استانادا بوكس قوزعالىسىنىڭ 85 جىلدىق مەرەيتويىنا وراي مەرەكەلىك شارا ءوتتى, دەپ حابارلايدى قازاقستاننىڭ بوكس فەدەراتسياسى.
باقتيار ارتاەۆ, مەرەي اقشالوۆ, نۇرجان كارىبجانوۆ, اعايىندى ايبەك پەن نۇربەك ورالباي, قانات ءابۋتالىپ, ءلاززات كۇنگەيباەۆا, مەيىرىم نۇرسۇلتانوۆ سىندى بوكستىڭ جارىق جۇلدىزدارى, جاس بۋىننىڭ سۇيىكتى كەيىپكەرلەرى كوپشىلىكپەن كەزدەسىپ, ساليقالى سۇحبات جۇرگىزدى.
«بوكس, ونىڭ ىشىندە بىزگە ەتەنە تانىمال بولىپ كەتكەن اعىلشىن بوكس ءستيلىنىڭ وليمپيادالىق سپورت رەتىندە تىركەلۋى, دامۋى جانە بۇل يندۋستريانىڭ توعىز جولدىڭ تورابىنداعى قازاق جەرىنە دە كەلۋى زاڭدىلىق بولاتىن. سوناۋ ەل اشتىققا ۇشىراپ, جاپپاي كوللەكتيۆتەندىرۋ ءجۇرىپ جاتقان قيىن قىستاۋ زاماندا بوكس سپورت رەتىندە ۇلى دالاعا كەلگەن. 85 جىلدى كەيىنگە شەگەرسەڭىز 1933 جىلعا تاپ بولاسىز», - دەلىنگەن حابارلامادا.
قاسيەتتى دە قاستەرلى, بارشا قازاق ەلىنىڭ قارا شاڭىراعى سانالاتىن ماڭعىستاۋ ءوڭىرىنىڭ تۋماسى شوقىر بولتەك ۇلى الماتىدا العاش جاس ورەندەر تاربيەلەپ باستاعان. كەيىن قاراعاندى, قىزىلوردا, ورىنبور, قىزىلجار, جامبىل, شىمكەنت, تاسكەنت قالالارىندا سپورت سەكتسيالارى اشىلدى.
بۇگىنگى مەرەكەلىك شارا اياسىندا وسىنداي تاريحي دەرەكتەر ناسيحاتتالىپ, مەيماندار اراسىندا كونكۋرستار ۇيىمداستىرىلىپ, ءتۇرلى سىيلىقتار ۇلەستىرىلدى. سپورتتىق جاتتىعۋلار ءوتىپ, اننەن شاشۋ شاشىلدى. بوكستىڭ جارقىن وكىلدەرى بۇقارامەن ەستەلىك سۋرەتكە ءتۇستى.
«قازاق بوكسىنىڭ 85 جىلدىعى قۇتتى بولسىن. بۇل ءبىزدىڭ ەلىمىزدە ءنومىرى ءبىرىنشى سپورت. تاۋەلسىزدىك جىلدارىندا عانا 7 وليمپيادا ويىندارىنىڭ چەمپيونى شىققان. «استانا ارلانس» كوماندامىز «بۇكىلالەمدىك بوكس سەرياسى» ءتۋرنيرىنىڭ 3 دۇركىن جەڭىمپازى. قاي ءوڭىرىمىزدى الىپ قاراعاندا تالاي مىقتى سپورتشىلارىمىز بولعان, بولا بەرەدى دە», - دەپ اتاپ ءوتتى «استانا ارلانس» كاسىپقوي بوكس كلۋبىنىڭ باس مەنەدجەرى, 2004 افينا وليمپياداسىنىڭ چەمپيونى, باركەر كۋبوگىنىڭ يەگەرى باقتيار ارتاەۆ.
«بارشا سپورتسۇيەر قاۋىمدى قازاق بوكسىنىڭ 85 جىلدىعىمەن قۇتتىقتايمىن. بۇل مەرەيلى كۇندە ءبىز سپورت ارداگەرلەرىن, بوكستىڭ دامۋىنا ۇلكەن ۇلەس قوسقان ازاماتتاردى ەسكە الامىز. سولاردىڭ ەڭبەكتەرىن جاستارعا ناسيحات قىلىپ ايتامىز», - دەدى مەرەي اقشالوۆ.
جاس تا بولسا باس بولىپ جۇرگەن اعايىندى ايبەك پەن نۇربەك ورالباي دا كوپشىلىكپەن بىرگە سۋرەتكە ءتۇسىپ, جينالعان جۇرتتىڭ كوڭىلىن تاۋىپ جاتتى. ءبىرى بيىل بۋداپەشتتە وتكەن الەم چەمپيوناتىنىڭ جەڭىمپازى, ءبىرى جاسوسپىرىمدەر وليمپياداسىنىڭ كۇمىس جۇلدەگەرى.