى ەرەكشە ماڭىزىن اتاپ ءوتتى.
سونىمەن قاتار «رۋحاني جاڭعىرۋ» باعدارلاماسىنىڭ مازمۇنىن بايىتىپ, جاڭا باعىتتارمەن تولىقتىرۋدىڭ ماڭىزدىلىعىنا توقتالدى.
– مەملەكەت باسشىسىنىڭ تاپسىرماسىنا سايكەس, تاياۋ ۋاقىتتا جاڭادان «اۋىل – ەل بەسىگى» جانە ء«وز جەرىڭدى تانىپ ءبىل» جوبالارى ىسكە قوسىلاتىن بولادى, ولار اۋىلدىق ەلدى مەكەندەردى دامىتۋعا قوسىمشا سەرپىن بەرمەك, – دەدى ءا.يسەكەشەۆ.
كوميسسيا وتىرىسىندا, سونداي-اق وڭداسىن ورازالين, ايدا بالاەۆا, داۋرەن اباەۆ, ارمان ەۆنيەۆ, دارحان كالەتاەۆ, ارىستانبەك مۇحامەدي ۇلى جانە راۋان كەنجەحان ۇلى ءسوز سويلەدى.
ۇلتتىق كوميسسيا وتىرىسىندا بەينەبايلانىس رەجىمىندە جامبىل جانە باتىس قازاقستان وبلىستارىنىڭ اكىمدەرى تىڭدالدى.
تالقىلاۋلار قورىتىندىسى بويىنشا ۇلتتىق كوميسسيانىڭ توراعاسى ۇكىمەتكە 2018-2019 جىلدارعا ارنالعان «رۋحاني جاڭعىرۋ» باعدارلاماسىن ىسكە اسىرۋ جونىندەگى بىرىڭعاي جوسپار ازىرلەۋدى, اۋىل شارۋاشىلىعى مينيسترلىگىنە «اۋىل – ەل بەسىگى» جاڭا الەۋمەتتىك جوباسىن ىسكە قوسۋدى تاپسىردى.
وڭىرلەر باسشىلارىنا جەرگىلىكتى جەرلەردە باعدارلامانىڭ تاپسىرمالارىن بارلىق باسىمدىق باعىتتارى بويىنشا ناقتى ماقساتتار مەن ناتيجەلەرگە قول جەتكىزۋگە كوڭىل بولە وتىرىپ ىسكە اسىرۋ جونىندە تاپسىرمالار بەرىلدى.
ايتا كەتەرلىگى, ۇلتتىق كوميسسيا پرەزيدەنت جارلىعىمەن قوعامدىق سانانى جاڭعىرتۋ باعدارلاماسىن ىسكە اسىرۋ, ەلدىڭ ودان ءارى ىلگەرىلەمەلى مادەني-گۋمانيتارلىق دامۋىن قامتاماسىز ەتۋ ماقساتىندا قۇرىلعان. كوميسسيا قۇرامىنا تانىمال قوعام قايراتكەرلەرى, عالىمدار, جازۋشىلار, جۋرناليستەر, پارلامەنت دەپۋتاتتارى, پرەزيدەنت اكىمشىلىگىنىڭ وكىلدەرى, ۇكىمەت مۇشەلەرى, وڭىرلەردىڭ, استانا, الماتى جانە شىمكەنت قالالارىنىڭ اكىمدەرى, قازاقستان حالقى اسسامبلەياسىنىڭ مۇشەلەرى, ساياسي پارتيالار وكىلدەرى كىرگەن.