الماتىدا بىرىككەن ۇلتتار ۇيىمىنىڭ ءۇيى اشىلدى. مەگاپوليستەگى بوتانيكا باعى مەن «اتاكەنت» كورمە ورتالىعىنا جانە نەگىزگى ماگيسترالدارعا جاقىن ورىن تەپكەن ساۋلەتتى عيماراتتىڭ اشىلۋ راسىمىنە ەلشىلىك كورپۋستارىنىڭ جانە بۇۇ-نىڭ 14 وڭىرلىك ءوفيسىنىڭ وكىلدەرى قاتىستى.
جاڭا نىسان بەدەلدى ۇيىمنىڭ جوعارى حالىقارالىق ستاندارتتارىنا جانە قاۋىپسىزدىك تالاپتارىنا ساي جابدىقتالعان. مۇندا بۇۇ-نىڭ اگەنتتىكتەرى مەن اكىمشىلىك وكىلدەرى جۇمىس ىستەيتىن بولادى. كەڭسەنىڭ اشىلۋ راسىمىنە ارنايى كەلگەن يۋنيسەف-ءتىڭ ەۋروپا جانە ورتالىق ازيا ەلدەرى بويىنشا وڭىرلىك ديرەكتورى افشان حان الماتىداعى جاڭا ءوفيستىڭ وڭىرلىك وكىلدىكتەر قىزمەتىنە تىڭ سەرپىلىس بەرەتىنىن جانە قازاقستاننىڭ وركەندەۋىنە زور ۇلەس قوساتىنىن, ال قازاقستاننىڭ بۇۇ-نىڭ ودان ءارى دامۋىنا بارىنشا ىقپال ەتەتىنىن اتاپ ءوتتى.
– ءوز كەزەگىندە بۇۇ باس حاتشىسىنىڭ اتىنان قازاقستانعا, سىرتقى ىستەر مينيسترلىگىنە, قالا اكىمشىلىگىنە وسىنداي يگى شارالاردى جۇزەگە اسىرعاندارى جانە بارلىق وڭىرلەردە تۇراقتى دامۋدى ماقسات ەتكەندەرى ءۇشىن العىس ايتامىن. بۇل جاڭا وفيس حالىقارالىق ۇيىمدارمەن عانا ەمەس, سونىمەن قاتار ەلدىڭ دارىندى جاستارىمەن ىنتىماقتاستىقتى ودان ءارى نىعايتۋعا جاڭا مۇمكىندىكتەر بەرەدى, – دەدى افشان حان.
بۇعان دەيىن شاھاردا ىسكە قوسىلعان «قالا ادامدار ءۇشىن» كونتسەپتسياسى اياسىندا قوعامدىق كەڭىستىك مودەرنيزاتسيالانۋدا, اسىرەسە مۇمكىندىگى شەكتەۋلى جاندارعا بارلىق جاعداي جاسالعان. بۇۇ-نىڭ دامۋ باعدارلاماسىنا ساي «تۇراقتى كولىك» جوباسى دا جۇيەلى جۇزەگە اسىپ كەلەدى. مەملەكەت باسشىسىنىڭ ينستيتۋتتىق رەفورمالارىنىڭ ارقاسىندا تۇراقتى ەكونوميكالىق ءوسىم قامتاماسىز ەتىلگەن. الماتىدا 29 كونسۋلدىق پەن ساۋدا وكىلدىگى بار, سونىمەن قاتار ءىرى ترانسۇلتتىق كومپانيالاردىڭ 60-تان استام كەڭسەلەرى ورنالاسقان.
الماتىنىڭ تۇراقتى دامۋ قاعيداسىن ۇستاناتىنىن تىلگە تيەك ەتكەن قالا اكىمى باۋىرجان بايبەك: «قازاقستان – بەيبىتشىلىكتى سۇيەتىن ءارى قاۋىپسىز ەل. ءبىز قالانى حالىقارالىق ۇيىمداردىڭ وڭىرلىك حابىنا اينالدىرۋ ءۇشىن جۇيەلى جۇمىس جۇرگىزىپ كەلەمىز. بىرىككەن ۇلتتار ۇيىمىنىڭ جاڭا ءۇيىنىڭ تۇساۋكەسەرى ءبىزدىڭ ورتاق ىنتىماعىمىزدىڭ تاريحىنا التىن ارىپتەرمەن جازىلاتىنىنا سەنىمدىمىن» دەپ اتاپ ءوتتى.
اتالعان ۇيىمنىڭ ەلىمىزدەگى وكىلدىگى جاڭا عيماراتقا بيىلعى جىلدىڭ سوڭىنا دەيىن كوشەدى دەپ جوسپارلانعان.
ارمان وكتيابر,
«ەگەمەن قازاقستان»